Ərəb dünyası ilə münasibətlər nə vəd edir?
"Düşünürəm ki, indi müsəlman dünyasının əvvəl heç zaman olmadığı
qədər daha çox birliyə ehtiyacı var. Müsəlman dünyasında bu birlik çatışmır.
Düşünürəm ki, Azərbaycan bu istiqamətdə mühüm rol oynayır. IV İslam Həmrəyliyi
Oyunlarının təşkil olunması da bunu göstərir, çünki bu, təkcə idman deyil, bu,
təkcə idmançıların bayramı olmayacaq, bu, müsəlman dünyasının gənclərini birləşdirəcək,
onlar Bakıya gələcəklər, ölkəmizi görəcəklər, əlaqələr quracaqlar və bu
əlaqələr bütün müsəlman gənclərinə ölkələr arasındakı əlaqələri gücləndirməyə
kömək edəcək”.
Bu fikirləri prezident İlham Əliyev Əl-Cəzirə televiziyasına müsahibəsi
zamanı bildirib. Qeyd edib ki, İslam Əməkdaşlıq Təşkilatı dəfələrlə
Azərbaycanda çoxsaylı tədbirlər təşkil edib və Ermənistan-Azərbaycan
münaqişəsində ölkəmizi tam dəstəkləyir. O da qeyd olunub ki, Azərbaycan müsəlman
aləmində birliyi möhkəmləndirmək işinə töhfə vermək, həmrəyliyi gücləndirmək
üçün daha çox çalışmaq istəyir: "Azərbaycan bütün qonşuları ilə yaxşı
münasibətlərə malik olmaq istəyir və düşünürəm ki, biz buna nail olmuşuq. Çünki
bu, hər bir ölkə üçün vacibdir. Bizim Ermənistandan başqa bütün qonşularımızla
çox fəal münasibətlərimiz var. Bizim bir çox Avropa ölkələri ilə çox yaxşı
işgüzar münasibətlərimiz var. Biz Avropa İttifaqının 9 üzv dövləti ilə strateji
tərəfdaşlıq üzrə sazişlər imzalamışıq və yaxın zamanlarda Avropa İttifaqı ilə
yeni sazişlə bağlı danışıqlara başlayacağıq. Qərbdə də yaxşı başa düşürlər ki,
Azərbaycanın öz yolu var və bu siyasət heç kimə qarşı yönəlməyib. Ərəb dünyası
ilə münasibətlərə gəlincə, deməliyəm ki, bu münasibətlər bizim üçün hər zaman
prioritet olub. Mən bir çox ərəb ölkələrinə rəsmi səfərlər etmişəm. Bizim əla
siyasi münasibətlərimiz var. Sizə deyə bilərəm ki, İslam Əməkdaşlıq Təşkilatı
Azərbaycanın işğal olunmuş ərazilərinə münasibətdə böyük həmrəylik nümayiş
etdirmişdir və biz bunu yüksək qiymətləndiririk. Səudiyyə Ərəbistanı, Birləşmiş
Ərəb Əmirlikləri, Küveyt və bir çox başqa ərəb ölkələrinə uğurlu səfərlərim və
Qətərə planlaşdırılan səfərim bu əməkdaşlığı gücləndirəcək. Biz ərəb
ölkələrindən daha çox adamın ölkəmizə gəlməsini istəyirik. Yəqin bilirsiniz ki,
biz bu yaxınlarda Körfəz Əməkdaşlığı ölkələrinin vətəndaşları üçün bütün viza
tələblərini aradan qaldırmışıq. Qətərin Əmiri, Əlahəzrət Azərbaycanda rəsmi
səfərdə olub. İndi isə mənim növbəmdir. Bizim Əlahəzrətlə çox yaxşı şəxsi, mən
deyərdim ki, dost münasibətlərimiz var. Biz bir çox iqtisadi layihələr üzərində
işləyirik. Mən ərəb qardaşlarımıza sülh, sabitlik, tərəqqi, uğurlar
arzulayıram. Sözüm budur ki, Azərbaycan sizin qardaşınızdır. Bir daha demək
istəyirəm ki, biz İslam həmrəyliyi və birliyinə çox sadiqik, bu istiqamətdə çox
iş görürük”.
