Bulaq suyu, dağ havası...
İncəsənət xadimləri rayonlara gediş-gəlişin bərpa
olunması, çimərliklərin açılması
arzusundadırlar
Koronavirus infeksiyasının ölkə ərazisində
yayılmasının, onun törədə biləcəyi fəsadların qarşısının alınması məqsədilə
Nazirlər Kabineti sərtləşdirilmiş karantin rejiminin avqustun 5-ə qədər uzadıldığını
elan edib. Avqustun 5-dən sonra qaydalarda müəyyən
yumşalmaların olması gözlənilir.İncəsənət nümayəndələri Operativ Qərargahın yeni
açıqlamalarında dəniz mövsümünün açılması və bölgələrə gediş-gəlişin bərpa
olunmasını görmək istədiklərini deyirlər. Onlar hesab edirlər ki, çimərliklərdə
və təbiət qoynunda sosial məsafəni qorumaq mümkündür.
"Təhsil
hər şeydən önəmlidir"
Əməkdar artist, rejissor
Ramin Hacıyev qeyd edir ki, karantin rejiminin uzadılması rejissorların iş prosesinə təsirsiz ötüşməyib:
"Operativ Qərargahdan qərar verəndə, vətəndaşların sosial və gündəlik
durumlarını da nəzərə almalarını istərdim. Şəxsən özümə gəldikdə, mən də bu
karantin günlərində çətinliklərlə üzləşdim. Məsələn, sonunu dəfə nə zaman dənizə
getdiyimi, restoran və kafedə oturmağımı unutmuşam. Mənim üçün əsas odur ki,
verilən qərarlar işimi ləngitməsin. Biz hər mövsüm olduğu kimi, yeni mövsümdə də
işimizi davam etdirə bilək. Çox istərdim ki, karantin qaydaları aradan
götürülsün, biz də əvvəlki yaşayışımıza davam edək. Ölkəmiz bu bəladan xilas
olsun. Artıq evdə uşaqlarımız da darıxır. Məktəblərin açılmasını, onların da hər
zamankı kimi təhsillərinə davam etmələrini istəyirəm. Çünki təhsil hər şeydən
önəmlidir".
"Çimərlik insanların ən çox məsafə saxladığı yerdir"
Əməkdar artist, rejissor
Sərvər Əliyev deyir ki, karantin dövründə virusdan qorunmaq üçün
məsafə saxlamaq, maska taxmaq kimi ciddi qaydalara əməl etmək kifayət edir:
"Pandemiya dönəmində dəniz və çimərliklərin açılması məqsədə uyğundur.
İnanmıram ki, dənizə gedən insanlar qumda yan-yana uzansınlar, ya da yan-yana
çimib birlikdə otursunlar. Çimərlik
insanların ən çox məsafə saxladığı yerdir. Hazırda Günəşə böyük ehtiyacımız
var. Hətta imkan olsa, çimərliyə getmək üçün SMS-lə 5 saat zaman verilsin. Çünki
hazırda evlərdə qalan insanlar havasızlıqdan boğulur. Çox insanın evində kondisioneri
də yoxdur".
S.Əliyev alış-veriş mərkəzlərinin açılmasını da lazım bilir:
"Düzdür, bu mərkəzlərdə insanlar çox toplaşır və kütləvi xarakter daşıyır.
İnsanlarımız qorunma qaydalarına riayət etsələr, bu mərkəzlərin açılması da vacib
məsələlərdəndir. Çünki burada çalışan insanlarımız kifayət qədərdir və onların
qazancı yalnız burdandır. Bu insanların əksəriyyəti verilən yardımdan kənarda
qalıblar, ailələrini dolandırmağa imkanları yoxdur. Onların bəziləri ilə mütəmadi
təmasda olduğum üçün bilirəm ki, vəziyyətləri yaxşı deyil. Bunlarla yanaşı,
rayonlara gediş-gəliş açılsa, yaxşı olardı. Belə ki, rayonda insanların
toplaşması üçün ümumi və geniş məkanlar yoxdur. Bura gələn insanlar dağa, meşəyə
gedirlər. İnsanlar gəlib oksigen qəbul edəcəklər. İnanmıram ki, kiminsə xəstəliyi
olduğu halda, bunu gizlədib, qohum-əqrəbalarını yoluxdursun".
