Bu, vicdansızlıqdır! - Fotolar
Brüsseldəki aksiya zamanı çəkilmiş şəkli Azərbaycana aid etməklə polisi hörmətdən salmağa çalışırlar
Özlərini müxalifətçi
adlandıran bir qrup şəxs oktyabrın 19-da Bakı şəhərinin mərkəzi ünvanlarında –
Heydər Əliyev Sarayının qarşısındakı istirahət parkı, Metropolitenin "28 May”
stansiyasının çıxışındakı ərazilərdə icazəsiz aksiya keçirməyə cəhd göstərib. Bu
aksiyanın qanunsuz olması barədə Daxili İşlər Nazirliyi və Baş Prokurorluq
əvvəlcədən məlumat yayıb ictimaiyyəti, o cümlədən təşkilatçıları xəbərdar
etdiyi üçün, həmin gün aksiyanın qarşısı alınıb, ictimai asayişi, vətəndaşların
istirahət hüququnu pozan, polisin qanuni tələblərinə tabe olmayan bəzi şəxslər
hüquq-mühafizə orqanları tərəfindən saxlanılıb. Bundan sonra bəzi media qurumlarında,
sosial şəbəkələrdə paytaxtın mərkəzi hissəsində razılaşdırılmamış və qanunsuz
təşkil edilmiş kütləvi aksiyanın qarşısı alınarkən polis əməkdaşları tərəfindən
güc tətbiq edilməsi barədə əsassız məlumatlar paylaşılıb. Baş Prokurorluğun
yaydığı rəsmi məlumatda bütün bunlar təkzib edilərək qeyd olunub ki, polis
əməkdaşları tərəfindən hər hansı güc tətbiqinə və zorakı hərəkətlərə yol
verilməyib.
Onlayn mediada, sosial
şəbəkələrdə bununla bağlı paylaşılan videolardan da görünür ki, polis
tərəfindən amansızcasına döyülən, təhqir edilən, aldığı zərbədən başı-gözü
partladılan, al qana boyanan, qolu-qılı sındırılan kimsə olmayıb. Asayişi,
vətəndaşların istirahət hüququnu pozan şəxslərin saxlanılarkən hüquq-mühafizə
orqanları əməkdaşlarına müqavimət göstərməsi qarşılığında, asayiş keşikçiləri
onları zorla polis avtobuslarına mindirmək, ərazidən uzaqlaşdırmaq
məcburiyyətində qalıblar. Ola bilsin ki, bu zaman kiminsə ürəyi gedib, halı
pisləşib, həyəcanlanıb və sair. Belə şəxslərə ilk növbədə təcili tibbi yardım
göstərilib, ardınca müvafiq polis bölməsinə aparılaraq, ya izahatları alınaraq
sərbəst buraxılıblar, ya da qanunla müəyyən edilmiş şəkildə cərimələniblər.
Yəni, bir qədər əvvəl vurğuladığımız kimi, hansısa vətəndaşa qarşı polis
qəddarlığı, həmin şəxsin döyülərək fiziki xəsarət alması, qanının axıdılması
halı baş verməyib.
Lakin bununla belə, bəzi
sosial şəbəkə istifadəçiləri, xüsusən də radikal müxalifət cameəsini təmsil
edənlər, həmçinin onların dəstəkçiləri asayiş keşikçilərinin adına ləkə yaxmaq
üçün müxtəlif yalanlara əl atıblar. Belə yalan, dezinformasiya xarakterli
məlumatların birinə başı polis çəkməsinin altında olan qadın fotosu əlavə
edilib və iddia olunub ki, Bakıda polis Azərbaycan qadınına qarşı vəhşilik
edib, onu döyərək başını ayağı altında saxlayıb, işgəncə verib. Radikallar bu
fotonu və ona əlavə edilən məlumatı sosial şəbəkədəki şəxsi profillərində
paylaşaraq Azərbaycan dövləti və onun polisi barədə neqativ rəy formalaşdırmağa
cəhd ediblər. Ancaq həmin fotonu internetdəki axtarış sistemləri vasitəsilə
araşdıranda məlum olub ki, sözügedən fotonun nəinki Bakıda keçirilən aksiyaya,
ümumiyyətlə Azərbaycana aidiyyəti yoxdur. Həmin foto Avropada bir etiraz aksiya
dağıdılan zaman çəkilib.
Mövzu ilə bağlı fikirlərini
"Kaspi” qəzetinə bölüşən siyasi şərhçi
Azər Həsrət bildirib ki, Azərbaycan dövlətinə, o cümlədən qanun
keşikçilərinə qarşı sosial şəbəkələrdə çox iyrənc təbliğat aparılır. Onun
sözlərinə görə, Azərbaycan insanına, xüsusən də polisə xas olmayan görüntülər
davamlı şəkildə paylaşılaraq, beynəlxalq aləmdə ümumilikdə ölkəmiz barədə mənfi
rəy formalaşdırılmasına cəhdlər olunur: "Xaricdə, ən əsası da Avropada "sarı
jiletlilər”in aksiyasında çəkilmiş fotoları montaj edir, guya həmin hadisəni
Azərbaycanda baş veribmiş kimi təqdim edirlər. Həmin şəxslər bu əməlləri ilə
mənəvi aşınmaya məruz qaldıqlarını nümayiş etdirirlər. Azərbaycanda baş
verməyən hadisələri ölkəmizin adına çıxaraq dünyaya car çəkmək, antimilli
təbliğat qurmaq çox vicdansız hərəkətlərə yol verməkdir. Digər tərəfdən, bu
əməl sahibləri öz hərəkətləri ilə tükəndiklərini göstərirlər. Belə ki, bu
insanların ciddi tutarqası olmadığından, real bir fakt üzərindən iqtidara qarşı
tələb irəli sürə bilmədiklərindən, Brüsseldə, Parisdə, Londonda və digər şəhərlərdə
baş verənləri Azərbaycan adından təqdim edir, bu xoşagəlməz kadrları Azərbaycan
polisinin ayağına yazır, guya bununla da müxalifətçiliklə məşğul olurlar. Bu,
cəmiyyət tərəfindən birmənalı surətdə qınanmalıdır. Şəxsən mən də belələrini
qınayıram”.
