Bütün dövlətlər öz maraqlarından çıxış edirlər
Səudiyyə Ərəbistanı, Bəhreyn, BƏƏ, Misir, Yəmən,
Liviya, Maldiv, Qəmər adaları, Mavrikiy və Seneqal rəsmi Doha ilə diplomatik əlaqələri
kəsiblər. Buna səbəb kimi həmin dövlətlər Qətərin terror təşkilatlarına və
adları qeyd edilən ərəb ölkələrində daxili vəziyyəti gərginləşdirmək üzrə
terrorçuların fəaliyyətlərinə dəstək verməsini göstəriblər. Bu barədə məlumat
yayıldıqdan sonra Türkiyə, Rusiya, Səudiyyə Ərəbistanı liderləri arasında
telefon danışığı olub və onlar Qətər ətrafında baş verənləri müzakirə ediblər.
Vəziyyətin getdikcə gərginləşdiyi bir vaxtda Prezident Rəcəb Tayyib Ərdoğan
Türkiyə və Qətər arasında türk hərbçilərin Qətər ərazisində yerləşdirilməsi barədə
sazişin ratifikasiyası haqqında sərəncam imzalayıb. Qeyd olunub ki, Qətərdə
Türkiyə hərbi bazasının yaradılması 2014-cü ildə ikitərəfli əməkdaşlığın möhkəmləndirilməsi
barədə imzalanmış sazişdə nəzərdə tutulub. Türkiyənin Qətərə hərbi kontingent
göndərmək barədə qərarından sonra Pakistan da analoji qərar qəbul edib. Qərara
görə, Pakistanın Qətərə 20 mindən çox hərbi qulluqçu göndərəcəyi gözlənilir. Bu
qərar isə Pakistan və Türkiyə arasında hərbi sahədə mövcud saziş çərçivəsində qəbul
edilib.
Yaxın Şərqdə cərəyan edən proseslər, Türkiyə və
Pakistanın Qətərə hərbi kontingent yerləşdirməsini "Kaspi”yə şərh edən politoloq Fikrət Sadıxov bildirib ki, rəsmi
Doha ətrafında maraqların toqquşması özünü göstərməkdədir. Onun sözlərinə görə,
Səudiyyə Ərəbistanı başda olmaqla, regionda yerləşən dövlətlərin hər biri öz
maraqlarına cavab verən addımlar atırlar: "Onlar Qətəri təcrid vəziyyətinə
salmaq, bununla da Tehran-Doha münasibətlərinə zərbə vurmaq niyyəti güdürlər.
Çünki ərəb dövlətlərini İranla Qətər arasında olan isti münasibətlər həddən
ziyadə narahat edir. Bununla yanaşı, Qətər ətrafında gərginliyin yaranmasında
enerji amili də özünü göstərməkdədir. Vaxtilə belə bir layihə var idi ki, Qətərdən
Türkiyəyə və Avropaya qaz boru xətti çəkiləcək. Lakin ərəb inqilabları, o cümlədən
Suriyada uzunmüddətli müharibənin başlanması bu layihənin reallaşmasını ləngitdi.
Ola bilsin bu layihənin yenidən bərpa edilməsi gündəmdədir. Son illər Türkiyə
ilə Qətər arasında münasibətlər normal məcrada inkişaf edib. Hər iki dövlət
strateji nöqtədə yerləşir. Türkiyə bir sıra məhsulların Qətərə çatdırılmasında
maraqlıdır. Eləcə də Qətər Türkiyəyə 20 milyard dollara yaxın yatırım edib. Səudiyyə
Ərəbistanı və bir sıra dövlətlərin rəsmi Dohaya qarşı davranışları fonunda
Türkiyə anlayır ki, Qətədəki dayaq nöqtəsi itsə, maraqları zərbə altında qala
bilər. Ona görə də Qətərin yanında olmaq rəsmi Ankara üçün önəmli məsələdir. Məhz
bu kimi səbəblərdən Türkiyə hərbi kontingentinin Qətərdə yerləşdirilməsi barədə
qərar qəbul olunub. Türkiyə kimi Pakistan da öz maraqlarının təmin olunması
üçün analoji addım atıb. Çünki, Pakistan da Qətərlə münasibətlərin inkişaf
etdirilməsində maraqlıdır. Hər iki dövlət arasında iqtisadi, siyasi və digər
sahələrdə yaxşı münasibətlər formalaşıb”.