Prezidentin müsahibəsi, Azərbaycanın ərəb dünyası ilə münasibətləri,
perspektivlər barədə fikirlərini "Kaspi” ilə bölüşən millət vəkili Tahir Kərimli dedi ki, ölkə başçısının Əl-Cəzirə
telekanalına müsahibəsini çox təqdirəlayiq hesab edir. Çünki müsahibə zamanı
mühüm məqamlara toxunulub, vacib mesajlar ötürülüb: "Düşündürücü müsahibə idi. Orada
bir daha qeyd olundu ki, bu il Azərbaycanda "İslam Həmrəyliyi İli” elan olunub.
Bundan əlavə, ölkəmizdə İslam Həmrəyliyi Oyunları keçiriləcək. Müsahibə zamanı
təkcə bu məqamlar diqqətə çatdırılmadı. O da vurğulandı ki, Azərbaycanın əksər
dövlətlərlə yaxşı münasibətləri var. Azərbaycanın təkcə İslama bağlılığı, İslam
Həmrəyliyi Oyunlarının keçirilməsi önə çıxarılmadı. Düşünürəm ki, deyilənlərdə
mesajlar daha çox idi. Prezident İslam dünyasına mesajlarını çatdırdı.
Azərbaycanda inanclıların çoxunun İslam dinini qəbul etməsinə baxmayaraq, ölkəmiz
həm də dünyəvi dövlətdir”.
Millət vəkilinin fikrincə, deyilənlərdə tənqidlər də var idi: "Məlumdur
ki, Ermənistan ərəb və müsəlman dünyası ilə yaxın münasibətlər qurmaq istəyir.
Ərəb, İslam dövlətləri İslam Əməkdaşlıq Təşkilatının üzvləridirlər. Bu qurum
isə Azərbaycanın haqlı mövqeyini dəstəkləyir və bununla bağlı qətnamə qəbul
edib. Amma bəzi müsəlman dövlətlər var ki, əli müsəlman qanına batmış
erməniləri bağırlarına basmaqdan çəkinmirlər. Məsələn, İran Ermənistana qarşı
simpatiyası ilə seçilir. Açıq-aşkar işğalçılara rəğbət bəslədiklərini nümayiş
etdirirlər, müxtəlif əlaqələr qururlar. Prezident geniş auditoriyası olan
Əl-Cəzirə kanalı vasitəsilə diqqətə çatdırdı ki, ərəb və müsəlman dövlətləri bu
kimi davranışlardan çəkinməlidirlər. Bəzən dünyanın lider dövlətlərini belə
məqamlara görə qınayırıq. Amma İslam cameəsində də belə riyakarlıqlara yol verənlər
olur”.
T.Kərimli onu da qeyd etdi ki, Azərbaycanın müstəqilliyi, hüquqi
təminatı, ələlxüsus da qadın hüquqlarının təmin olunması kimi məsələlərdə önə
keçməsi digər dövlətlərə nümunə ola bilər: "Ölkəmiz bu məsələlərdə çox
qabaqcıldır. Biz bu mövzuda elə bir qabaqcıllıq nümayiş etdiririk ki, başqaları
bundan nümunə götürə bilər. Məncə, bizdəki qadın haqlarının təminatı məsələsi
bəzi müsəlman dövlətləri üçün bir modeldir. Bizim ölkədə qadınların cəmiyyətdə
rolu xeyli yüksəkdir. Azərbaycan İslam və müasirliyin vəhdətidir. Hesab edirəm
ki, "İslam Həmrəyliyi İli” fonunda birlik, həmrəylik mövzusunda Azərbaycanın rolu
artacaq, mühüm ölkəyə çevriləcək”.
Şəfa Tapdıq