Əfsanəvi azərbaycanlının obrazını yaradan serb
Və ya "Maqomayev” serialının görünməyən tərəfləri
Rusiyanın
birinci kanalında (ORT ) görkəmli opera müğənnisi Müslüm Maqomayev haqqında
serial yayımlanacaq. 9-12 mart tarixlərində tamaşaçıları ekran başına
toplayacaq «Maqomayev» serialı 6 ilə çəkilib. Serialın təkcə ssenarisi müğənninin
həyat yoldaşı Tamara Sinyavskaya ilə birgə 4 ilə yazılıb. «Maqomayev təkcə
Rusiya üçün yox, bütün postsovet məkanı üçün böyük fiqurdur və biz bunu öyrənməyə
çalışdıq. Bununla belə, layihəni müasir formada reallaşdırmağa səy göstərdik» -
deyə serialın prodüseri Daniil Şarapov deyib.
Serialdakı
hadisələr 1960-cı illərdə Brejnev epoxasının qızğın vaxtlarında cərəyan edir.
Müslüm Maqomayev konsert proqramının səsyazması zamanı opera müğənnisi Tamara
Sinyavskaya ilə tanış olur. Sovet estradasının kralı ilə doğmaqda olan opera teatrının
ulduzu arasında böyük hisslərin başlanğıcı olacaq qığılcım yaranır. Ancaq o
zaman Tamara evli qadın idi, Müslüm isə subaylığın daşını hələ atmamışdı. Ancaq
tale yenidən sevənləri birləşdirir. Bu dəfə onlar Parisdə görüşürlər…
Niyə məhz Miloş Bikoviç?
Serialda
Müslüm Maqomayev rolunu serb və rus aktyoru Miloş Bikoviç oynayır. Baş rolu
oynadığı «Kölə» filminin uğurundan sonra Maqomayev roluna dəvət alması təsadüfi
olmayıb. Serialın qrim üzrə rəssamının sözlərinə görə, hər dəfə Bikoviçin qrimi
saat yarımdan çox vaxt aparıb. Amma Maqomayevin saç düzümü isə onun
yarıparik və qara saçlı olmasına görə
daha uğurlu alınıb. Aktyorun saç düzümünü o dövrün dəbinə uğurla
uyğunlaşdırmağı bacarıblar. Maraqlıdır ki, estrada əfsanəsinin roluna çəkilmək
üçün keçmiş SSRİ-nin müxtəlif ölkələrindən yüzlərlə istedadlı aktyor sınaqdan
keçirilib. Tamara Sinyavskaya məhz Miloş Bikoviçin seçilməsinin tərəfdarı olub.
Tamara Sinyavskayanın öz rolunu isə 2010-cu ildə «Miss Rusiya» titulunu qazanan
İrina Antonenko oynayır. İrina öz karyerasına 2011-ci ildən başlayıb. Svetlana
Ustinova Maqomayevin vətəndaş nikahında olan arvadını oynayır. Musiqi
proqramlarının redaktoru faktiki olaraq müğənnin prodüseridir. Musiqi və
mahnılar, sözsüz ki, Müslüm Maqomayevin və Tamara Sinyavskayanın öz səsi ilə
ifa olunur. Bu isə filmdə aparıcı rol sayılır. Filmdə «Gözəllik şahzadəsi» ,
«Mavi sonsuzluq», «Toy», həmçinin «Bremen musiqiçiləri» cizgi filmindən
kompozisiya və s. musiqilər səslənir. Rusiyanın özündə də opera əfsanəsinin
roluna məhz 32 yaşlı rus və serb aktyoru Miloş Bikoviçin çəkilməsi böyük maraq
doğurub.
