Ermənistan cəmiyyəti şok yaşayır
Erməni cəmiyyəti növbəti şok hadisənin təsiri altındadır. Bloger
Aleksandr Lapşinin Belarus hakimiyyət orqanları tərəfindən Azərbaycana təhvil
verilməsi ölkədə hakimiyyətə qarşı növbəti etiraz və narazılığa səbəb olub. Və
gəlinən qənaət budur ki, baş verən hadisə Azərbaycanın növbəti uğuru,
Ermənistanın isə məğlubiyyətidir. Qalmaqallı blogerin Belarusdan Azərbaycana
ekstradisiyası Ermənistanda böyük məyusluq və panika yaradıb. Ötən ilin aprel
hadisələrindən sonra hakimiyyətin üzləşdiyi növbəti fiasko kimi dəyərləndirilir.
Erməni ekspertlər A.Lapşinin ekstradisiyasını S.Sarkisyanın növbəti
məğlubiyyəti, xarici siyasətin isə böyük fəlakəti hesab edirlər. Hakimiyyət isə
çalışır ki, tənqidlərin hədəfi kimi özünü yox Belarusu günahkar çıxarsın. Lakin
keçirilən aksiyalarda prezident Serj Sarkisyan hökuməti kəskin tənqid edilir.
Məsələn, Belarusun Ermənistandakı səfirliyi qarşısında Aleksandr Lapşinin
Azərbaycana ekstradisiyasına qarşı etiraz aksiyası keçirilib. Aksiyanı müxalif
Yolk (Çıxış) seçki bloku təşkil edib. "Vətəndaş müqaviləsi” partiyasının lideri
Nikol Paşinyan baş vermiş hadisə ilə bağlı bildirib ki, bu, Ermənistanın xarici
işlər naziri Edvard Nalbandyana mesaj, Serj Sarkisyanın üzünə sillə vurmaq deməkdir.
"Bu, şəxsən Serj Sarkisyanın üzünə sillədir. Bu sillələrin birini prezident
İlham Əliyev, o birini də Aleksandr Lukaşenko çəkib. Biz istəmirik ki, bu, həm
də erməni xalqına sillə sayılsın. Biz deyirik: Belarus səfiri Ermənistan
ərazisini tərk etməlidir. Ermənistanın Minskdəki səfiri Yerevana qayıtmalıdır”,
- deyə Paşinyan vurğulayıb.
"Vətəndaş müqaviləsi” müxalifət partiyasının lideri deyib ki,
Ermənistanın bütün vətəndaşları, deputatlar və rəsmilər Belarus səfirini boykot
etməli, məsələn, onunla qəbullarda nümayişkəranə şəkildə salamlaşmamalı və ya
ondan açıq şəkildə ölkəni tərk etməsi tələb olunmalıdır. N.Paşinyan əlavə edib
ki, hətta boykotu da "sivilizasiyalı” etmək lazımdır. O, Belarus səfiri üçün
"qısa müddət ərzində Ermənistanı tərk et” tələbi yazılmış bəyanatı səfirliyə
təqdim etməyə çalışıb, lakin səfirliyin əməkdaşları domofonla ona çatdırıblar
ki, səfir yerində yoxdur və bəyanatı qəbul edə bilməyəcəklər. Səfirliyin
qarşısına toplaşanlar Belarus səfirinin ünvanına "Rədd ol!” şüarları qışqırıblar.
Öz növbəsində, "Aysor.am” xəbər portalına müsahibəsində erməni
politoloq Sergey Minasyan deyib ki, Lapşin məsələsi erməni diasporu ilə
hakimiyyət arasında ciddi konflikt yaradıb. Erməni diasporu indiyədək kimlərisə
hansısa şəkildə aldadaraq onların Azərbaycanın işğal altındakı torpaqlarına
qanunsuz səfərini təşkil edirdi. Ermənilərin narahatlığı ondan irəli gəlir ki,
bundan sonra xarici vətəndaşlar həmin ərazilərə getməkdən boyun qaçıracaqlar.
