• cümə axşamı, 28 mart, 15:19
  • Baku Bakı 16°C

Deputat: Azərbaycan işğal edilmiş ərazilərimizə qanunsuz səfər edənlərə qarşı sərt mövqeyini davam etdirəcək

13.02.17 10:00 991
Deputat: Azərbaycan işğal edilmiş ərazilərimizə qanunsuz səfər edənlərə qarşı sərt mövqeyini davam etdirəcək
Azərbaycan dövləti işğal edilmiş ərazilərimizə qanunsuz səfər edən şəxslərə qarşı sərt mövqeyini bundan sonra da davam etdirəcək.
Bunu Trend-ə Milli Məclisin deputatı Musa Qasımlı deyib.Deputat bildirib ki, Azərbaycan dövlətinin qanunlarını pozaraq, Ermənistan tərəfindən işğal edilmiş ərazilərimizə səfər edən Aleksandr Lapşinin Belarusda tutularaq ölkəmizə gətirilməsi Prezident İlham Əliyev başda olmaqla, dövlətimizin ilk növbədə, şəhid əsgərimizin nəşinin qaytarılmasından sonra Ermənistana vurduğu ikinci daha ağır zərbədir.
M.Qasımlı bu addımın işğalçı ölkənin beynəlxalq mövqelərinin zəifliyini göstərdiyini söyləyib.
O əlavə edib ki, geniş əks-səda doğuran bu hadisə Ermənistanın ölkəmizə qarşı hərbi təcavüzü nəticəsində yaradılmış Dağlıq Qarabağ münaqişəsində dövlətimizin qəti mövqeyini və qərarlılığını göstərir: "Bu, bir daha onu göstərdi ki, dövlətimiz hansı ölkə vətəndaşı olmasından asılı olmayaraq, qanunlarımızı pozaraq işğal edilmiş ərazilərimizə səfər edən şəxslərə qarşı sərt mövqeyini bundan sonra da davam etdirəcək. Bu addım belə sevdaya düşən digər şəxslərə də bir xəbərdarlıqdır. Nəhayət, bu hadisə Belarus dövlətinin beynəlxalq hüquq normalarından irəli gələn prinsiplərə riayət etdiyinin, Prezident Lukaşenkonun sözü və işinin vəhdət təşkil etdiyinin göstəricisidir".
Qeyd edək ki, ayrı-ayrı dövlətlərin vətəndaşlığını daşıyan A.Lapşin Ermənistan silahlı qüvvələri tərəfındən Azərbaycanın işğal olunmuş ərazilərində yaşayan digər şəxslərlə qabaqcadan əlbir olub cinayət əlaqəsinə girərək, "Azərbaycan Respublikasının dövlət sərhədi haqqında", "Pasportlar haqqında" Azərbaycan Respublikası qanunlarının tələblərini kobud surətdə pozmaqla Azərbaycanın mühafizə olunan dövlət sərhədini müəyyən edilmiş sənədlər olmadan və nəzarət-buraxılış məntəqələrindən kənarda keçərək 2011-ci ilin aprel və 2012-ci ilin oktyabr aylarında işğal olunmuş ərazilərə daxil olmuşdu.
O, qanunsuz rejimin beynəlxalq səviyyədə təbliğ edilməsi məqsədilə internet sosial şəbəkəsində özünə məxsus "http//puerrtto.livejournal.com" səhifəsində səyahət etdiyi dövlətlər arasında Azərbaycan və Ermənistanla yanaşı, Dağlıq Qarabağı da müstəqil dövlət kimi qeyd etməklə, həmçinin 6 aprel və 29 iyun 2016-cı il tarixli müraciətlərində işğal olunmuş ərazilərdə qanunsuz fəaliyyət göstərən rejimin "müstəqilliyini" dəstəkləməklə Azərbaycanın beynəlxalq səviyyədə tanınmış ərazi bütövlüyünün parçalanmasına yönələn açıq çağırışlar edib.
Xarici İşlər Nazirliyi Azərbaycanın işğal olunmuş ərazilərinə qanunsuz səfəri ilə əlaqədar A.Lapşinin adını "arzuolunmaz şəxslər" siyahısına daxil edib.
Bundan əvvəl Azərbaycan Baş Prokurorluğunun məlumatında bildirilirdi ki, bir qrup şəxslə cinayət əlaqəsinə girərək Azərbaycanın işğal olunmuş ərazisinə qanunsuz səfər və dövlət əleyhinə yönələn açıq çağırışlar etdiyi, dövlət sərhədini qanunsuz keçdiyinə görə Belarusda həbs edilən A.Lapşinin ölkəmizə ekstradisiya olunması ilə əlaqədar zəruri tədbirlər davam etdirilir. A.Lapşinin Azərbaycana ekstradisiya edilməsi üçün sənədlər Baş Prokurorluq tərəfindən Belarus hüquq-mühafizə orqanlarına təqdim olunub. A.Lapşinin hərəkətlərində dövlət əleyhinə yönələn açıq çağırışlar və dövlət sərhədini qanunsuz olaraq keçmə əməllərinin tərkib əlamətləri olduğundan Baş Prokurorluğun Ağır Cinayətlərə Dair İşlər Üzrə İstintaq İdarəsində fakta görə, Azərbaycan Cinayət Məcəlləsinin 281.2 (dövlət əleyhinə yönələn açıq çağırışlar) və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi qaldırılıb və barəsində dövlətlərarası axtarış elan edilib.
Belarus Baş Prokurorluğu yanvarın 17-də A.Lapşinin Azərbaycana ekstradisiyası barədə qərar vermişdi. A.Lapşin isə Belarus Baş Prokurorluğunun qərarından apelyasiya şikayəti vermişdi. Ötən gün A.Lapşin Bakıya gətirilib. Bundan əvvəl isə Belarus Ali Məhkəməsi tərəfindən bloqer A.Lapşinin Azərbaycana ekstradisiyası barədə qərardan şikayəti rədd edilib.
banner

Oxşar Xəbərlər