Britaniya, İtaliya, Danimarkaya olar, bizə yox?
Qərbin Azərbaycana qarşı qərəzli münasibəti, ikili standartlara
söykənən addımları təəssüf ki, yenidən start götürüb. Ölkəmizə qarşı qərəzli
mövqedə olan qurumların təsiri altında olan Avropa Şurası Parlament
Assambleyası növbəti dəfə ölkəmizi hədəf seçib. Azərbaycana qarşı qərəz və
ikili standartlardan yanaşma artıq Qərb qurumlarının prioritet siyasətinə
çevrildiyini elə qurumda təmsil olunan deputatlar da dəfələrlə etiraf ediblər. Hər
dəfə olduğu kimi, bu dəfə də məruzələrin hazırlanmasında erməni lobbisinin
dəsti-xətti aydın görünüb. AŞ PA-dakı Azərbaycan nümayəndə heyətinin rəhbəri Səməd
Seyidovun ifadə etdiyi kimi, "bu gün
AŞPA-da ağa qara demək siyasəti davam edir və qəbul edilən məruzələr
AŞPA-ya utanc gətirən bir sənədlərdir. Hamıya bəllidir ki, Azərbaycan bu quruma
üzv olduğu dövrdən keçən müddət ərzində ardıcıl şəkildə müəyyən lobbi qrupların
və xüsusilə də erməni təəssübkeşlərinin təzyiqi ilə üzləşib”.
Beləliklə, qərəz və ikili standartın bariz nümunəsi olan bir neçə
fakt üzərində dayanaq. Məsələn, Azərbaycana qarşı qəbul edilən qətnamədə
ölkəmizin Avropa İnsan Haqları üzrə Məhkəməsinin (AİHM) qərarlarını icra
etməməkdə günahlandırırlar. Necə olur ki, Avropa Şurasına üzv olan digər ölkələrə
qarşı bu tələb irəli sürülmür? Axı quruma daxil olan 30-a yaxın ölkənin böyük
əksəriyyəti Avropa İnsan haqları Məhkəməsinin qərarlarına ümumiyyətlə əməl etmədiyi
barədə çoxsaylı faktlar var. Avropa Şurası rəhbərliyi hətta bir neçə dəfə açıq
şəkildə bəyan edib ki, Avropa Məhkəməsinin 10 minə yaxın qərarı icra olunmayıb.
Konkret olaraq Böyük Britaniya, ümumiyyətlə bu məhkəmənin qərarlarını yerinə
yetirməkdən imtina edib. Hətta elə ölkə var ki, Avropa Şurasından ümumiyyətlə
imtina edib. Nə üzvlük haqqını verir, nə də İnsan Haqları Məhkəməsini tanıyır.
Halbuki, Azərbaycan çıxarılan qərarların əksəriyyətini icra edib. Buna
baxmayaraq, Avropa Şurasında insan haqlarını bəhanə gətirərək ölkənin
siyasətinə təsir etmək cəhdləri özünü göstərir. İşğalçı Ermənistan Avropa
Məhkəməsinin qərarlarını icra etməkdən boyun qaçırır. Belə olan halda ona qarşı
niyə sanksiyalar tətbiq edilmir? Belə ki, Ermənistan hökuməti Avropa İnsan
haqları Məhkəməsinin indiyə qədər bu ölkənin vətəndaşları ilə bağlı qəbul
etdiyi qərarların böyük əksəriyyətini icra etməyib. Ermənistanla bağlı
şikayətləri Avropa Məhkəməsinə təqdim edən vəkil Ara Kazaryan erməni mətbuatına
müsahibəsində bildirib ki, Ermənistan Avropa Məhkəməsinin qəbul etdiyi qətnamələrin
üçdə ikisini icra etməyib. Onun sözlərinə görə, qərarların icrası 2-3 il belə
gecikməklə qəbul edilir. Tək 2008-ci ildə Ermənistandan 106, 2009-cu ildə 125,
2010-cu ildə 197, 2011-ci ildə 173 və sonrakı ildə 200-ə yaxın şikayət daxil
olub. Məsələn, deputat Zarui Postancyan bildirib ki, ölkə rəhbərliyi hələ də
"A1+” teleşirkəti ilə bağlı qərarı icra etməyib. Halbuki, məhkəmə 2008-ci ildə
rəsmi Yerevanı televiziyanın efir məkanına qayıtmasına icazə verməsi barədə
qərar çıxarıb.
