Ənənəvi təhsilin keyfiyyətini artırmaq üçün ən uyğun element
"Kaspi” liseyləri üzrə akademik rəhbər Sahil
Əliyev: "Distant təhsil alətlərindən daha intensiv istifadə etməyi
planlaşdırırıq”
"Şagirdlər məktəbə nə zaman qayıdacaq?” Hələlik bu
suala heç kim cavab verə bilmir. Koronavirus pandemiyası ilə əlaqədar məktəblilərin
tətili uzansa da, tədris prosesini alternativ platformalarla əvəzləmək
imkanı da yaradılıb.
Demək olar ki, koronavirusla təkcə həkimlər deyil, müəllimlər də mübarizə
aparır. Onlar tədrisi onlayn platformada davam etdirirlər. Ölkənin əksər məktəblərində,
internetə çıxışı olan yerlərdə müəllimlər distant təhsilə keçiblər. "Kaspi”
liseylərini isə distant təhsilin pionerlərdindən adlandırmaq olar."Kaspi”
liseyləri üzrə akademik rəhbər Sahil Əliyevlə söhbətimiz
karantin dövründə şagirdlərin distant təhsilinin həyata keçirilməsi, prosesin
avantaj və disavantajı ilə bağlıdır.
- Sahil müəllim, məktəblər müvəqqəti
tətilə bağlanandan sonra "Kaspi” liseyləri də şagirdlərin geri qalmaması üçün
onlayn resurslardan istifadə edir. Liseylərinizdə distant təhsil bütün sinifləri
və fənləri əhatə edirmi?
- Onlayn təhsil prosesi "Kaspi” liseylərində daha
intensiv pandemiyanın yayılması ilə əlaqədər başlasa da, əslində bu hadisədən əvvəl
"Kaspi” Təhsil Şirkətində onlayn tədris
resurslar və sistemləri mövcud idi. 2015-ci ildən
başlayaraq "Kaspi” Təhsil Şirkəti İKT-nin təhsildə tətbiqi
istiqamətində üç ayrı layihəni ictimayyətə təqdim etmişdi: "Əlifbanı öyrənirəm”,
"Kaspitest.com”
və "Oxu TV” və ya hazırkı adı ilə "Kaspi onlayn TV” "Youtube” kanalımız fəaliyyət göstərirdi.
Bütün siniflər üzrə videodərslər və resurslar bu platformalar vasitəsilə
ictimayyətə təqdim olunurdu. Bu, təkcə "Kaspi” Liseyinin filiallarında təhsilalanlara
deyil, ümumi Azərbaycan təhsilinə dəstək olmaq üçün hazırlanmış layihələrimizdir."Kaspi” Liseyinin e-Kaspi sistemi məktəb yarandığı
vaxtdan fəaliyyət göstərir. Bu sistem uşaqlara uzaqdan tapşırıqlar vermək və
yoxlayıb qiymətləndirmək, eyni zamanda şagirdlərlə kommunikasiya qurmaq üçündür. Bu sistem
liseylər yarandığı gündən fəaliyyət göstərir və daxili auditoriya üçün nəzərdə
tutulmuşdu. Martın 3-dən etibarən məktəblərdə təlim-tədris prosesi dayandıqdan
sonra, Kaspi-də ilkin mərhələdə həm liseylərdə, həm də hazırlıq kurslarında
daha çox yuxarı siniflərdə təhsilalan şagirdləri nəzərə alınaraq, dərslər təşkil olundu. Bu, əvvəlcə
9-11-ci sinifləri əhatə etdi,
abituriyent
kurslarında həyata keçirilən videodərslər formasında oldu. Liseylərdə isə
sinxron – onlayn platforma üzərindən canlı dərslər keçməyə başladıq. Yəni
yaradılan virtual siniflərdə dərs mühitində olduğu kimi müəllim və şagirdlərin
iştirakı ilə dərslər davam etdirildi. Daha sonra tətil müddəti uzandığı üçün
biz prosesin əhatəsini genişləndirdik. Bütün siniflər və əksər fənlər üzrə
sinxron distant təhsilə başlamlı olduq. Hələlik, musiqi, bədən tərbiyəsi kimi bir
neçə fənn var ki, onları tədrisə cəlb etməmişik. Ancaq dil dərsləri, texniki,
humanitar və təbiət fənləri kimi əsas fənlər tədris olunur.
- Şagirdlər bu dərslərdə nə qədər fəal
iştirak edirlər? Bununla bağlı hər hansı müşahidələr aparırsınızmı?
- Əlbəttə, siniflər üzrə şagirdlərin dərslərə cəlb
olunması ilə bağlı qeydiyyat aparırıq. Bununla bağlı pedaqoji heyət ciddi səy
göstərir. İstər-istəməz,
dərsə cəlbolunmada məsuliyyət daha çox valideynin üzərinə düşür. O, övladını kompüterin və ya planşetin arxasında əyləşdirə
bilməli və ona çalışa biləcəyi bir mühit formalaşdırmalıdır. Əgər evdə internet
bağlantısı və ya şagirdin lazımı cihazı yoxdursa, buna bizim kənardan müdaxiləmiz
olmur. Nəzərə alsaq ki, "Kaspi” liseyi özəl məktəbdir, bu istiqamətdə
ciddi problemlərlə qarşlaşmırıq. Distant formada təhsildə belə, şagirdlərimizin dərsdə
iştiraklarına görə gündəlik qeydiyyatı və qiymətləndirilməsi mütəmadi aparılır.