"Yaradıcı
insanlar yenə evlərə qapadılmasın"
Rejissor, aktrisa İhamə
Əhmədova bildirir ki, isti yay günlərində dəniz də lazımdır, istirahət mərkəzləri
də: "Bütün bunların hamısı yay mövsümündə insanların tələbatıdır. Yəni
vacib amillərdəndir və hesab edirəm ki, bütün bunlar olmalıdır. İnsanlar dincəlməli
və stress atmalıdır. Ancaq bəzi zəruri ehtiyaclar var ki, onlar daha mütləqdir.
Daha çox istərdim ki, mədəniyyət sahəsində inkişafın nəzərə çarpması üçün müəyyən
addımlar atılsın. Belə ki, yaradıcı insanlar yenə evlərə qapadılmasın. Bizim də
çəkilişlərimiz, tədbirlərimiz olsun. Bundan
başqa, karantin günlərində təhsil sahəsində xeyli gerilədik. Təhsil sahəsində
irəliləyişin olmasını daha çox istərdim".
İ.Əhmədova hər insanın istirahətə ehtiyacının olduğunu və evdə
qalmaqla bu ehtiyacı təmin etməyin mümkünsüz olduğunu vurğuladı: "Mənə elə
gəlir ki, daha çox mədəniyyət və təhsilimizdə irəliləyiş olsa, bizim üçün daha
faydalı olar".
"İsti
qum, sərin su və Günəş şüaları qəbul etdikdə, enerji depolayıram"
Aktrisa Zülfiyyə
Qurbanova deyir ki, sərt karantin
günləri bitdikdən sonra dəniz mövsümünün açılmasını istəyir: "Yay
mövsümünü dənizsiz təsəvvür etmək mümkün deyil.
Sərt karantin rejiminin ləğv olunmasını, çimərliklərin xalqın istifadəsinə
verilməsini istəyirəm. İl ərzində çalışır, yoruluruq. Yayın gəlişini gözləyirik
ki, dənizə gedib günəşlənək. Dənizə hamının ehtiyacı var və mən də hər yay mütəmadi
şəkildə çimərliyə getməyə öyrəşmişəm. Belə ki, isti qum, sərin su və Günəş şüaları
qəbul etdikdə, enerji depolayıram. İnşallah, düşünürəm ki, avqustun 5-dən sonra
Operativ Qərargah vətəndaşlara dənizə getməyə icazə verər".
Z.Qurbanova nəinki dənizkənarı obyektlərin və çimərliklərin
açılmasını, eyni zamanda bağlı qalan iş yerlərinin də açılmasını arzulayır:
"Bağlanmış bütün iş yerlərinin açılmasını, bərpa olunmasını istəyirəm.
Çünki bu karantin maddi olaraq insanları çökdürdü. Belə ki, vətəndaşlarımızın
büdcələrinə xeyli ziyan dəydi. Günəmuzd işləyən insanlarımız var idi ki, onlar
çörək pullarını gündəlik qazanırdılar. Bu karantində onların işləri dayandı və
çox çətin günlər yaşayırlar. Buna görə də istəyirəm, bütün sahələr açılsın. İşlər
yenidən canlansın, insanlar işə çıxsın. Biz öz həyatımıza, normal yaşayışımıza
davam edək".