"Bloger Aleksandr Lapşin məsələsinin Ermənistana aidiyyəti yoxdur, bu, Rusiya
və İsrailin işidir”- deyə Sergey Minasyan bildirib. "Lapşin işi Rusiya və
İsrailə aiddir. Məsələyə bunun Ermənistanın deyil, Rusiya və İsrailin işi
olması mövqeyindən yanaşmaq daha düzgün olardı. Ümumiyyətlə, Ermənistanın bu
işə cəlb edilməsindən qaçmaq lazımdır", - deyə politoloq bildirib. Digər
politoloq Stepan Safaryan bildirib ki, Ermənistan Belarusdakı səfirini təcili
şəkildə geri qaytarmalıdır. O, həmçinin parlament rəhbərliyini Ermənistanın AŞ
PA-dakı nümayəndə heyətinin üzvlərinə töhmət verməyə çağırıb. Safaryan hesab
edir ki, AŞ PA-da erməni nümayəndə heyəti Azərbaycan və Belarusun Lapşinlə
bağlı fəaliyyətlərinin qarşısını ala bilməyib.
"Armenianreport” saytı isə yazır ki, Lapşinin təhvil verilməsi
Ermənistanın diplomatik uğursuzluğunun daha bir göstəricisidir: "Bakının tələbi
ilə o, Belarusda həbs olundu, sonra Azərbaycan prezidentinə üzrxahlıq məktubu
yazdı. Məktubda Lapşin məsuliyyətsiz hərəkətlərinə görə üzr istəyirdi.
Ermənistan isə bu məsələdə heç nə edə bilmədi və susdu. Lapşinin Bakıya
verilməsi Azərbaycanın daha bir qələbəsi oldu. Bizim xarici işlər naziri Edvard
Nalbandyan buna görə heç məzəmmət də edilmir. Çünki o, Sarkisyanın yaxın
silahdaşıdır və erməni siyasətinin toxunulmaz şəxslərindəndir. Əsas Ermənistan
maraqlarının müdafiəsi yox, onun Sarkisyan rejiminə sədaqətidir”. Politoloq David
Sanasaryan isə hesab edir ki, Lapşindən sonra heç kəs Dağlıq Qarabağa baş
çəkməyəcək. D.Sanasaryan qeyd edib ki, Ermənistanın Kollektiv Təhlükəsizlik
Müqaviləsi Təşkilatı (KTMT) və Avrasiya İqtisadi İttifaqındakı müttəfiqi olan
Belarus, əslində Azərbaycanın müttəfiqidir: "Reallıqda bu iki təşkilatda təmsil
olunan ölkələrin hamısı Ermənistan istisna olmaqla, Azərbaycanın
müttəfiqidir”.
Öz növbəsində, Ermənistan parlamentində müzakirələr zamanı keçmiş baş
nazir Qrant Baqratyan da blogerin Azərbaycana ekstradisiyasına cavab olaraq
Belarusu KTMT-dən və Avrasiya İqtisadi İttifaqından xaric etməyə çağırıb. "Mən
alovlu çıxışlar etməyi xoşlamıram. Mexanizmlər var: müraciət edin, Belarus
KTMT-dən, Avrasiya İttifaqından çıxarılsın. Müvafiq mexanizmlər var, burada
boş-boş danışmaqla heç nəyə nail olmaq mümkün deyil”- o bildirib. "İrs”
fraksiyasından deputat Tevan Poqosyan isə deyib ki, parlament bu məsələ ilə bağlı
növbədənkənar dinləmələr keçirib xarici işlər, müdafiə nazirlərini, digər
müvafiq strukturların rəhbərlərini müzakirələr üçün çağırmalıdır. Hakim
Respublika partiyasından deputat Karen Bekaryan isə qeyd edib ki, Azərbaycanın
məqsədi Lapşin deyil. "Azərbaycanın məqsədi odur ki, bizi hansısa ölkələrlə və
ya strukturlarla düşmən edəcək addımlar atmağa qızışdırsın. Ona görə də biz
növbəti addımlarımızı planlaşdıranda bunu nəzərə almalıyıq”, - deputat deyib. Digər
deputat Samvel Farmanyana görə, erməni ictimaiyyətinin nəzərində KTMT və
Avrasiya İqtisadi İttifaqı, habelə Belarus kimi müttəfiq dəyərsizləşib. "Rusiya
da dəyərdən düşür, ona görə gərək düşünsünlər”, - deyə o bildirib. Deputat
Xosrov Arutyunyan da Belarusu pisləyib və əhalini Belarus səfirliyi qarşısına
aksiyalara çağırıb.
Ermənistanın hakim Respublika partiyasının fraksiya rəhbəri Vaqram Baqdasaryan
isə parlamentdə Lapşinlə bağlı müzakirələrdə təklif edib ki, rəsmi Yerevan
Belarusun KTMT hərbi blokundan xaric edilməsi məsələsini qaldırmalıdır. Çünki
onun sözlərinə görə, Lapşinin ekstradisiyası Belarusun "müttəfiqlik
öhdəliklərinə” zidddir.
Azər