“Dünya neft içində boğulur”
Dünya bazarında neftin qiymətində baş verən tənəzzül, ardınca milli
valyutaların dəyərdən düşməsi və bu fonda baş verənlər əsas müzakirə
mövzularından birinə çevrilib. Son üç ayda isə enmə nəzərəçarpacaq dərəcədə
qeydə alınıb. Qərb nəşrləri ekspertlərə istinadən yazırlar ki, qiymətlərdə tənəzzülün
müxtəlif səbəbləri var. Bura Neft İxrac Edən Ölkələrdə (OPEC) rekord həcmdə hasilatı,
nəqlin dondurulması ilə bağlı danışıqların nəticəsiz başa çatmasını, bir
vaxtlar ən iri neft idxalçısı olan Birləşmiş Ştatların daxildəki yataqlarında alternativ
yanacaq istehsalını artırmasını və s. daxil etmək olar. Rusiya Mərkəzi Bankının
rəhbəri Elvira Nabiullina ilk dəfə olaraq neftin bir barelinin 25 barelə
düşəcəyi və böhran ssenarisi təhlükəsindən danışıb.
Ötən gün də dünya neft bazarında qiymət ucuzlaşmağa doğru start
götürüb. "Brent” markalı neftin bir bareli 44 dollara kimi enib. Qeyd edilir
ki, neftin qiyməti OPEC ölkələrində nəqlin artırılması barədə xəbərlər fonunda
dəyişir. Beynəlxalq Energetika Agentliyinin yaydığı məlumata görə, OPEC oktyabr
ayında gündəlik nəqli sentyabrla müqayisədə 230 min barel artırıb və hazırda sutkalıq
nəql 33,83 mln. barel təşkil edir. Məlumata görə, neftin qiymətinin aşağı
düşməsində Amerikanın servis kompaniyası - Baker Hughesin də rolu var. Bundan
əlavə, ABŞ neft yataqlarında əlavə buruqların quraşdırılmasını nəinki azaldır,
əksinə, artırmaqda davam edir. OPEC ölkələrinin noyabrın 30-da Vyanada
keçiriləcək toplantısı öncəsi bura daxil olan ölkələrdə nəqlin artırılması baş
verir və bu da bazarda öz təsirini göstərir. Məlumat üçün bildirək ki, sentyabr
ayında OPEC Əlcəzairdə keçirilən qeyri-formal görüşdə gündəlik nəqlin 32,5-33
mln. barel olması barədə qərar qəbul edib. Konkret limitlərin isə noyabrın
30-da tətbiq edilməsi nəzərdə tutulub.
Ekspertlər sammitdə nəqlin azalacağı barədə razılaşmanın əldə
olunacağına ehtiyatla yanaşırlar. Bir sıra analitiklər, konkret olaraq "BMI
Research”in ekspertləri hesab edirlər ki, OPEC üzvləri noyabrın 8-də Donald
Trampın prezident seçilməsi səbəbindən, hər hansı bir saziş imzalaya
bilməyəcək. Səbəb də Trampın Birləşmiş Ştatların energetika müstəqilliyinin
tərəfdarı olmasıdır. "Neft ixrac edən ölkələrin dondurulma barədə bəyanatlarına
artıq heç kim inanmır”, - deyə Bloomberg agentliyi PIRA Energy Group-un icraçı
direktoru Hari Rossdan sitat gətirib. "Əgər sentyabrda OPEC üzvlərinin
bəyanatından sonra neftin qiyməti bir barelə görə 55 dollara çatdısa, noyabrda
bu rəqəm 45-dən aşağı düşüb”, - deyə o bildirib. "Əgər OPEC üzvləri əvvəlkitək
bu mövzu ilə bağlı spekulyasiyaları davam etdirərlərsə və noyabrın sonunda
qərar qəbul etməzlərsə, onda neftin bir barelinin qiyməti 35 dollara kimi
düşməkdə davam edəcək. Neft nəql edən ölkələr sözlərinin üstündə dursalar, onda
qara qızılın qiyməti 60 dollara kimi yüksələ bilər” - deyə Ross vurğulayıb.
"Strong Petroleum”dan olan ekspert Ostin Berençen isə hesab edir ki, bazar OPEC
və digər üzvlərin, o cümlədən Rusiyanın neftin nəqli məsələsində azalmaya
nəzarət edib-etməyəcəyindən asılı olacaq: "Əgər OPEC Vyanada hər hansı bir
qərar qəbul edə bilməsə, onda neftin bir barelinin 35 dollara kimi enməsinin
şahidi olacağıq”.
