Elektron xidmət sahəsi - razılıqlar və narazılıqlar
"Elektron Hökumət” - müasir
informasiya texnologiyalarından istifadə etməklə dövlət qurumları tərəfindən Azərbaycan
respublikasının ərazisində yaşayan bütün vətəndaşlara - hüquqi və fiziki şəxslərə,
xarici vətəndaşlara və vətəndaşlığı olmayan şəxslərə informasiya və e-xidmətlərin
göstərilməsinə şərait yaradır. İnkişaf etmiş ölkələrdə vətəndaşlara xidmətin daha şəffaf olmasını şərtləndirən
amillərdən biri də məhz "Elektron hökumət”in formalaşdırılmasıdır.
Bir neçə ildir ki, bu istiqamətdə ölkəmizdə də
geniş şəkildə iş aparılır, vətəndaşlara göstərilən elektron xidmətlərin sayı
ildən-ilə artmaqdadır. Dövlət qurumlarının göstərdiyi xidmətlərdə
elektronlaşmanın qartmasının müsbət tərəfləri çoxdur, bunun hər birimiz yəqin
ki, istifadə edərkən şahidi oluruq. Amma göstərilən elektron xidmətlərdən
narazılıq faizi də az deyil. Belə ki, bu günlərdə Nəqliyyat, Rabitə və Yüksək
Texnologiyalar Nazirliyinin saytında elektron sorğu keçirilirdi. Respodentlər
"Dövlət qurumları tərəfindən göstərilən elektron xidmətlərin səviyyəsi sizi
qane edirmi?” sualına cavab verməliydilər.
Sorğuda iştirak edənlərin 51 faizi "yox” cavabını verib. 26 faizi isə "bəli”
deyib. Digər hissə isə "daha yaxşı ola bilərdi” cavabını verib. Maraqlıdır,
elektron xidmətlərin sayı bu qədər artdığı halda, əhalini narazılığına səbəb
olan faktorlar nələrdir? Narazılığın aradan qaldırılması üçün daha nələrin
edilməsinə ehtiyac var?
"300-400
elektron xidmət var, amma...”
"Multimedia"
İnformasiya Sistemləri Texnologiyaları Mərkəzinin direktoru, Azərbaycan
İnternet Forumunun prezidenti Osman Gündüz "Kaspi”yə açıqlamasında bildirdi ki, ümumilikdə
elektron xidmətlərin, "elektron hökumət”in üstünlüklərinin cəmiyyətə
çatdırılması ilə bağlı problemlər var: "Əvvəllər elektron hökumət quruculuğu
istiqamətində görülən işlər, elektron xidmətlərin sayı az idi. İndi 300-400
elektron xidmət var, amma bunlar elə bil populyar deyil, kütlə tərəfindən
istifadə olunmur və s. Populyar olmamağının isə müxtəlif səbəbləri var.
İnsanların bəzilərinin xəbəri yoxdur, bəziləri kompüter, texnologiyadan istifadə
edə bilmir, yaxud mentalitet səbəbləri və s. mane olur”.
O.Gündüz deyir ki, əgər narazılıq varsa, bu istiqamətə
ciddi araşdırma aparılmalıdır: "Elektron xidmətdən istifadə edərkən problemlə
üzləşən adam təbii ki, bir də ora üz tutmayacaq. Xidmətin keyfiyyətindən
narazılıq varsa, bu, ciddi şəkildə araşdırılmalıdır. Birmənalı şəkildə konkret
diaqnoz qoyub, fikir bildirmək çətin olar”.
"Bu
xidmətlər kompüterdən mobil tətbiqə gəlməlidir”
Müsahibim bildirdi ki, əhalini narazı salan məqamlardan
biri klassik üsulda olan mərhələlərin elektron sistemə gətirilməsidir:
"Doğrudan da, biz dövlət qurumlarının elektron xidmətlərində problemlər
olduğunu müşahidə edirik. Problemlərdən birini deyim. Belə ki klassikdə
"offlayn”da mövcud qanunvericiliyə görə hansısa bir xidməti əldə etmək üçün
tutaq ki 5-ə qədər mərhələ keçmək lazım olurdu. Əvvəl mən hansısa bir dövlət
qurumundan hansısa xidməti almaq üçün hansısa yerə getməliydim, ordan başqa yerə
və s. Sənədləri yığıb xidmət alacağım dövlət qurumuna getməliydim. Elektron
xidmətə keçəndə bəzi xidmətlərdə həmin mərhələlər yenə qalıb. Tutaq ki, mən
hansısa quruma gedib yaşayış yerindən arayış alıb, sonra elektron xidmətdən
yararlanıram. Yaşayış yeri ilə bağlı informasiya dövlət qurumunda varsa, bu
xidməti elektrona çevirəndə təzədən mən həmin arayışı almaq üçün niyə bir də
harasa getməliyəm? Birinci xidmətin özü səliqəyə salınmalı, formata keçəndə
lazımsız mərhələlər aradan qaldırılmalı idi. Bu gün elektron hökumət
quruculuğunda bizdə olan əsas problem bununla bağlıdır. Hüquqi məsələlərlə
bağlı ciddi sadələşdirilmələr aparılmalıdır ki, elektronda da bu, öz əksini
tapsın”.
