“Ermənistan prezidenti papağını qarşısına qoyub fikirləşsin ki...”
"Dağlıq
Qarabağ münaqişəsinə dair heç bir danışıqlar aparılmır”. "Azadlıq” radiosunun
erməni xidmətinin məlumatına görə bu sözləri Ermənistan prezidenti Serj Sarkisyan
deyib. Bildirib ki, bu məsələ ilə bağlı sonuncu dəfə avqustun 10-da ciddi söhbət
olub. İşğalçı ölkənin prezidenti həmçinin, Dağlıq Qarabağ sakinlərinin çətin
dövrə hazır olmalı olduqlarını qeyd edib. Bu açıqlama haqda fikirlərini bölüşən
ekspertlərin qənaəti budur ki, işğalçı ölkənin başçısı danışıqlardan qaçdığını
dolayısı ilə etiraf edib. Bundan əlavə, o, çətin vəziyyətdə olduqlarını da dilə
gətirmiş olub.
Millət vəkili Elman Nəsirov "Kaspi”yə açıqlamasında dedi ki, aprel döyüşlərindən
sonra münaqişənin həlli ilə bağlı prosesdə bir intensivlik müşahidə olunmağa
başladı. Vyana və Sankt-Peterburq görüşləri bunun birbaşa təsdiqi idi: "Təəssüf
ki, bu kəmiyyət intensivliyi keyfiyyət göstəricisində öz əksini tapa bilmədi.
Bunun da məsuliyyəti ilk növbədə, Ermənistanın üzərinə düşür. Çünki o, cidd-cəhdlə
çalışdı ki, vəziyyət dəyişməsin, status-kvo qorunub-saxlanılsın. Lakin bu niyyətin
reallaşmasına görə məsuliyyət ATƏT-in Minsk qrupunun üzərinə düşür. Çünki onlar
özləri buna şərait yaradırlar. Təbii ki, beynəlxalq ictimaiyyətin də üzərinə də
böyük məsuliyyət düşür, onlar da bu vəziyyətə lazımi davranış nümayiş etdirmirlər.
Nəticədə, indiki vəziyyət formalaşıb. ATƏT-in Minsk qrupunun həmsədrləri elə
bir vəziyyətə düşüblər ki, nəinki prezidentlər səviyyəsində, heç xarici işlər
nazirləri səviyyəsində də görüş təşkil etməyi bacarmırlar və Hamburqda
planlaşdırılan, amma baş tutmayan görüş bunu bir daha təsdiqlədi. Bunu təbii
ki, Ermənistan prezidenti də görür. Görür ki, onun cinayətkar əməlinə beynəlxalq
birlik lazımi adekvat reaksiya vermir. O, cəzalandırılmır. Cinayətkar da cəzasız
qalanda elə bəyanatlar verir ki, necə deyərlər, "dəymişin dura-dura, kalın
tökülür”. Ermənistan prezidenti qeyd etməyib ki, danışıqların kəsilməsi məhz onların
tutduğu mövqe ilə əlaqədardır. Onlar istəmirlər ki, danışıqlar olsun. Guya danışıqların
Azərbaycanın mövqeyi ucbatından dayandığını göstərmək istəyirlər, beynəlxalq
ictimaiyyəti yenidən aldatmağa çalışırlar. Reallıq isə başqadır. Azərbaycan
münaqişənin həlli ilə bağlı sülh danışıqlarına hazırdır. Ölkəmizin ən böyük güzəştini
prezident açıqladı. Bildirildi ki, biz Dağlıq Qarabağa Azərbaycanın sərhədləri
çərçivəsində ən yüksək muxtariyyət verməyə hazırıq. Amma təəssüf ki, Ermənistan
tərəfdən analoji bir davranışın, sülhpərvər bir addımın şahidi olmadıq”.