Ümumi deyə bilərəm ki, bu faiz ibtidai siniflər üzrə çox yuxarıdır. Görünür,
azyaşlıların valideynləri onların təhsilində çox maraqlıdır. Yuxarı siniflərdə
də bu faiz kifayət qədər yuxarıdır. Bunun səbəbi 9-11-ci siniflərin buraxılışa hazırlaşması ilə
bağlıdır. Valideynlər də xüsusi maraqlanırlar. 5-8 siniflərdə isə bu göstərici
digər siniflərə nisbətən aşağıdır. Təxminən şagirdlərin 80 faizi onlayn dərslərdə
iştirak edir. Bununla bağlı valideynlərdən gözləntilərimiz var ki, övladlarını
dərs mühiti ilə təmin edib, iştiraklarına dəstək olsunlar.
- Valideynlər
və şagirdlər onlyn platformalardan
istifadə zamanı bəzən texniki problemlər yaşadıqlarından şikayətlənirlər. Məsələn,
Zoom proqramına qoşulmaq çətinliyi var və s. Siz bu cür nasazlıqları necə
aradan qaldırırsınız?
- Təbii ki, distant təhsilin üstünlükləri olduğu
kimi tədris prosesində üzə çıxan müəyyən çatışmazlıqları da olur. Bunlar
xüsusilə texniki problemlərdir. Xüsusilə, hazırda internetdə və distant təhsil
platformalarında eyni vaxtda kütləvi istifadə ilə bağlı yüklənmə səbəbindən müxtəlif texniki
problemlər yaşandı. Ancaq komandamız cevik şəkildə mövcud təhsil
platformalarını araşdıraraq əlavə həllər ortaya qoydu. Artıq "Kaspi” şagirdləri
sinxron (canlı) distant dərslərlə yanaşı, tədris olunan mövzular üzrə əlavə
video dərsləri də platformalarda istənilən vaxda, istədikləri qədər izləyə bilərlər.
Əgər şagird həmin anda dərsə qoşula bilmirdisə, bu o deməkdir ki, həmin dərsi
qaçırmış olurdu. Və yaxud hər hansı texniki nasazlıq yaşanırdısa, o dərsin keyfiyyətinə mənfi təsir
edirdi. Təqdim etdiyimiz yeni sistemdə həm şagirdlərin virtual siniflərə cəlb
olunduğu canlı dərslər keçirilir, həm də bütün siniflər və əksər fənlər üzrə tədris
olunan mövzulara uyğun videomateriallar və onunla əlaqəli testlər, konspektlər
hazırlanır. Bunlar,
şagirdlərə əlçatan olması üçün bir platformaya yerləşdirilir. Bu da imkan verir
ki, şagirdlər müəllimləri ilə müntəzəm əlaqədə olsunlar, başa düşmədiklərini
yenə soruşsunlar. Dərs prosesi zamanı şagirdlərin tapşırqlarda etdikləri səhvlərə
avtomatik cavablar gedir, yenə də hər hansı anlaşılmazlıq olsa, müəlliminə müraciət edə bilirlər.
Şagirdlər bu platformada video və ya rəqəmsal layihələr hazırlama imkanı əldə
edirlər. Yəni müəllim dərsdə şagirdlərin təqdimatını video formatında tələb edə
bilir. Bütün video resurslar yaranmış vəziyyətdə Azərbaycan təhsilinə töhvə
vermək üçün "Youtube” platformasında "Kaspi distant”
kanalında yerləşdirirlir. Tək bir həftədə bizdə Azərbaycan və rus dillərində
bütün fənnlər üzrə 150-ə yaxın onlayn dərslər hazırlanaraq yerləşdirilib ki, bu resurslardan bütün məktəblərin
şagirdləri faydalana bilər.
- Bilirsiniz ki, Təhsil Nazirliyi "Mədəniyyət”
və "ARB Günəş” kanallarında teledərslərə start verib. Bu layihəni necə qiymətləndirirsiniz?
- Nazirliyin layihəsi çox əhəmiyyətlidir və təqdirəlayiqdir.
Xüsusən,
ucqar bölgələrdə yaşayan şagirdlər var ki, onların internetə çıxışı yoxdur və
canlı dərslərə qoşula bilmirlər. Teledərslərin üstünlüyü odur ki, əhatəliyi
genişdir və hər kəsə əlçatanlığı var.Bu tip layihələrin çatışmazlığı şagird-müəllim təmasının və ünsiyyətinin məhdudluğudur.