O.Gündüz deyir ki, dövlət qurumlarının özləri bu
sahədə maraqlı olmalı, öz xidmətlərinin icrasında olan problemlərlə bağlı
monitorinqlər aparmalı, hansı yenilikləri etdikləri ilə bağlı açıqlamalar verməlidirlər.
O, qeyd etdi ki, elektron xidmətlərin çoxunda mobil tətbiqin olmaması da vətəndaşları
narazı salan məqamlardandır: "Bu xidmətlər kompüterdən mobil tətbiqə gəlməlidir.
Bizdə hələ ki, mobil tətbiq üzərindən 5-10 xidmətdən yararlanmaq mümkündür.
Amma qonşu ölkələrdə yüzlərlə elektron xidmətdən mobil tətbiqdən istifadə etməklə
yararlana bilirlər. Çünki insanların əlində telefon var, ona görə daha asan
olaraq xidməti telefondan almaq istəyir. Amma sayta daxil olub xidmətdən
yararlanmaq istəyəndə kompüterdən daxil olması tələb olunduğu yazılır. Bu da müəyyən
narahatlıq yaradır. Ona görə aidiyyəti qurumlar elektron xidmətlərin keyfiyyətinə
nəzarətlə bağlı məsələləri ciddiləşdirməlidirlər”.
"Əhalidə
elektron xidmətlərlə bağlı bacarıq və bilgilərin olmaması...”
Vətəndaş
Cəmiyyəti Problemlərinin Tədqiqi Mərkəzinin rəhbəri Elməddin Hacılı bizimlə
söhbətində bildirdi ki, elektron xidmətləri çox yaxşı olan dövlət qurumları
da var, qənaətbəxş olmayan da: "Konkret ad çəksək, Vergilər Nazirliyinin
elektron xidmətləri çox yaxşı təşkil olunub. Amma bu nazirliyin elektron xidmətlərindən
istifadə edə bilməyənlər, bu işi başqasından görməyi xahiş edənlər də az deyil.
Bu da vətəndaşların həmin elektron xidmətlərlə bağlı məlumatsız olmasıdır. Məsələn
VÖEN-in açılması, bağlanması, rüblük hesabatların təqdim olunması məsələsini
başqalarına etdirirlər. Amma bunlar çox sadə bir şeylərdir və hər kəs özü edə
bilir. Ancaq bütün qurumlara bunu şamil etmək olmaz. Mənin narazılığım Əmək və
Əhalinin Sosial Müdafiəsi Nazirliyinin elektron xidmətlərindəndir. Qurduqları
sistem müasir kompüter proqramı ilə tutuşmur. Sistemləri bəzi kompüterlərdə
açılmır”.
E.Hacılı deyir ki, dövlət
qurumlarının elektron xidmətlərinin təbliği işi çox aşağı səviyyədədir: "Bu
sistemin qurulması əhalinin işini asanlaşdırmaq üçündür. İşin sonrası əhalinin
bundan necə istifadə etməsinə qalır. Amma bu xidmətlər müasir sistemlərə
uyğunlaşdırılsa, daha da təkmilləşdirilsə, təbliğ olunsa, stimullaşdırıcı təkliflər
verilsə, əhali daha çox maraqlanar. Bir çox ödənişlərin həyata keçirilməsində
elektron xidmətlər olduğu halda, əhali poçtda uzun növbə gözləyir. Bu da əhalidə
elektron xidmətlərlə bağlı bacarıq və bilgilərin olmamasından irəli gəlir. Dövlət
qurumlarının elektron xidmətlərini təbliğ etmələri aşağı səviyyədədir. Bircə
Vergilər Nazirliyi bu istiqamətdə iş aparır. Çünki onlar büdcəyə daha çox vergi
cəlb etməkdə maraqlıdırlar. Mənzil İnşaatı Dövlət Agentliyinin də elektron
müraciətlə bağlı elanlarına rast gəlmişəm. Reklam gedəndə əhali bilir ki, hansı
ünvana daxil olmaqla və necə müraciət edəcək. Dövlət qurumlarının elektron xidmətlərindən
tez-tez istifadə etdiyim üçün deyə bilərəm ki, prosedur qaydaları elə də çətin
deyil. Bir az bilik və bacarıq lazımdır”.
193
ölkə arasında 56-cı yer...
Prezident
yanında Vətəndaşlara Xidmət və Sosial İnnovasiyalar üzrə Dövlət Agentliyinin (VXSİDA) İctimaiyyətlə əlaqələr sektorunun müdiri Anar
Hüseynov bizimlə söhbətində bildirdi ki, hazırda
dövlət orqanları tərəfindən həyata keçirilən 640 xidmətdən 351 xidmət elektron
formada da təqdim edilir. Bu rəqəm xidmətlərin elektronlaşma səviyyəsinin çox
yüksək olmasa da, qənaətbəxş olduğunu göstərir. Elektron xidmətlər dövlət
orqanlarının rəsmi veb səhifəsində və elektron hökumət portalında təqdim
edilir.