Millət vəkili
bildirdi ki, Ermənistan hər zaman münaqişənin həlli ilə bağlı bir kövrək ümid
yaranarkən növbəti təxribatlara əl atır ki, həmin ümidlər də tamamilə puç
olsun. Bu baxımdan, 2016-cı ilin aprel ayından sonrakı bir neçə ay münaqişənin
həlli ilə bağlı prosesdə intensivliklə yadda qalsa da, sonrakı aylar göstərdi
ki, Ermənistan öz köhnə oyununu oynayır. Ən pisi isə odur ki, belə oyunun oynanmasına
beynəlxalq müşahidəçilər şərait yaradırlar. Bu isə nəticə etibarilə, münaqişənin
indiki vəziyyətinə gətirib çıxarıb: "Amma hər halda, aprel döyüşlərinin çox
mühüm dərsi var. Bu da ondan ibarətdir ki, Dağıq Qarabağ münaqişəsi "dondurulmuş”
deyil. Münaqişə istənilən an müharibəyə çevrilə bilər. Heç kim bunun müharibəyə
çevrilməyəcəyinə təminat verə bilməz. Bu, aprel döyüşlərinin ən mühüm nəticəsidir.
Təəssüf ki, bu reallıqlar fonunda Ermənistanın, ATƏT-in Minsk qrupunun, beynəlxalq
ictimaiyyətin dırnaqarası fəaliyyəti sayəsində biz 2017-ci ilə bu münaqişə ilə
daxil oluruq. Və 2017-ci ildə münaqişənin həlli ilə bağlı 2016-cı ildə elə də
yaxşı fundament yaradılmadı. 2017-ci ildə Ermənistandan münaqişənin həlli ilə
bağlı daha populist bəyanatlar, yeni-yeni təxribatlar gözləyə bilərik. Ən azı o
səbəbdən ki, Ermənistanda 2017-ci il seçki ilidir və həmin seçkilərdə hakim
Respublika Partiyasının lideri Sarkisyan ölkədaxili ictimai fikri aldatmaq,
çaşdırmaq üçün populist bəyanatlardan eninə-boluna istifadə edəcək. Daxili
auditoriyanı rahatlatmağa çalışacaq. 2017-ci ildə münaqişənin həlli ilə bağlı
Ermənistan tərəfdən nə isə mütərəqqi ideya, nə isə bir güzəştli kompromis siyasət
olacağına elə də böyük ümidlər yoxdur. Başqa bir həqiqət də ondan ibarətdir ki,
Azərbaycan bütün bu müddət ərzində güclənmək strategiyasını həyata keçirməkdədir.
Azərbaycan 2016-cı ildə 2015-ci ildən daha güclü idi, xüsusilə, hərbi baxımdan.
2017-ci ildə isə 2016-cı ildən də güclü olacaq. Qoy bundan Ermənistan tərəfi nəticə
çıxarsın. Ermənistan prezidenti papağını qarşısına qoyub fikirləşsin ki, tutduğu
bu yol nə vaxta qədər davam edə bilər? Bir gün gələr, vəziyyət kökündən dəyişə
bilər. Elə bir vəziyyət yarana bilər ki, Ermənistanın birinci prezidenti Levon
Ter-Petrosyanın dediyi kimi, Azərbaycan bu gün getdiyi güzəştlərə, sabah getməyə
bilər. Bu reallığı gərək yaddan çıxarmasınlar”.
Politoloq Mübariz Əhmədoğlu da dedi ki, Sarkisyan özü danışıqlardan qaçır:
"Ölkə başçımız həmişə deyib ki, Ermənistan prezidenti ilə görüşməyə, məsələnin
sülh yolu ilə həllini tapmasına razıdır: "Danışıqlar prosesi sırf işğalçı ölkə
üzündən dayanıb. Sarkisyan dayandırıb. Onlar işğal etdikləri torpaqları
qaytarmaq istəmirlər. Sarkisyan həmin görüşdə başqa fikirlər də deyib. Dolayısı
ilə bildirib ki, Ermənistanın vəziyyəti yaxşı deyil. Ələlxüsus da, ordu ilə
bağlı. Ona görə də onları çətin vəziyyətin gözlədiyini gizlətməyib”.
Şəfa
Tapdıq