Əmanətlərin sığortalanmasının yeni mexanizmi
Azərbaycanda əmanətlərin sığortalanması mexanizmlərinin
təkmilləşdirilməsi nəzərdə tutulur."APA-Economics" xəbər verir
ki, bu, 2018-2021-ci illər üzrə iqtisadi və sosial inkişaf konsepsiyası və
proqnoz göstəricilərində sığorta bazarının səmərəliliyinin artırılması və
perspektiv inkişafına yönələn prioritet istiqamət kimi nəzərdə tutulub.
Sənəddə qeyd edilib ki, pul mücrüsü yanaşmasından risk-əsaslı sığorta haqları
sistemi yanaşmasına keçidin təmin edilməsi nəzərdə tutulur.Bundan başqa,
kredit proseslərinin effektiv təşkil olunması məqsədilə geniş funksiyalara
malik kredit bürolarının yaradılması, özəl kredit bürolarının yaradılmasının təşviqi,
onlarla Mərkəzləşdirilmiş Kredit Reyestri arasında məlumat mübadiləsinin
təşkili, milli reytinq agentliklərinin yaradılması imkanlarının
qiymətləndirilməsi, tranzaksiya xərclərinin azaldılması və sürətinin
artırılması məqsədilə milli ödəniş sisteminə inteqrasiya olunmuş qiymətli
kağızların klirinq sisteminin yaradılması, sığortalıların mərkəzi reyestrinin
yaradılması, sığorta sektoru üzrə tənzimləmə və nəzarət mexanizmlərinin
diaqnostikasının aparılması, yeni mexanizmin tətbiqi üzrə tədbirlər planının hazırlanması
və icrası, sığortaçıların maliyyə sabitliyinin təmin edilməsi və ödəmə
qabiliyyətinin gücləndirilməsi, sığorta fəaliyyətində dövlət nəzarətinin
səmərəliliyinin artırılması, maliyyə savadlılığının artırılması
istiqamətlərinin müəyyənləşdirilməsi, pilot layihələrin həyata keçirilməsi,
tədbirlərin icrası və monitorinqi, maliyyə sisteminə dəstəkverici hüquqi
çərçivənin gücləndirilməsi, girov münasibətlərinin hüquqi və təşkilati
bazasının təkmilləşdirilməsi və proseduraların sadələşdirilməsi də prioritet
istiqamətlər kimi müəyyən edilib.
Əmanətlərin sığortalanmasının təkmilləşdirilməsi mexanizmi ilə bağlı
ekspertlərin fikrini öyrəndik.
İqtisadçı Pərviz Heydərov deyir ki,
banklar kreditin verilməsində ən çox əhalinin əmanətlərindən istifadə edir: "Məlum
olduğu kimi, hazırda ölkənin bank sektoru
yaxşı vəziyyətdə deyil. Yəni hazırda fəaliyyət göstərən 31 bankın demək
olar ki, hamısının dövlətin maliyyə dəstəyinə ehtiyacı var. İlk olaraq onu
deyim ki, bu banklar kredit verə bilmirlər. Çünki ölkədə kreditə tələbat aşağı
səviyyədədir. İqtisadi aktivlik yox dərəcəsindədir. İkinci bir səbəb krediti
vermək üçün müvafiq səviyyədə resurslara malik deyillər. Banklar kreditləri
əsasən üç mənbə - xaricdən cəlb etdikləri, Mərkəzi Bankdan aldıqları kredit
resursları və bir də əhalidən əldə etdikləri sərbəst vəsaitlər hesabına
verirlər. Praktika göstərir ki, hələ kreditləşmə yaxşı vəziyyətdə olandan
indiyə qədər banklar kreditin verilməsində ən çox əhalinin əmanətlərindən
istifadə edirlər. 2015-ci ildə bir-birinin ardınca baş verən iki devalvasiya
ilə bağlı manata inamın itməsi, həmçinin ötən müddət ərzində 11-dən çox bankın
bağlanması ilə əlaqədar olaraq, əhalinin banklara inamı olduqca aşağı səviyyədədir.
