Dallakyan Sarkisyana qarşı
Ermənistanda hakimiyyət daxilində davam edən gərginlik pik həddə
çatıb. Bu dəfə gərginlik Ermənistan prezident administrasiyası rəhbərinin
müavini və prezidentin parlamentdə daimi nümayəndəsi vəzifəsindən istefa
verdiyini bildirən Viktor Dallakyanla bağlı yaşanıb. Vəziyyət o qədər
gərginləşib ki, V.Dallakyan bəyan edib ki, onun, yaxud ailə üzvlərinin başına
hər hansı hadisə gəlsə, "buna görə Ermənistan prezidenti Serj Sarkisyan
məsuliyyət daşıyacaq”. V. Dallakyan artıq istefa ərizəsini təqdim etdiyini və
hakim Respublika Partiyasının (ERP) üzvlüyündən çıxıb, fəal siyasətə qayıtdığını,
2017-ci il parlament seçkilərində iştirak edəcəyini bildirib. "Əgər bugünkü
bəyanatımdan sonra mənim, yaxud ailə üzvlərimin başına hər hansı hadisə gəlsə,
bunun üçün Serj Sarkisyan məsuliyyət daşıyır", - deyə V. Dallakyan deyib.
Yerli mətbuatda V.Dallakyanın istefa verəcəyi haqqında bu ayın əvvəlindən
şayiələr dolaşırdı. "Haykakan jamanak” ("Erməni zamanı”) qəzeti Dallakyanın
"Şırcadats” ("Dönüş”) adlı yeni, "müxalif məkanda fəaliyyət göstərən” partiya
təsis edəcəyi və partiyaya ötən həftə istefaya göndərilən müdafiə naziri Seyran
Ohanyanın sədrlik edəcəyini bildirmişdi. Qəzet sabiq müdafiə nazirinin
prezident Sarkisyandan "küsdüyünü” və istefadan sonra ona təklif edilən
Ermənistan Silahlı Qüvvələrinin baş qərargah rəisi və Milli Təhlükəsizlik
Şurasının katibi vəzifələrindən imtina etdiyi bildirir. "Jamanak” ("Zaman”)
qəzeti isə yazır ki, partiya Yerevanın mərkəzində ofis icarə edib və
informasiya saytını açıb "və bunların hamısı Rusiyadan maliyyələşdirilir”.
İllər öncə V.Dallakyan prezident Sarkisyana müxalif mövqedə olub və onun
"Ermənistanın büdcəsini Monte Karlo kazinolarında israf” etməsi haqqında
bəyanatlar yayıb. Lakin 2012-ci ildə müxalif ritorikasına son qoyub prezident
Serj Sarkisyanın başçılıq etdiyi partiyaya üzv olub, prezident administrasiyası
rəhbərinin müavini və prezidentin parlamentdə daimi nümayəndəsi təyin edilib.
Beləliklə, Ermənistan hakimiyyətində vəziyyət onu deməyə əsas verir
ki, Serj Sarkisyan onun üçün yaranan təhlükədən ehtiyat edərək, kadr
dəyişikliklərinə gedir.
Belə bir fikir formalaşıb ki, yeni baş nazir Karen Karapetyan Robert Köçəryanın
yenidən hakimiyyətə qayıtmasına çalışır. Başqa sözlə desək, ölkədə Robert
Köçəryanın hakimiyyətə qayıdışına hazırlıq gedir. İstənilən halda isə baş
verənlər Ermənistanda yaxın zamanda ciddi hakimiyyət savaşının başlayacağını
göstərir. Özü də ölkədə tək siyasi deyil,iqtisadi müstəvidə də vəziyyət acınacaqlıdır.
"Ermənistan hökumətinin mühüm bir rolu yoxdur, çünki ölkədə iqtisadi
vəziyyət Rusiyadakı iqtisadi fəallıqdan və misin qiymətindən asılıdır”. Bunu
tert.am saytına Ermənistan Milli Konqres Partiyasının Siyasi Şurasının üzvü,
iqtisadçı Vahan Xaçatryan deyib. O əlavə edib ki, Ermənistanın yeni hökuməti
hələlik korrupsiyanın və inhisarçılığın kökünün kəsilməsindən söz salmır: "Əksinə,
onlar deyirlər ki, kiçik iqtisadiyyatlarda monopoliyalar zəruridir. Belə mövqe
cəmiyyətdə çaşqınlıq yaradır. Onlar ya məlumatlı deyillər, ya da belə
bəyanatları məqsədli şəkildə verirlər”.
V.Xaçatryan deyib ki, yeni hökumət iqtisadi rəqabət mühitindən, kiçik
və orta sahibkarlıqdan da söhbət açmır. Bu isə o deməkdir ki, ölkədə heç bir
dəyişiklik baş verməyəcək: "Biz ağır vəziyyətdəyik və bunu bilirik. Onlar bizə
həmişə deyirdilər ki, biz düz danışmırıq. Köhnə hökumətin istefasından 20 gün
keçir, bu müddətdə təzə hökumət yalnız bunu deyib ki, iqtisadi vəziyyətimiz
ağırdır”.
Beynəlxalq Valyuta Fondu(BVF) da erməniləri məyus edən
proqnozlar açıqlayıb. Fondun proqnozlarına görə, qarşıdakı yarım ildə Ermənistanda
iqtisadi artım olmayacaq.
Fondun mütəxəssisləri hesabatlarında həmçinin, işsizliyin artacağına
da diqqət çəkirlər. Qurumun məlumatına görə, 2016-cı ildə Ermənistanda işsizlər
iqtisadi baxımdan fəal əhalinin 17,9 faizini təşkil edir. Növbəti ildə bu rəqəm
artaraq 18 faizə çatacaq.Fondun mütəxəssislərinin fikrincə, Ermənistanda
miqrasiya əvvəlki kimi ciddi problem olaraq qalacaq. Belə ki, Sovetlər
Birliyinin çöküşündən sonra Ermənistanda əhalinin sayı 27 faiz azalıb.
Mütəxəssislərin qənaətincə, qarşıdakı illərdə miqrasiya problemi ölkə
əhalisinin artım tempinə ciddi şəkildə təsir edəcək. Onlar ölkədən əsasən
cavanların və təhsilli insanların getdiyini qeyd edirlər.
Azər NURİYEV