«Ya baş rol, ya heç nə»
Kino və
teatr aktyoru Miloş Bikoviç 1988-ci ildə
Belqradda doğulub. Oğlanın doğmaları milliyyətcə serbdirlər. Onların teatr və
kino dünyası ilə heç bir bağlılığı yox idi. Ancaq incəsənət, ədəbiyyat, rəssamlıq
və teatra ailədə böyük hörmət var idi. Aktyor olmaq istəyi isə gənci yuxarı
siniflərdən cəlb etməyə başlamışdı. Onu Belqrad İncəsənət İnstitutuna gətirən də
bu həvəs oldu. Bu institutda təhsil rus
sistemi üzrə aparılırdı. Miloş institutu bitirəndən sonra Belqrad Milli
Teatrının truppasına daxil oldu. Hazırda Miloş Bikoviç öz ölkəsinin ən məşhur
aktyorlarından sayılır.
Onun
kinematoqrafiyadakı ilk işi ikinci kursda oxuyanda baş tutur. Kurs yoldaşları
ilə filmlərin sınağında iştirak edir. 2004-cü ildən başlayaraq o, kino layihələrində
və seriallarda çəkilməyə başlayır. Bu, ona böyük kinoda təcrübə qazanmaq üçün
lazım idi. Belə məşqlərin birində rejissor, Bikoviçi gözlənilmədən rola dəvət
edir. Artıq özünün gücünə şübhə etməyən Bikoviç «Ya baş rol, ya heç nə» deyərək,
rejissorun qarşısına şərt qoyur. Beləcə, aktyor tarixi bir filmin baş qəhrəmanına
çevrilir.
O,
«Montevideo: Tanrısayağı qarabasma» tarixi filmində oynadığı baş rola görə, təkcə
məşhurluq qazanmır, həmçinin Serbiya kinematoqrafiyasının mükafatlarına layiq
görülür.
Böyük ailə arzusu
Gənc
aktyor həmçinin postsovet məkanı tamaşaçılarının da pərəstişkarına çevrilib.
Rusiyada Bikoviçin uğurları Nikita Mixalkovun «Günəşin zərbəsi» filmindən sonra
başlayıb. Bu filmdəki rolun uğuru ona digər rus filmlərində də çəkilmək imkanı
yaradıb. Beləcə, «Eleon oteli», «İmperiyanın qanadları», «Buz», «Balkan sərhədləri»
və «Kölə» filmlərindən sonra Bikoviçin karyerasının sərhədləri xeyli genişlənib.
Miloş
Bikoviç uzun müddət həsəd aparılası ər statusunda olub. Qeyri-adi dərəcədə gözəl,
cazibədar və məşhur olan artistə qadınlar laqeyd qala bilmir. Üstəlik, o,
istedadlı və ağıllıdır. Jurnalistlər də serb-rus ulduzunu erudisiyasına, mütaliəli
olmasına və intellektuallığına görə sevirlər.
Ancaq Bikoviç üçün şəxsi həyatı haqqında danışmaq
arzuolunmaz mövzudur. Aktyor bu suallardan sakitcə yayınır. Xüsusən tanımadığı
insanlarla öz həyatını müzakirəyə çıxarmağı sevmir. Ancaq böyük ailə arzusunu
gizlətmir. Ən azı 3 uşağının olmasını arzulayır. «Uşaqlarsız həyat boş görünür.
Mənim özümə münasibətdə xüsusi ambisiyalarım yoxdur. Nə isə əldə etmək, sübut
etmək və ya birinci yerə çıxmaq üçün çalışmıram. Nə işlə məşğulamsa, onu davam
etdirmək istəyirəm. Nə iş görürəmsə, onu mükəmməl etməyə çalışıram. Ancaq
uşaqlara görə layihələri qurban verməyə hazıram. Məqsədim özümü yaşayış evi ilə
təmin etmək, ailə qurmaq üçün uyğun - gözəl, ağıllı, xeyirxah və etibarlı həyat
yoldaşı tapmaqdır”.
Rusiya mətbuatı
yazır ki, Bıkoviş cazibədarlığına görə, hətta Rusiyanın tanınmış seks-simvolu
Danil Kozlovskini kölgədə qoyub. 2016-cı ildə Miloş Bikoviç rusiyalı model Saşa
Lus ilə tanış olub. Bir müddət sonra onlar ayrılıblar. 2016-cı ildə Miloş
Aqlaya Tarasova ilə tanış olur. Aktyorlar «Buz» filminin çəkilişlərində öpüş səhnəsindən
sonra daha da yaxınlaşırlar. Onlar gələcək həyatları üçün plan da qururlar.