A.Hüseynov deyir ki, artıq 4 ildir ki Agentlik tərəfindən
elektron xidmətlərin qiymətləndirilməsi aparılır. Qiymətləndirmə zamanı xidmətlərə
müxtəlif bal verilir və təqdim edilmə səviyyəsi müəyyən olunur: "VXSİDA tərəfindən
hər il həyata keçirilən qiymətləndirmə zamanı ötən illərlə müqayisədə "əla” və
"yaxşı” qiymətləndirilmiş xidmətlərin sayı artıb, uyğun olaraq "qeyri-kafi”
qiymətləndirilmiş xidmətlərin sayında azalma qeydə alınıb. Qeyd edilənlər də
dövlət orqanları tərəfindən xidmətlərin təkmilləşdirilməsi ilə bağlı həyata
keçirilmiş tədbirlərin nəticəsində mümkün olub. Aparılan qiymətləndirmə dövründə
VXSİDA tərəfindən verilmiş təkliflər də nəzərə alınmaqla, elektron xidmətlərin
göstərilməsində aparılmış təkmilləşmələr nəzərəçarpan olub. Bunun nəticəsidir
ki, hər iki ildən bir Birləşmiş Millətlər Təşkilatı tərəfindən dünya ölkələrində
elektron hökumətin inkişaf səviyyəsini müəyyən etmək üçün keçirilən sorğuda Azərbaycan
2014-cü illə müqayisədə 2016-cı ildə dünyanın 193 ölkəsi arasında
"Elektron hökumətin İnkişafı İndeksi" üzrə 12 pillə irəliləyərək
56-cı yeri, "Elektron İştirak İndeksi" üzrə isə 30 pillə irəliləyərək,
47-ci yeri tutub. Elektron xidmətlərin təşkili və göstərilmə səviyyəsi üzrə
keyfiyyət göstəricilərində hər il artım müşahidə edilir”.
Həlli zəruri olan məsələlər
Sektor müdiri dedi ki, qiymətləndirmə dövründə bir
sıra dövlət orqanları tərəfindən (Vergilər Nazirliyi, Dövlət İmtahan
Komissiyası, Əmək və Əhalinin Sosial Müdafiəsi Nazirliyi və s.) həyata keçirilən
elektron xidmətlər üzrə yüksək nəticələr qeydə alınıb.
A.Hüseynov bildirdi ki, elektron xidmətlərin göstərilməsində
həlli zəruri olan bəzi məsələlər də vardır: "Qeyd etdiyimiz kimi, bir sıra xidmətlər
hələdə elektronlaşdırılmayıb. İkincisi, bir sıra elektronlaşdırılmış xidmətlərdə
elektron mühitdə mövcud olan məlumatlar vətəndaşdan xidmətə müraciət zamanı tələb
edilir. Misal üçün, bəzi hallarda şəxsiyyət vəsiqəsi məlumatları elektron
mühitdə mövcud olsa da, vətəndaş xidmətə müraciət edərkən şəxsiyyət vəsiqəsi məlumatlarını
əllə daxil etmək məcburiyyətində qalır. Üçüncüsü, xidmətlərdən istifadə edilməsində
elektron imzadan (asan imzadan) istifadə qənaətbəxş səviyyədə deyil. Dördüncüsü
isə bir sıra elektron xidmətin emalı və nəticənin təqdim edilməsi prosesi
elektronlaşdırılmayıb. Yəni bir çox elektron xidmətlərin təkcə sənəd və müraciət
qəbulunu əhatə etdiyi müşahidə edilib. Belə ki, müraciətin emalı və nəticənin təqdim
edilməsi prosesləri elektronlaşdırılmayıb. Bu da öz növbəsində vətəndaşın
müraciətin gedişatı ilə bağlı məlumat ala bilməməsinə və nəticə üçün dövlət
orqanına gəlməsinə gətirib çıxarır”.
Eyni zamanda elektron xidmətlərin göstərilməsində
vahid standartların formalaşdırılması məqsədi ilə Dövlət agentliyi tərəfindən
dövlət xidmətləri ilə bağlı vahid məlumat portalı (http://dxr.az/) yaradılıb. Elektron formada göstərilən dövlət
xidmətləri, xidmətlərin göstərilmə yeri, tələb olunan sənədlər və s. ilə bağlı
məlumatlar portalda öz əksini tapıb. Bu məlumat bazası həm vətəndaşlar həm
akademik dairələr, həm də jurnalistlər üçün çox önəmli bir təhlil vasitəsidir.
Qeyd edək ki, elektron xidmətlərin sayı artır, bu,
çox yaxşıdır. Amma problemin bir səbəbi də əhalinin bu xidmətlərin bəziləri
haqda məlumatsızlığıdır.
Aygün Əhmədova
Yazı Azərbaycan
Respublikasının Prezidenti yanında Kütləvi İnformasiya Vasitələrinin İnkişafına
Dövlət Dəstəyi Fondunun keçirdiyi müsabiqəyə təqdim edilir