Bunun birinci əlaməti odur ki, əhali manatla olan əmanətlərini təcili olaraq
dollara çevirdi. İkinci əlamət isə əhalinin əmanətlərini banklardan çəkməsi
oldu. Bununla əlaqədar dövlət məcburi olaraq bir sıra addımlar atdı. Əmanətlərin manatla faiz dərəcəsi 15 faizə
qədər qaldırıldı. Dollarla əmanətlərin
sığortalanmasını isə 3 faizə qədər saldı. Bundan əlavə, əhalinin banklarda
yerləşən əmanətlərinin sığortalanması prosedurasını təkmilləşdirdi. Əgər əvvəl əmanətlər həcmindən asılı olaraq
sığortalanırdısa, indi həcmindən asılı olmayaraq manatla 15 faiz, dollarla 3
faiz qoyulmaq şərti ilə sığortalanır. Bununla belə, yenə də bu sahədə ciddi
təkmilləşmə işinə ehtiyac var. Xüsusən də, əmanətlərin banklara daha yaxşı cəlb
edilməsi üçün müəyyən işlər görülməlidir”.
"Amma
bunun üçün ilk olaraq manata və banklara inamı bərpa etmək lazımdır” deyən
iqtisadçı bu məsələdə bankların hökumətin dəstəyinə bilavasitə ehtiyacı
olduğunu vurğulayır: "Bu gün Azərbaycanda heç bir bank əmanətlərin
sığortalanması prosedurasını özbaşına, istədikləri səviyyədə təkmilləşdirə
bilməzlər. Çünki hazırda bankların o cür imkanı yoxdur. Misal üçün, bir fakt deyim, əgər bank 15
faizlə vətəndaşdan əmanət cəlb edirsə, bu zaman o, faizi ödəmək üçün həmin
əmanətdən istifadə edirsə, krediti neçə faizlə verməlidir? Təbii ki, 20 faizdən
yuxarı olacaq. Belə şəraitdə isə kredit bahalı xarakter daşıyır. Banklar isə
kredit vermədən, kredit resursları ilə fəaliyyət göstərməsə, əmanətlər üzrə
faizləri ödəyə bilməzlər. Mən indi
konkret şəkildə deyə bilmərəm hansı təkmilləşdirmə tədbirləri nəzərdə tutulur.
Amma bu, bütövlükdə bank sektorunun mövcud vəziyyəti ilə bağlı kompleks işlərin
görülməsi ilə həll olunmalıdır”.
İqtisadçı Vüqar Bayramov bildirir
ki, əmanətlərin sığortalanması
mexanizminin təkmilləşdirilməsi əsas hədəflərdən biridir: "Əmanətlərin
sığortalanması mexanizminin təkmilləşdirilməsi
son dövrün gündəmdə olan məsələlərindən biridir. Əvvəlki dövrlərdə müəyyən bir limit vardı. Bu
da əmanətlərin tam olaraq sığortalanmasına imkan vermirdi. Hazırda əmanətlər limitsiz olaraq
sığortalanır. Amma eyni zamanda, təbii ki, əmanətlərin sığortalanması
mexanizminin təkmilləşdirilməsi əsas hədəflərdən biridir. Daha çevik limitlərin
tətbiq edilməsi vacibdir. Bu da, nəticə etibarilə daha çox əmanətlərin
sığortalanmasına gətirib çıxarda bilər. Nəzərə alaq ki, bu gün xarici valyutada
olan əmanətlərin sığortalanma faiz dərəcəsi aşağıdır. Bu, birbaşa manata olan
inamın artırılması ilə bağlıdır. Amma eyni zamanda gələcəkdə limitlərə yenidən
baxılması və dəyişilməsi daha məqsədəuyğun olardı. Nəticə etibarilə, bu, təbii
ki, sığortanın valyuta baxımından keyfiyyətinə təsir göstərə bilər”.
İqtisadçı əmanətlərin
sığortalanma risk dərəcələrinin banklar üzrə fərqli olduğunu deyir: "Elə banklar
var ki, riski aşağıdır. Bu səbəbdən bankların da risk səviyyəsinə görə
qruplaşdırılmasına ehtiyac var. Bu da
imkan verəcək ki, Əmanətlərin Sığortalanma Fondu daha çox vəsait cəlb edə
bilsin. Eyni zamanda, nisbətən riskli və
az riskli əmanətlər üzrə ödənişləri fərqləndirə bilsin. Ümumilikdə Əmanətlərin Sığortalanması
Fondunun maliyyələşmə mexanizminin təkmilləşdirilməsi, nəticədə daha
çox vəsaitin fonda daxil olmasına imkan yarada bilər. Bu da təbii ki,
fondun manevr imkanını genişləndirməsinə şərait yaradacaq. Bu baxımdan,
təkmilləşmə bir tərəfdən özünü fondun gəlir mənbəyinin fərqləndirilməsinə,
digər tərəfdən isə sığortalanan əmanətlərin miqyasının genişlənməsinə gətirib
çıxara bilər. Bu ha da daha çox əmanətin
sığortalanmasına imkan yaradar”.
Günel
Azadə