F.Sadıxov Türkiyə və Pakistanın Qətərdə hərbi
kontingent yerləşdirməsinin təhlükəli tərəfini də şərh edib. Bildirib ki, Yaxın
Şərqdəki narahat vəziyyət, Qətər ətrafında baş verən proseslər, üstəlik Türkiyə
və Pakistanın hərbi kontingent yerləşdirməsi, regiondakı gərginliyi bir qədər də
artıra bilər: "Bu regionda yeni toqquşmaları da istisna etmək olmaz. Bu qədər
dövlət regionda öz maraqlarını açıq şəkildə qabardır, istəklərini yeritmək istəyirlərsə,
bunun sonunun hərbi münaqişə ilə nəticələnəcəyini də gözləmək mümkündür”.
"Atlas”
Araşdırmalar Mərkəzinin rəhbəri, politoloq Elxan Şahinoğlu da hesab edir ki, Türkiyə, Pakistan, Azərbaycan
kimi ölkələr Səudiyyə Ərəbistanı-Qətər münasibətlərinin kəskinləşməsində
maraqlı deyillər və onlar arasında seçim etmək istəmirlər. Onun sözlərinə görə,
bir çox qeyri-ərəb ölkələrin həm Səudiyyə Ərəbistanı, həm də Qətərlə sıx əlaqələri
var: "Türkiyənin Səudiyyə və Qətərlə yaxşı əlaqələri var. Ancaq son vaxtlar Qətər
Türkiyəyə daha çox maraq göstərir. Qətərin Türkiyədə milyardlarla dollar həcmində
kapitalı, sərmayəsi var. Hərbi kontingentin yerləşdirilməsi barədə müraciəti də
Türkiyədən rəsmi Doha edib. Türkiyə tarixində ilk dəfədir ki, ölkədən kənarda -
Qətərdə hərbi baza formalaşdırılır. Bu iki amil nəzərə alınaraq, Rəcəb Tayyib
Ərdoğan Səudiyyə Ərəbistanı istəyir deyə, Qətərlə münasibətləri korlamaq istəmir.
Əksinə, rəsmi Ankara öz davranışları ilə Qətərə mənəvi dəstək verir. İnanmıram
ki, bu davranış Türkiyə Səudiyyə münasibətlərinə hər hansı formada xələl gətirsin.
Fikrimcə, gec-tez Səudiyyə ilə Qətər barışacaq, münasibətlər yaxşılaşacaq. Qətər
ərəb dünyasından kənarda qala bilməz. Qətərin bütün quru sərhədi Səudiyyə Ərəbistanı
ilədir və ərzaq məhsullarının böyük əksəriyyəti bu ölkədən idxal olunur. Qətər
varlı dövlət olsa da, iqlimi imkan vermir ki, bu məhsulları özü yetişdirsin, tədarük
etsin. Ona görə də son hadisələr səbəbindən ölkədə ərzaq qıtlığı indidən
yaşanmaqdadır. Bu kimi reallıqlar nəzərə alınaraq Qətər qarşısında iki şərt
qoyulub. Rəsmi Doha beynəlxalq terrorçulara dəstək verməkdən imtina etməli,
İranla gizli əlaqələrinə son qoymalıdır. İndidən görünür ki, Qətər geriyə doğru
addımlar atır. Rəsmi Doha buna məcburdur. Artıq Qətər "HƏMAS”ın ölkədəki nümayəndəliyini
bağladıb. Bu kimi addımların davamlı olacağına inanıram”.
Rufik
İSMAYILOV