Erməni müxalifəti seçkinin nəticələrini tanımır
Ermənistan Konstitusiya Məhkəməsi aprelin 2-də keçirilən seçkilərin
nəticələrindən şikayət edən müxalifət partiyalarının müraciətinə baxıb. Məhkəmə
müxalifətin seçkilərdə qanun pozuntularına yol verildiyi barədə iddiasını
əsassız sayıb. Müxalifət hesab edirdi ki, seçkilər kobud qanun pozuntuları və
saxtakarlıq şəraitində keçib. İddianı "Erməni Milli Konqresi” Partiyasının
daxil olduğu blok qaldırıb. Məhkəmə qarşısında çıxış edən "Erməni Milli
Konqresi”nin sədr müavini Levon Zurabyan blokun seçkilərlə bağlı monitorinqinin
nəticələrinin elan edib. L.Zurabyan Konstitusiya Məhkəməsindən xahiş edib ki,
seçki zamanı qeydə aldıqları qanun pozuntuları, videoçəkilişlər və protokollara
nəzər salsın və müvafiq komissiya yaratsın: "Ermənistanda keçirilmiş parlament
seçkiləri nə ölkə daxilində, nə də xaricində müsbət aspektdə qiymətləndirildi.
Əksinə, bu seçkilər bir daha aydın şəkildə nümayiş etdirdi ki, Ermənistan
hakimiyyəti demokratik müstəvidə seçki keçirmək iqtidarında deyil”.
Müxalifətçi
deputat onu da bildirib ki, Konstitusiya Məhkəməsindən müsbət bir cavab
gözləmirlər. Müraciət etmələrində isə iki məqsəd var. "Birincisi, bütün yerli
instansiyalardan keçib, ən sonda Avropa İnsan Haqları Məhkəməsinə üz tutmaq.
İkincisi, bizim və beynəlxalq ictimaiyyətə seçki sistemimizin necə bir saxta
olduğunu göstərmək istəyirik”, - deyə L.Zurabyan vurğulayıb. O, ölkədə əhalinin
sayının getdikcə azaldığını da deyib: "Seçkilərdə biz maraqlı dinamikaya
malikik. Ermənistan əhalisi getdikcə azalır, lakin digər tərəfdən seçkilərdə
iştirak edənlərin rəsmi sayı artır. Bu, necə mümkün olur?” Zurabyan qeyd edib
ki, 2008-ci ildən 2017-ci ilə qədər olan müddətdə seçicilərin siyahısında
təxminin 400 min seçici artıb: "2008-2012-ci illərdə 200 mindən seçki siyahısında
artıb, 2012-2017-ci illərdə də bu qədər artım baş verib. Keçirilən iki seçki
müddətində ölkədə təxminən 400 min seçici artıb”.
"Aprelin 2-də keçirilən seçkilərin legitim olduğunu iddia edən bütün
siyasi qüvvələr mütəşəkkil cinayətkar şəbəkənin bir hissəsidir”. Bu sözləri isə
Ermənistan parlamentinin deputatı, "Ermənistan Milli Konqresi” fraksiyasının
katibi, "Konqres-EXP” blokunun üzvü Aram Manukyan bildirib. Onun sözlərinə
görə, Konstitusiya Məhkəməsinin çıxardığı qərarın özü legitim deyil. "Ümumiyyətlə,
biz bu dövlətdə hər hansı bir qurumu legitim saymırıq”, - deyən deputat əlavə
edib ki, qanun pozuntuları barədə təqdim etdikləri məlumatları beynəlxalq
müşahidəçilər də təsdiq ediblər.
Konstitusiya Məhkəməsi isə onları əsassız sayıb. Müxalifət
funksioneri bəyan edib ki, şəxsən özü silahlı üsyanın əleyhinədir: "Lakin son
20 ilin tarixi göstərir ki, bu hakimiyyəti seçki yolu ilə dəyişmək mümkün
deyil. Bu da nə vaxtsa silahlı qiyamın baş verə biləcəyi məsələsini
aktuallaşdırır”.
Hakimiyyət isə müxalifətin fikirləri ilə razı deyil. Parlamentin
vitse-spikeri Eduard Şarmazanov bildirib ki, ortaya qoyulan faktlarla bağlı
araşdırma aparılıb və onlar yekun nəticələrə təsir etmir. Müxalifətin
seçicilərə təzyiq edildiyi barədə iddialarını qəbul etməyən vitse-spiker
"Ermənistanda qorxu atmosferi yoxdur” deyə bəyan edib. Halbuki, "Azadlıq”
radiosunun erməni xidməti Lori vilayətindən hazırladığı reportaj ortaya maraqlı
nəticələr çıxarıb. Belə ki, sakinlər qorxu altında hakim Respublika Partiyasının
nümayəndələrinə səs verdiklərini bildiriblər. Bildiriblər ki, səs
verməyəcəkləri halda onları polis idarəsinə aparacaqlarını, ya da işdən
qovacaqlarını bildiriblər. Ermənistanın Konservativ Partiyasının sədri Mikayıl
Ayrapetyan isə bildirib ki, parlament seçkisindən sonra heç bir etiraz olmayıb
və olmayacaq: "Ona görə ki, ölkədə seçki olmayıb. Sadəcə, çox "mükəmməl”
ticarət müqaviləsi imzalanıb. Ticarət müqavilələrindən sonra isə heç bir
aksiya, üsyan olmur. Burada söhbət sövdələşmənin partiyalar və ya bloklar
arasında bağlanmasından getmir. Təəssüf ki, bizim siyasi elitamız yoxdur. Bizim
rəhbərlik xalqı uzun müddət psixoloji olaraq bu sövdələşməyə hazırladı. Bizim
"mükəmməl” televiziya şirkətlərimiz var. Onlar illər ərzində əhalinin qavrama
səviyyəsini, vətənə bağlanma səviyyəsini aşağı saldılar. İnsanlar vətənlərinə
yadlaşdılar. Xalq seçkiyə seçim etmək üçün yox, ticarət etmək üçün getdiyini
anladı”, – deyə o bildirib.
Yeni yaradılan "Erkir çirani” (Əriklər ölkəsi) partiyasının sədri
Zaruhi Postancyan isə hesab edir ki, onların əsas məramı hakim partiyanı siyasi
səhnədən silmək olacaq.
Beləliklə, real vəziyyət göstərir ki,parlament seçkilərinin
saxtalaşdırılması ilə əlaqədar ölkədə narazılıqlar səngimir.
Yaranmış vəziyyətdə Ermənistan daxilində siyasi ziddiyyətlərin daha
da dərinləşəcəyi, hətta vətəndaş qarşıdurmasına qədər gedib çıxa
biləcəyigözlənilir.
Azər