Moskvada mənzil kirayələyir, hətta bir-birlərinin valideynləri ilə tanış
olurlar. Ciddi münasibətlərə baxmayaraq, Tarasovanın fotosu serb aktyorun
"İnstaqram” səhifəsində görünmür. 2018-ci ilin baharında məlum olur ki, cütlük
ayrılıb.
Həmin il
Miloş serbiyalı model Barbara Tataloviçlə görüşməyə başlayır. Barbara "Serbiya 2011” gözəllik müsabiqəsinin
qalibi idi. Gənclər səyahətlərdə birlikdə vaxt keçirməyi sevirlər.
"Bilirsən Müslüm Maqomayev kimdir?”
2019-cu
ildə Bikoviç «Müslüm Maqomayev” bioqrafik dramında baş rolda çəkilməyə
başlayıb. Tənqidçilər və tamaşaçılar Sovet estrada ulduzunun obrazına görə
aktyorun ustalığını yüksək qiymətləndiriblər. «Bu layihəyə qədər mən Müslüm
Maqomayev haqqında müəyyən məlumatlara malik idim. Düzdür, mən Rusiyada
yaşamamışdım və bu mahnılarla böyüməmişdim» - deyə Miloş etiraf edib: «Əvvəlcə
imtina etmək istədim. Sonra prodüser dostlarım mənə zəng vurdular: «Sən, ümumiyyətlə,
bilirsən Müslüm Maqomayev kimdir? Bilirsən kimin obrazını yaradacaqsan?» Mənim
zahiri oxşarlığım prodüserlərin xoşuna gəlirdi. Mən rola hazırlaşmağa başladım.
Böyük müğənninin müsahibələrinə qulaq asdım, sənədli filmlərinin kadrlarını izlədim.
Ancaq bizə düşünmək üçün vaxt lazım idi: Maqomayev müxtəlif şəraitlərdə necə
görünüb. Məsələn, kamera onu izləyəndə özünü necə aparıb, qəzəbli anlarında necə
olub. Ümid edirəm ki, alınıb. Mən çəkiliş
proseslərində özüm üçün Müslüm Maqometoviçin yaradıcılığını kəşf elədim. O,
mahnıların hər biri özlüyündə gözəldir. Mən xüsusilə «Melodiya»nı qeyd edərdim.
Təbii ki, Müslüm Maqomayevin və Tamara Sinyavskayanın ifasında səslənən
mahnılar serialın daha baxımlı olmasında rol oynayıb. İnanıram ki, film böyük uğur qazanacaq. Mən
milyonların sevimlisi olan Maqomayev rolunu oynadığıma görə özümü xoşbəxt
sayıram”.
Hazırda
Miloş Bikoviç Rusiya kinematoqrafiyasının istehsalı olan məşhur layihələrdə
iştirak etməyə davam edir. «Heç bir rus aktyoru xaricdə ulduza çevrilməyib,
amma serb Bikoviç hamının sevimlisi olub» - deyə soruşanda, aktyor, artıq
postsovet məkanında şöhrət qazandığını etiraf edib. «Dəmir pərdə olanda
Hollivud kino bazarını ələ keçirdi və o vaxtdan bəri bunu təsir kanalı kimi
saxlayır. Amma dünya dəyişir. İnternet platformaları yaranır. Hollivud indi təkcə
yeganə cəzbetmə nöqtəsi deyil. Bax, budur, Rusiyada serbiyalı aktyor baş rolda
oynayır. Həm də təkcə rusları və ya tipik zəmanə qəhrəmanlarının obrazlarını
oynamır. Məsələn, Müslüm Maqomayev kimi
sovet estradasının əfsanəsinin obrazını yaradır. Maqomayev isə azərbaycanlıdır”.
Qeyd edək ki, serialda azərbaycanlı aktyorlar da rol alıblar.
Rusiya mətbuatından
tərcümə etdi
Təranə Məhərrəmova