Real dərs prosesində müəlimin şagirdi və şagirdin müəllimi tanıması çox əhəmiyyətli
məsələdir. Müəllim dərsi izah etdiyi zaman hər bir şagirdin dərsi necə
qavramasına bələd olur. Bu baxımdan, mənfi nüans kimi ortaya çıxan budur ki,
xüsusən,
azyaşlı şagirdlər bir müəllimin metoduna alışırlar, başqa müəllimin verdiyi izahdan bəzən çətinlik çəkə
bilirlər. Eynilə müəllimlər də öz auditoriyasını yaxşı tanıyır və kimin hansı
mövzunu nə qədər qavrdığını hiss edib ona uyğun məlumat verə bilirlər. Bunun
üçün müəllimlərlə şagirdlərin bir-birini tanımağına ekstra vaxt lazım olmur.
Canlı dərslərdə müəllim və şagirdlərin qarşlıqlı ünsiyyət imkanı genişdir, dərsin
gedişatı zamanı şagird nəyisə başa düşmədikdə təkrar soruşa bilir. Bu zaman öyrənmə
keyfiyyəti daha yüksək olur. Eyni zamanda, şagird onlayn keçirilən canlı dərslərdə
daha aktiv dinləyici olaraq iştirak edir. Çünki ona hər an müəllim tərəfindən
sual yönləndirilə bilər. Bu da öyrənməni yaxşılaşdırır.
- Pandemiya
ilə bağlı tətil bitdikdən sonra onlayn dərsləriniz yenə də davam edəcəkmi?
- Əvvəllər də, xüsusən, tətil müddətlərində şagirdlərlə əlaqə
saxlamaq, qeyri-dərs
vaxtları onlara tapşırıqlar göndərmək üçün bu sisemdən istifadə edirdik. Ancaq
hazırkı vəziyyət hər kəs üçün distant təhsillə tanış olmaq imkanı yaratdı. Biz tədrisə yenidən
başlayanda distant təhsil alətlərindən
daha intensiv istifadə etməyi planlaşdırırıq.
- Artıq bütün
dünya bu metodlardan istifadə edir. Bu platformalar üz-üzə məktəb təhsilini nə
qədər əvəz edə bilir?
-Ümumiyyətlə, distant təhsilin üstünlükləri çoxdur.
Ən əsası,
təhsili böyük bir kütləyə açıq və əlçatan etməsidir. Artıq uzun bir müddətdir
ki, internetin geniş yayılması, İKT-nin inkişaf etməsi ilə bu sahədə dünyada
geniş bir trend yaranıb. Bu, istənilən ali məktəbin və professorun dərsinə
qoşulmaq və onun mühazirəsini dinləmək imkanı verir. Afrikada yaşayan bir
şagirdlə ABŞ- da yaşayan bir şagirdin təhsilalmada imkanlar və fürsətlər
baxımından fərqi aradan qalxır.
Əvvəl yaşadığın yer təhsildə mühüm element idi. İndi isə bu platformalar fərqi
azaldıb. Bütün hallarda distant təhsil geniş kütlələrin təhsil almasındakı
coğrafi baryeri aradan qaldırır.Ancaq ənənəvi təhsili əvəz etməyə gəldikdə, xüsusən
məktəb yönündən danışmalı olsaq, bu texnologiyalar hələ ki, məktəblərə alternativ deyil.
Şagirdlər məktəblərdə akademik bilik və bacarlıqlarını inkişaf etdirməklə
yanaşı,
yumşaq bacarıqlarını (soft skills) da inkişaf etdirirlər. Bu, onların sosial,
ünsiyyət bacarıqlarıdır. Qarşlıqlı,
ortaq bir mühitdə yaşamağı öyrənmək bacarıqlarıdır ki, irəlidə onların şəxsiyyət
və peşəkar kimi inkişafında əhəmiyyətli rol oynayacaq. Məktəb, uşaqların həm akademik inkişafına,
həm də sosial inkişafına münbit mühit yaradır. Onlar yoldaşları ilə ünsiyyət
qurmağı - dalaşmağı, razılaşmağı öyrənirlər,
nitqlərini inkişaf etdirirlər. Bunları distant təhsillə tam əvəz etmək və
eyniləşdirmək qeyri-mümkündür. Təhsilin təcrübələr bölməsi var ki, bunu distant
təhsildə həyata keçirmək mümkünsüzdür. Çünki hər kəs evində bir laboratoriya və
ya fiziki tərbiyənin inkişafı üçün idman salonu qura bilməz. Bu baxımdan
düşünmürəm ki, distant təhsil ənənəvi təhsili yaxın gələcəkdə əvəz eləsin.
Yaranmış situasiyada isə distant təhsil texnologiyaları çox əhəmiyyətlidir.
Hazırda bu,
bizim seçimiz deyil, yaranmış vəziyyətdən çıxış yoludur. İnanıram ki, distant təhsil
alətləri hər zaman ənənəvi təhsilin keyfiyyətini artırmaq üçün uyğun bir element olacaq. Məsələn,
evində xəstə olan bir şagirdə dərs keçə biləsən, zəif qavrayan və ya xüsusi
istedadlı şagirdə dərsdən əlavə vaxtda
xüsusi yanaşa biləsən. Bu yöndən distant təhsil hər zaman gözəl bir alət
olaraq qalacaq.
Təranə Məhərrəmova