• cümə, 29 Mart, 06:27
  • Baku Bakı 5°C

Ermənistana qarşı sanksiyalar tətbiq edilməsi üçün hələ də gec deyil - Vitse spiker

03.11.20 13:37 653
Ermənistana qarşı sanksiyalar tətbiq edilməsi üçün hələ də gec deyil - Vitse spiker
Əks-hücum əməliyyatlarının başlanmasından qısa bir müddət - bir ay keçməsinə baxmayaraq, Müzəffər Ali Baş Komandanın rəhbərliyində Azərbaycan Ordusu çox böyük qətiyyətlə irəliləyərək uzun illərdir düşmən tapdağında qalmış bir çox ərazilərimizi işğaldan azad etdi və bu istiqamətdə mübarizəsini müvəffəqiyyətlə davam etdirir. Trend-in məlumatına görə, bunu Milli Məclisin vitse-spikeri Adil Əliyev deyib.
A.Əliyev bildirib ki, dövlət tərəfindən uzun illərdir ordu quruculuğuna göstərilən diqqət və qayğı öz bəhrəsini verməkdədir:
"Bu gün Azərbaycan Ordusu beynəlxalq təşkilatların hesabatlarında dünyanın ən güclü orduları sırasında ilk 50-liyə daxildir. Ordumuz maddi-texniki təchizatı, şəxsi heyətinin komplektləşdirilməsi baxımından malik olduğunu üstünlüklər sayəsində qısa zaman kəsiyində Ermənistan ordusuna qarşı döyüşlərdə ölkəmizin ərazi bütövlüyünü bərpa etməyə tam qadir olduğunu bir daha nümayiş etdirdi.
Ermənistan tərəfindən işğal edilmiş ərazilər Şanlı Ordumuz tərəfindən ard-arda azad edilir və Qarabağa artıq yeni nəfəs gəlir. Hər bir azərbaycanlı bu gün qürurverici bir tarixə şahidlik edir. Belə möhtəşəm qələbələrin əldə edilməsi dövlət başçısı tərəfindən uzun illər ərzində sistemli şəkildə həyata keçirilən hərbi, siyasi, iqtisadi və geopolitik sahədə uğurlu idarəetmənin nəticəsidir. Biz hər gün Müdafiə Nazirliyinin paylaşdığı videogörüntüləri böyük maraqla izləyirik. Düşmənə məxsus olan texnikaların və şəxsi heyətin məhv edilməsi və ya qənimət olaraq ələ keçirilməsi xalqımızda çox böyük ruh yüksəkliyi yaradır. Eyni zamanda da hamımızı düşünməyə vadar edir ki, məhv etdiyimiz və qənimət kimi götürdüyümüz sursatın dəyəri 2,7 milyard dollardan çoxdur. Ermənistan isə müflis ölkədir, heç bir gəlir qaynağı yoxdur, xarici borcu büdcəsindən azı 5 dəfə daha çoxdur, belə ki, büdcəsi 2 milyard dollardan azdır, xarici borcu isə 8 milyard dollardan çoxdur. Habelə, COVİD-19 xəstəliyinin Ermənistan ərazisində çox sürətli yayılması, iqtisadiyyata artıq qarşısı alınmaz zərbə vurub, belə olan halda bu qədər qiymətli silah Ermənistan da hardandır?
Ötən müddət ərzində üç dəfə humanitar atəşkəs elan olundu. Ermənistan hər dəfə bu atəşkəsi kobud şəkildə pozdu. İlk dəfə humanitar atəşkəsdən sonra Gəncə şəhərinin raket zərbələri ilə vurulması zamanı 10 nəfər dinc sakin şəhid oldu. Növbəti dəfə yenidən Gəncə şəhərinə düşmən hücumuna məruz qaldı. Sonuncu dəfə isə Bərdə rayonuna olan raket hücumu Ermənistanın əsl niyyətini bütün dünyaya göstərdi. Ermənistan tərəfi atəşkəsi hər dəfə pozmaqla bu istiqamətdə vasitəçi olan ölkələrə hörmətsizlik edir. Həmin münasibəti Ermənistan bu vaxta qədər BMT Təhlükəsizlik Şurasının qətnamələrini icra etməməklə də nümayiş etdirib.
Eyni zamanda, məlum qətnamələri qəbul edən, münaqişə ilə bağlı, o cümlədən atəşin dayandırılması istiqamətində təşəbbüslər irəli sürən dövlətlər də bu məsələyə laqeyd yanaşırlar. Hər addımda beynəlxalq hüququn tələblərini kobud şəkildə pozan, müharibə qanunlarını tanımayan bir ölkəni durdurmaq üçün heç bir səy göstərmirlər. Dəfələrlə deyilib ki, Ermənistan baş nazirinin göstərişi ilə Livandan, Suriyadan ailələr gətirilib və qeyri-qanuni olaraq Qarabağa yerləşdirilir. Lakin buna qarşı heç bir tədbir görülmür. Əksinə, baş nazir bu cəzasızlıq mühitindən sui-istifadə edərək Şuşada inauqurasiya mərasimi keçirib. Bundan başqa, "Dağlıq Qarabağ parlamenti”nin Xankəndidən Şuşaya köçürülməsi və digər təxribatlar törədir”.
