“Bura hamımızın məmləkətidir” - Fotolar
"Azərbaycandan duyğudan başqa heç bir gözləntim
yoxdur. Bu ölkəyə kim xidmət edib və kim xidmət etməyibsə, bu barədə məlumatlarım
var. "Azərbaycana xidmət edir” kimi görünən insanlar da var. Ancaq heç kim mənə
"sən Azərbaycana duyğudan başqa nəiləsə bağlısan”- deyə bilməz. Mənim gördüyüm
işlər hamısı Azərbaycana görədir”. Dünya şöhrətli plastik cərrah, İstanbul
Universitetinin professoru, Doktor İbrahim Yıldırımın bütün qəlbi ilə bağlı
olduğu Azərbaycana budəfəki gəlişi 80 illik yubileyinə təsadüf etdi.
Tibb fəaliyyəti ilə yanaşı,
o, həm də tariximiz, ədəbiyyatımız, folklorumuz, milli mənəvi dəyərlərimizlə
bağlı araşdırmaların müəllifi kimi tanınır. Doktor İ.Yıldırım "Türkiyədə Azərbaycan kültürü”,
"Azərbaycandan Amasyaya daşınan türk kültürü və şirvanlılar”, "Baş üstündə bir
kitabın olması”, "İstanbul Universitetini bitirmiş azərbaycanlılar”, "Amasya
araşdırmaları” və s. əsərləri türk dünyasına təqdim edib. O, həmçinin müxtəlif
dövrlərdə Türkiyə Böyük Millət Məclisinə seçilmişAzərbaycan əsilli millət
vəkilləri, onların siyasi fəaliyyəti haqqında araşdırmalar aparıb.
Doktor
İbrahim Yıldırım Azərbaycana budəfəki səfərində tələbələri, qohumları ilə
görüşdən savayı Atatürk Kültür Mərkəzində də ad günü ilə bağlı düzənlənən tədbirə
qatılıb.
Bütün şəcərəmi yazacam
«Kaspi»nin
dəvətini dəyərləndirən İ.Yıldırım "Mənim
ad günümü qeyd edəcəyim bu məmləkətdən daha gözəl bir yer yoxdur” deyə yubileyi
ilə bağlı bir sirri də açdı: "Türkiyədə doğum günlərim təntənəli surətdə qeyd
edilmir. Bizdə belə bir adət yoxdur. Bəzi böyüklərin ad günləri və yubileyləri
ailəsi tərəfindən və yaxın qohumlar əhatəsində qeyd edilir. Türkiyədə bir adət
də var. Doğumdan sonra zaman sənəddə həqiqi doğum tarixi yazlmır. Bəzi ailələr
övladı hərbi xidmətə tez gedib-gəlsin deyə övladlarının doğum tarixini təxminən
2 yaş böyük yazdırırlar. Mənim də yaşım əslində 80 deyil. O üzdən yaxın
qohumları yığıb 78 yaşımı qeyd etdim» - dedi.
Professor
milli-mənəvi dəyərlərin, ailə tərbiyəsi və təhsilin insan həyatında oynadığı
rola da toxundu: «Əgər bizim ailələrimiz qarmaqarışıq deyilsə, bu xüsusiyyətlərin
həyatımıza böyük təsiri olur. Biz Türkiyədə yetişirkən yaxşı örnəklər almışıq.
Türkiyədə bir uşağı inanmadığı bir şeyə inandıra bilməzsən. 5 yaşlı uşaq da
ayağa qalxıb «bu, belə deyil» deyə bilər. Bu, çox önəmli müstəqillikdir”.
Haqqında
müəyyən araşdırmaların aparıldığı, kitabların yazıldığını söyləyən İ.Yıldırım
ailə ağacının yazılması ilə bağlı planlarından söz açdı: «Mən əslində bütün şəcərəmi
yazacağam. Mənim haqqımda kitablar da çıxıb. Azərbaycandan duyğudan başqa heç
bir gözləntim yoxdur. Azərbaycana kim xidmət edib və kim xidmət etməyibsə, onu
bilirəm. "Azərbaycana xidmət edir” kimi görünən insanlar da var. Ancaq heç kim
mənə "sən Azərbaycana duyğudan başqa nəiləsə bağlısan” deyə bilməz. Mənim
gördüyüm işlər hamısı buna görədir. Həyat yoldaşım da Azərbaycanla bağlı çoxlu
xatirələr toplayıb. Molla Vəli Vidadi və Molla Pənah Vaqif - hər ikisi onun dədəsidir.
Onun atası da tarixçi olub. Ona görə həyat yoldaşımın da zəngin arxivi var. O,
hələ də araşdırmalar aparır”.
İ.Yıldırım
həmçinin millətinin tanınmış, seçilən şəxsiyyətləri ilə bağlı araşdırmalarından
bəhs etdi: «Keçən dəfə Bakıya gələndə Mərdəkana getdim. Şəhər içində dolaşdım.