A.Həsrət bildirib ki,
Azərbaycan polisinə bu cür ləkə atılması ümumilikdə dövlətçiliyə zərbədir. O, bunu
edən şəxsləri ağıllı davranmağa dəvət edib: "Əgər kimsə siyasi mübarizə
aparırsa, bunu etsin, ona kimsə nə isə deyə, irad tuta bilməz. Lakin etik çərçivəyə
sığmayacaq şəkildə, yəni Azərbaycana aidiyyəti olmayan görüntüləri ölkəmizin,
polisimizin adına bağlamaqla "siyasi mübarizə” aparmaq cəhdi yolverilməzdir.
Azərbaycan polisinin Azərbaycan insanına qarşı vəhşilik etməsi, xüsusən də
qadına qarşı belə davranması barədə yanlış ictimai rəy yaratmaq, bunu mövcud
iqtidarla əlaqələndirmək heç bir halda düzgün siyasi mübarizə sayıla bilməz.
Bu, vicdansızlıqdır! Bütün dünya bilir ki, məhz həmin foto Brüsseldə aksiya
zamanı çəkilib. Həmin kadrlarda şiddət, fiziki təzyiq göstərən Belçika polisi
və şiddətə məruz qalan belçikalı – avropalı qadındır. Hesab edirəm ki, bu
görüntüləri "Facebook”da yayaraq onu Azərbaycanla əlaqələndirən şəxsləri
hüquq-mühafizə orqanları üzə çıxarmalı, onlar barəsində məhkəməyə müraciət etməli,
qanun çərçivəsində ölçü götürülməsinə nail olmalıdır. Bu dözülməzdir və qarşısı
mütləq alınmalıdır”.
"Azvision.az”
saytının baş redaktoru Vüsal Məmmədov da bizimlə söhbətində
bildirib ki, sosial şəbəkədə davamlı şəkildə paylaşılan sözügedən foto Azərbaycan
polisinin "vəhşi”, "zorakı” obrazını yaratmağa xidmət edir. Onun fikrincə, aksiyanın
qarşısı alınarkən kimsə hansısa vətəndaşın, aksiya iştirakçısının başının
yarıldığını, qanının axıdıldığını, döyüldüyünü, yaxud onun bədəndə qançır izini
görübmü? Heç kim belə bir halı müşahidə etməyib. Belə olan halda necə iddia
etmək olar ki polis zorakılıq törədib? Zorakılıq bu deyil. Polisin əmrinə tabe
olmayan şəxslər tutularaq avtobuslara mindirilib, aparılıb, bir qədər aralıda
düşürdülüb. Bu, nə zorakılıqdır, nə də vəhşilik. Belə davranış bütün dünyada, o
cümlədən Avropada mitinqlərin dağıdılması praktikasında ən humanist addımdır.
Buna baxmayaraq, ayrı-ayrı şəxslər artıq belə bir tezis ortaya atıblar ki, guya
polis vəhşilik edib. İndi bunu əsaslandırmağa çalışırlar. Lakin bunun üçün
əllərində ciddi bir sübut yoxdur. Ona görə də Avropada mitinqlərin dağıdılması
zamanı polisin aksiya iştirakçılarına qarşı törətdiyi vəhşilikləri əks etdirən
fotoları guya Bakıda olubmuş kimi paylaşmağa başlayıblar. Sosial şəbəkədə gün
ərzində bununla əlaqədar bir neçə fotoya rast gəlmişəm. Ortaya atılan tezis
sübutsuz və boşdur. İndi belə əyri yollarla həmin tezisləri əsaslandırmağa cəhd
edir, yalandan fakt quraşdırmağa çalışırlar”.
Baş redaktor qeyd edib ki, Azərbaycan
haqqında, o cümlədən polis barəsində yanlış təsəvvürün yaradılmasına edilən
cəhdlər əvvəlcədən, hələ mitinqdən öncə planlaşdırılan addımlardır: "Əvvəldən
iki gedişli oyun qurublar. Hər kəs bilirdi ki, mitinq alınası deyil. Bu barədə
hüquq-mühafizə orqanları mitinqdən bir neçə gün əvvəl xəbərdarlıq məlumatı
yaymışdı. Bildirilirdi ki, mitinq razılaşdırılmadığından, qanunsuz xarakter
daşıdığından onun qarşısı alınacaq. Digər tərəfdən, radikal müxalifət icazəli
mitinqə 2 min adam ancaq çıxara bilirsə, icazəsiz aksiyaya heç iki yüz adam
çıxara bilməyəcəyi də öncədən bəlli idi. Ona görə də bu işi planlaşdıranlar
mitinqdən sonra yaradılacaq hay-küyə hesablamışdılar hər şeyi. Bununla bir növ
ideoloji təxribata cəhd edəcəkdilər. Bütün bunları nəzərə alaraq hesab edirəm
ki, mitinqdən sonra ictimailəşdirilən tezislər, fotolar əvvəlcədən düşünülüb. Belə
oyunlar heç zaman kortəbii baş vermir, əvvəlcədən planlaşdırılır”.
Rufik
İSMAYILOV