A.Əliyev bildirib ki, BTM Təhlükəsizlik Şurasının məlum qətnamələri icra etmədiyinə görə Ermənistana qarşı ciddi sanksiyalar tətbiq etmək hüququ var idi, bu sanksiyaların effektliyini İraqın nümunəsində görmüşdük:
"Lakin, nədənsə Ermənistanın bu aqressiv davranışının qarşısını almağa heç kəs cəhd etmir. Belə olan halda isə işğalçı dövlətin cəzalandırılması missiyası və BMT Təhlükəsizlik Şurasının qətnamələrini icra etmək vəzifəsi Rəşadətli Ordumuzun üzərinə düşdü.
Bu, bir həqiqətdir ki, Ermənistanın təcavüzkar əməlləri təkcə regiona yox, eyni zamanda, bütün dünyaya təhdiddir. Regionda baş verən bütün konfliktlərin yaradıcısı Ermənistandır. Ermənistanın hazırkı siyasi rəhbərliyi öz xələfləri kimi cinayətkardır və işğalçılıq siyasətini yürütməkdə davam edir. Mülki əhalini hədəf alaraq, beynəlxalq hüququn tələblərini, o cümlədən 1949-cu il tarixli Cenevrə Konvensiyasının normalarını kobud şəkildə pozur.
Ermənistanın mülki Azərbaycan əhalisini hədəfə alması, Gəncə və Bərdə şəhərlərində eləcə də digər rayon və şəhərlərimizdə mülki vətəndaşlarımıza raket zərbələri endirməsi, nəticədə içərisində uşaqlar və qadınlar olan insanlarımızın ölməsi heç cür qəbul edilən deyil. Baxmayaraq ki, insan hüquqları sahəsində ixtisaslaşmış təşkilatlar hazırda mülki vətəndaşlarımızın ölümünə heç bir reaksiya vermir. "Amnesty International” və "Human Rights Watch” təşkilatlarının Ermənistan silahlı qüvvələrinin Bərdəyə qadağan olunmuş kasetli raketlərlə zərbələr endirməsini sanki görməzdən gəlir, bu təşkilatların hansısa maraqlara xidmət etdiyini artıq heç kəs inkar etmir.
Hazırda Türkiyə, İran, Rusiya və Azərbaycan arasında həm çoxtərəfli, həm də ikitərəfli formatlarda fəal əməkdaşlıq imkanları yaranıb. Bu, iqtisadi, nəqliyyat, geosiyasi sahədə, habelə regionda təhlükəsizliyin möhkəmləndirilməsi baxımından olduqca önəmlidir. Lakin Ermənistan öz işğalçılıq siyasətini davam etdirərək, təxribatlar törədərək buna mane olmağa çalışır.
Bu gün Azərbaycan xalqı ilə yanaşı, bütün sülhsevər dünya ictimaiyyəti ədalətin bərqərar olunacağını - Ermənistan təcavüzünə tezliklə son qoyulacağı, Azərbaycanın tarixi torpaqlarının azad ediləcəyi, ərazi bütövlüyümüzün bərpa olunacağı günü gözləyir. Azərbaycan həmişə müxtəlif xalqların, millətlərin və dinlərin birgə yaşadığı, multikultural dəyərləri yüksək qiymətləndirən tolerant bir ölkə kimi tanınıb. Multukulturalizm Azərbaycanda dövlət siyasəti səviyyəsində aparılıb. Bu da onu deməyə əsas verir ki, gələcəkdə Qarabağda xalqımızla yanaşı başqa millətlərin nümayəndələrinin də yaşaması üçün heç bir məhdudiyyət olmayacaq. Məlumdur ki, erməni xalqı Azərbaycan torpaqlarına Gülüstan və Türkmənçay müqavilələrinin imzalanmasından sonra köçürülməyə başlayıb və həmin ərazidə yaşamaları son 200 ili əhatə edir. Onlar yenidən xalqımızla mehriban şəraitdə yaşamaq istəsələr bunun üçün bütün şərait yaradılacaq.
Artıq işğaldan azad edilmiş ərazilərdə xüsusi idarəetmənin formalaşdırılması, vətəndaşlarımızın öz tarixi torpaqlarına geri qayıtması, Dağlıq Qarabağı bərpa edərək onu yer üzündə ən gözəl və həyat üçün rahat guşələrdən birinə çevirmək dövlətimizin müqəddəs amalıdır”.
banner

Oxşar Xəbərlər