"Aylardır
evdəyəm"
Aktrisa Səbinə Məmmədova isə karantinin
insanların sağlamlığı üçün nəzərdə tutulduğunu və belə günlərdə yalnız verilən
qərarlara əməl etməyin vacibliyini vurğuladı: "Bununla razılaşmaqdan başqa
çarə qalmır. Mən bu qaydalara tam əməl edirəm. Belə ki, dostlarımla görüşüb,
qohum-əqrəbalarımın evinə getmək kimi risklər almıram. Hər kəs necə, mən də elə
- evdə qalıb, Operativ Qərargahın qaydalarına əməl edirəm. Ancaq bir məsələ də
var ki, təbiətlə təmas, ordan alınan
enerji olması mütləqdir. Ötən gün bir çəkilişə getdim və özümü yuxulu, gücsüz
hiss edirdim. Baxmayaraq ki, aylardır evdəyəm. Avqustun 5-dən çəkilişlərimiz
başlayacaq. Çox güman ki, istirahətə getməyə imkanımız olmayacaq. Çox istərdim
ki, yay aylarında, havaların isti keçdiyi bu həftələrdə dəniz mövsümü
açılsın. Axşamlar dəniz kənarında Günəşin
batmağını, səhərlər Günəşin necə doğmağını izləmək mənə enerji verirdi. Bir də
bağlanan iş yerlərinin açılmasını zəruri hesab edirəm. İş yerləri açılmalıdır
ki, insanlar özlərinə stimul tapsınlar. Maddi gəlirləri də olsun ki, həm də bilet
alıb teatra gəlsinlər".
"Əvvəlki
həyat rejimimizə geri dönmək istəyirik"
Aktyor Türkay Cəfərli deyir
ki, avqustun 5-dən sonra insanların ən çox ehtiyacı olduğu yer dəniz, qum və
idman zalları olacaq: "Çünki insanlar D vitaminindən, Günəşdən, qumdan və
sağlam həyatdan məhrum olub. Bu da təbii ki, insanların immun sisteminin zəifləməsinə
və xəstəliklərin daha tez yayılmasına yol açır. Atoyuma məntəqələrinin əvəzinə,
geyim dükanları da açılsa, pis olmaz. Çünki insanlar da maşınlar qədər təmiz
görünməyə layiqdir. Biz əvvəlki həyat rejimimizə geri dönmək istəyirik".
"İndi
dağ havasına daha çox ehtiyac var"
Aktyor Cavid Telman bildirir
ki, yay mövsümünü isti qumsuz, dənizsiz təsəvvür etmək mümkün deyil. Belə günlərdə
insan ən çox məhz təmiz havaya və dənizə ehtiyac duyur: "Çox istərdim ki,
bu virus məhv olsun. Koronavirusun vaksini tapılsın ki, insanlar artıq bu bəladan
əziyyət çəkməsinlər. Operativ Qərargahdan istəyim budur ki, bütün bağlı olan iş
yerləri açılsın ki, işsizlərin sayı azalsın. Çünki bu insanlar içərisində evdə
xəstəsi, banka borcu, müəyyən ehtiyacları olan insanlar çoxdur. Ən çox da
onları düşünmək lazımdır. Bundan başqa, restoran və kafelər açılsın ki, bu sahədən
daha çox insanlar gəlir əldə edir və çox insan buradan evinə çörək aparır. Yay
mövsümünü dənizsiz təsəvvür etmək qeyri-mümkündür". Aktyor çimərliklərin
açılmasını zəruri hesab edir: "Yayda isti qum, Günəş şüası, dəniz suyu
insanlar üçün şəfalıdır. Bunun çox xeyri var. Yayda 5 gün isti qumda olanda,
qış aylarında mənə çox xeyri olur. Bundan başqa, Operativ Qərargahdan rayonlara
gediş-gəlişin bərpa olunmasını xahiş edərdim. Düzdür, indi yollar bağlıdır. Biz
bunu başa düşürük, amma belə günlərdə insan meşəyə getmək, dağ havası almaq istəyir.
İndi dağ havasına daha çox ehtiyac var".
Xəyalə Rəis