Trabzonda liseydə oxuduğum zaman Aliyə Aşurbəyli adlı tarix müəllimim vardı. Mən
Aliyə xanımın həyatını araşdırdım. May ayında da həmin liseydə öz müəllimlərimiz
haqqında xatirələrimizi bölüşdük. Mən də Aliyə xanımdan bəhs etdim. O, Sara
Aşurbəylinin xalası qızıdır. Əbdülxaliq bəyin Tiflisdə evi var. Hadisələr
başlayanda 13 nəfər həmin evdə qalmağa gedir. Onlar bir il Tiflisdə qaldıqdan
sonra Batumiyə gedərək 6 ay da orada qalırlar. Daha sonra Trabzona gedirlər.
8-9 yaşlı Aliyə xanım fars, ərəb, fransız dillərini gözəl bilirdi. Onu məktəbə
yazdırırlar. Aliyə xanım bir gün məktəbə getdikdən sonra «Mən daha o məktəbə
getməyəcəyəm» - deyir. Atası Nəsrullah bəy onun üçün evə fərdi müəllim dəvət
edir. Mən onun anasının və xalasının məzarlıqlarının fotosunu çəkdim. Nəsrullah
bəy Azərbaycan nümayəndəsi kimi Türkiyəyə getmişdi. Azərbaycanda vəziyyət dəyişdikdən
sonra da orada qalmışdı. O, erkən vəfat edib. Sara xanım yaşca böyük olduğundan
bacı və qardaşları ilə İstanbul Jandarm Liseyinə yazılır. Aliyə xanımı da «xala
uşaqları ilə oxu» - deyə həmin liseyə yollayırlar. Sara xanım liseyi bitirir.
Bakıdan «burda heç bir şey yoxdur, qayıt gəl»- deyə xəbər gəldikdən sonra Sara
xanım qayıdır. Ancaq Aliyə xanım Trabzona - anasının yanına gedir. O, orta məktəbi
Türkiyə birincisi olaraq bitirir. Kim məktəbi əla bitirirdisə, onu İstanbulun ən
gözəl yataqxanası olan universitetinə göndərirdilər. Aliyə xanım tarix fakültəsini
bitirdikdən sonra əvvəlcə Adanada, sonra Trabzonda müəllim kimi çalışmağa başlayır.
Biz o zaman uşaq idik”. İ.Yıldırım
Bakıya gəlincə Aşurbəylilər nəslinin nümayəndələrini soraqlamasını xatırlayır:
"Aşurbəylilərin yaşadıqları evin fotosunu çəkdim. Onların hekayəsini toplayıb
bir yazı halına salmaq fikrindəyəm. Aliyə xanım bizim hamımızın sevimli müəlliməsi
olub. Mən araşdırmalara onun ulu babası Teymur Aşurbəylidən başladım. Teymur bəyin
ərazisində 24 neft quyusu tapılınca kəndlisinə bütün ərazisini paylayır.
«Əkin-biçin sizin olsun, neft bizim bəsimizdir» - deyir”.
Əli bəy Hüseynzadənin əsərləri
İ.Yıldırım
mənəvi hamisi olduğu Əli bəy Hüseynzadənin qızı Feyzavər xanımdan da həvəslə bəhs
etdi: «Feyzavər xanım 97 yaşındadır. Mən Əli bəy Hüseynzadənin əsərlərini Azərbaycana
bağışlamaq üçün onu razı saldım. Bu gəlişimdə Ədəbiyyat Muzeyinə getdim. Azərbaycan
konsulluğu imza atandan sonra həmin əsərlər Bakıya gətiriləcək. Həmin arxivi ya
Tarix, ya da Ədəbiyyat Muzeyinə verəcəklər. Əsərlər Əli bəyin fotoları, iş
masası ilə bir yerdə olsa, daha yaxşı olar. Ancaq Ədəbiyyat Muzeyi Elmlər
Akademiyasının nəzdindədir. Əsərlərin hansı muzeydə yerləşdiriləcəyi mənə
maraqlıdır. Əli bəyin oğlu Səlim Turan əsərlərini İstanbul Universitetinə
verib. Mən onun həyat yoldaşı ilə görüşdüm. O, «mən onun əsərlərini Azərbaycana
vermək istəyirəm» - dedi. İndi azərbaycanlıların bu məsələyə münasibəti onun
üçün maraqlıdır. Sadəcə, o, qadını inandırmaq lazımdır”.
İ.Yıldırım
alimlərin, tədqiqatçıların bəzi araşdırmalarında mənbələrə əsaslanmadıqlarına,
yanlış məlumatlara yer verdiklərinə də diqqət çəkdi: «Hər kəs araşdırma edə,
maraqlı kitablar nəşr etdirə bilər. Biz universitetdən keçdiyimiz üçün bir tədqiqat
apararkən öncə, nəyə diqqət vermək lazım olduğuna önəm veririk. Qaynaq olmadan
heç bir şey yazmırıq. Bu, çox əsasdır. Bu baxımdan bu, bizim avantajımızdır”.
Biz kimik?