Bununla yanaşı, qiymətlərin aşağı düşməsinin əsas səbəblərindən biri
və ən əhəmiyyətlisi bazara neftin həddən artıq həcmdə çıxarılmasıdır. OPEC-in
məlumatlarına görə, dünyada xam neftin kommersiya ehtiyatları üçüncü rübün
sonuna kimi 3 mlrd. barelə çatıb. Bu da ilin əvvəlindəki mövcud həcmdən 67 mln.
barel çoxdur. "Dünya həddən artıq neftin içində boğulur. Hətta neft
kompaniyaları Avropanın şimal-qərbində 9
mln. barel həcmində tankerlər bronlayıb. Səbəb yeraltı anbarların tam şəkildə
dolmasıdır”, - deyə Bloomberg yazır. Regionda yerləşən 16 gəmidən 14-ündə neft
saxlanılır. Bunu "Tankers International”ın rəhbəri Conatan Li bildirib. Analoji
vəziyyət Cənubi-Şərqi Asiyada da yaşanıb. "Tankers International”ın məlumatına
görə, Sinqapurda bu gün neftlə dolu 10 tanker saxlanılır. Söhbət özü də
supertankerlərdən gedir və onların hər birində 2 mln. barel neft var. "Dənizdə
neftin saxlanılması artıq icarəyə götürülən gəmilərin qiymətini də artırıb.
İyul ayından bəri qiymətlər iki dəfə artıb”, - deyə "Röyters” yazır.
Analitiklər qeyd edirlər ki, treyderlər diqqətlərini OPEC-in noyabrın sonunda
keçiriləcək toplantısının nəticəsinə yönəldiblər.
Neftin qiymətinin aşağı düşməsi milli valyutalara da təsirsiz ötüşmür.
Artıq rus rublu avro və dollarla müqayisədə xeyli aşağı düşüb. Dollar son üç
ayın maksimum həddinə yüksəlib. Bir ABŞ valyutası 67 rubla çatıb. Ekspertlərin
qənaətincə, dolların möhkəmlənməsi ABŞ Federal Ehtiyat Fondunun dekabr ayı üçün
uçot dərəcəsini artırması ehtimalı və seçkilərin nəticələri ilə bağlıdır. Bəzi
ekspertlər isə yaxın gələcəkdə neftin qiymətinin kəskin azalacağına şübhə ilə
yanaşırlar. "BK Sberejeniya”nın departament rəhbəri Sergey Suverov hesab edir
ki, qiymətlər 40 dollardan aşağı düşməyəcək. "Alor Broker” kompaniyasının
analitiki Kiril Yakovenko da hesab edir ki, neftin əvvəlkitək 48-49 dollara
çatacağının şahidi olacağıq.
"TeleTreyd”in rəhbəri Aleksandr Yeqorov isə hesab edir ki, noyabrın
30-a kimi neftin nəqlinin sutkalıq 33 mln barel həcmində saxlanılması mümkün
olmayacaq. Onun sözlərinə görə, OPEC üzvü və olmayan dövlətlər son aylar
ərzində nəinki nəqli saxlayıblar, əksinə, həcmi artırmaqla məşğul olublar. O,
həmçinin neftin qiymətinin 41-42 dollar həcmində saxlanılacağını da istisna
etmir. "Alfa-Foreks”in departament direktoru Andrey Dirqin bildirib ki, OPEC-in
toplantısı sadəcə bəyanat verməklə sonuclana bilər: "Belə bəyanatların
verilməsi artıq ənənə şəklini alıb. Belə hal aprel sammitində də oldu və
qarşıdakı 30 noyabr sammiti də əvvəlkinin taleyini yaşayacaq”. Əgər yeni
seçilən prezidentin başqa ölkələrdən neft idxalını azaltmaq və ABŞ-ın özündə
neft ixracına qoyulan məhdudiyyətlərin aradan qaldırılması barədə planı
reallaşsa, onda bu, bazarda əlavə gərginlik yaradacaq. "Bazara əlavə şist yanacağı
daxil olacaq, bu da OPEC-in mövqelərinə ciddi təsir edəcək. Belə olan halda,
OPEC həcmi artırmalı olacaq. Deməli, OPEC-dən dondurulmanı gözləməyə dəyməz”, -
deyə Dirqin bildirib. Bu isə o deməkdir ki, "Brent” ucuzlaşmaqda davam edəcək.
Azər NURİYEV