İ.Yıldırım
insanların öz ölkələrini tanıtması üçün öncə milli kimliklərini tanımalarının
vacib olduğunu vurğuladı. "Dünyaya özünü tanıdanlar bilirsiniz kimlərdir -
milli azlıqlar. Onlarda birləşmə hissi daha güclü olur. Kəndlərimiz şəhərləşməyib.
Fizika, riyaziyyat, coğrafiya və digər fənləri öyrənmişik. Ancaq «mən kiməm?»-
deyə öyrənməmişik. Əgər Türkiyə ilə sərhəddə - 500-600 min türkün yaşadığı ərazidə
"ermənilərin ərazisi deyil”, - deyə gizli-gizli silahlanmağı, həmçinin bu fikri
uşaqlara aşılamaqla həyata keçirmək mümkün olsaydı 1988-ci ildə bir gecədə 300
min nəfər o torpaqlardan çıxarılmazdı. Nə itirdik? Qərbi Ermənistanı itirdik.
"Türk milləti yatıb, bir gün qalxacaq”- düşüncəsi yanlışdır. Sovetlər birliyi
qurulmamışdan əvvəl çar Rusiyasında müsəlman olanlardan kimliyi soruşulan zaman
onların milli adını deyil, dini adını tapırlar. 1905-ci ildə yaponlar rusları məğlub
etdiyi zaman çar Rusiyasında «Bir dəyişiklik edək, bu müsəlmanların haqqını da
verək»- deyirlər. Müsəlman tatarları ilk dəfə parlamentə toplanır. Sözçü də
Əlimərdan bəy Topçubaşov olur”.
Türkiyənin gələcəyindən qorxmuram
İ.Yıldırım
ana dilini bilməyin, milli mədəniyyətə sahib olmağın əhəmiyyətindən danışaraq
uşaq ikən ailədə tərbiyənin əhəmiyyətini vurğuladı: "Dünyada bəlli dillər və həmin
dillərin hər bölgədə versiyaları var. Amma Azərbaycanda və ondan kənarda
danışanda «Biz azəriyik» deyirlər. "Azəri” adlı bir millət yoxdur. Bu, Azərbaycan
coğrafiyasından olan insan deməkdir. İranda da «Biz türkük» - deyirlər. Osmanlıdan
bəri Türkiyənin tarixinə nəzər salanda millətləşmə prosesinin tamamlandığını
görürsən. Bu baxımdan Türkiyənin dərdi yoxdur. Qoca bir bölgədə türk kültürü
hakimdir. Türkiyədə bir qisim erməni Ermənistana köçməyə çalışdı. Ancaq 6 ay
orada dayanmayıb geriyə döndülər. Çünki onlar Türkiyə mədəniyyətinin içində
yetişiblər. "Azəri” sözü İran Azərbaycanından çıxan bir sözdür. Sonradan yuxarı
keçib və rusların da işinə yarıyıb, dörd əllə ona sarılıblar. Sonradan ruslar
bunu Türkiyəyə də, ətrafa da satıblar. Anası uşağına nə öyrədirsə, o, önəmlidir.
Bu gün Azərbaycan inkişafdadırsa bunun səbəbi budur. Kimliyi lap uşaq
yaşlarından başa salmaq lazımdır”. İ.Yıldırım bildirir ki, Azərbaycan müharibə
şəraitində yaşadığından burada universitetdə oxuyan tələbələri, xüsusən də
qızları silahdan istifadə edə biləcək səviyyədə hazırlamaq lazımdır: "Dağın
başında kəndlisi də, şəhərlisi də silah istifadə etməyi bacarmalıdır. Başqa çarə
yoxdur. Çünki 9 milyonluq Azərbaycan milyon yarım erməni ilə deyil, böyük güclə
çarpışacaq. Amerika Vyetnamda 3 milyon yarım əsgərdən istifadə etdi. Ancaq
Vyetnam Amerikanı peşman etdi. Amerika bu məğlubiyyəti yaşadı. Bu baxımdan,
yenilməz heç kəs yoxdur. Heç bir güc daimi deyil. Bir gün Türkiyənin əhalisi
çox sürətlə oxuyur və sürətlə yüksəlir. Dünyaya da açıqdırlar. Bu gün
Almaniyada 3 milyon yarım insanımızın 60 min universitet tələbəsi olan uşaqları
var. Almanlar onları assimilyasiya edə bilmədi. Türk millətinin assimilyasiya
olması çox çətindir. Ona görə mən Türkiyənin gələcəyindən qorxmuram”.
İbrahim
bəy Azərbaycanla bağlı atasının ona etdiyi tövsiyəni heç vaxt unutmadığını
deyir: "Mənim bir şansım oldu: Türkiyədə Azərbaycan Cümhuriyyətinin övladlarını
tanıyaraq böyüdüm. Atamın mənə söylədiyi "Edə biləcəyin bir şey var, Azərbaycana
yaxşılıq elə” sözləri həmişə qulağımdadır. Ona görə planımı o istiqamətdə
qurdum. Bura bizim hamımızın məmləkətidir”.
Təranə
Məhərrəmova