Qərəzli münasibət Türkiyəyə qarşı da nümayiş etdirilir. Məsələn, Azərbaycanla
bağlı Avropa Məhkəməsinin qərarını şərh edərkən türk deputat Nur Günel bildirib
ki, analoji ədalətsiz qərar Türkiyə ilə də bağlı qəbul edilib. Rusiya isə
maraqlı bir qərar qəbul edib. Bu ölkənin prezidenti Vladimir Putin AİHM-nin
qərarlarına əməl edilməməsini nəzərdə tutan qərar qəbul edib. "Nə üçün
Britaniya, İtaliya, Danimarka kimi ölkələr məhkəmənin qərarlarına əməl etməyə
bilərlər, Rusiya isə mütləq əməl etməlidir” - deyə qəbul edilən qərarda
bildirilib. Rusiya Konstitusiya Məhkəməsi isə hakimiyyət orqanlarına AİHM-nin
qərarlarına ümumiyyətlə əməl etməmək barədə icazə verib. Bununla bağlı qərar
məhkəmənin "Yukos” neft şirkəti ilə bağlı Rusiyanın 2 mlrd. avro kompensasiya
ödənilməsi barədə qərarından sonra qəbul edilib. Məlumat üçün bildirək ki,
AİHM-nə edilən müraciətlərdə ilk yerlərdə Rusiya (17 faiz), İtaliya (14),
Ukrayna (14), Serbiya (11), Türkiyə (11) və Rumıniya (6) yer tutur. İtaliya
Senatı isə bir neçə il bundan əvvəl ümumiyyətlə Avropa ölkələrini Avropa
Məhkəməsini lazımsız bir qurum kimi xarakterizə edərək, onun qərarlarına icra
etməməyə çağıran müraciət qəbul edib.
Avropa İnsan Haqları Məhkəməsinin qərarlarına Avstriya, Almaniya,
İtaliya və başqa bir neçə ölkədə də əməl olunmur. Britaniya ona qarşı bu mövzu
ilə bağlı təzyiqlər güclənəndə ümumiyyətlə AİHM-dən çıxacağını bəyan etmişdi.
Rəsmi London bəyan etmişdi ki, əgər Avropa Məhkəməsinin qərarları onun
qanunvericiliyinə zidd olarsa, onda belə bir addım ata bilər. Gürcüstan,
Ukrayna da sözgüdən məhkəmənin qərarlarını icra etməyənlər sırasındadır.
Ukrayna ilə bağlı AİHM-nin bir neçə qərarı hələ də icra edilməmiş qalır.
Kompensasiyaların ödənilməsindən isə söhbət belə getmir.
Başqa bir fakt, Avropa Məhkəməsi miqrantların qanunsuz olaraq
ölkələrin sərhədlərini keçməsinə görə həbsə atılmasını qadağan edən qərar qəbul
edib. Qərarda göstərilib ki, onlar sadəcə öz ölkələrinə deportasiya
olunmalıdırlar. Lakin bu qərara əməl edən yoxdur - miqrantlar həbs olunur və cəzalandırılır.
Məhkəmənin qərarı yalnız Britaniya və İrlandiyaya, o cümlədən Danimarkaya şamil
olunmur – belə ki, onlar Şengen zonasına daxil deyilər.
Yeri gəlmişkən, Danimarka Avropa Məhkəməsinin qərarlarını icra
etməmək hüququn özündə saxlayıb.
Fransa məhkəməsi isə bu günlərdə afrikalı miqrant Selina Affumun həbsi
barədə qərar çıxarıb. Avropa Məhkəməsinin xəbərdarlığına baxmayaraq, Fransanın
hakimiyyət orqanları miqrant xanımı həbsdə saxladılar.
Yekun olaraq onu demək olar ki, beynəlxalq qurumlar hansısa bir qərar
qəbul edəndə ədalət hisini itirməsinlər, obyektiv olsunlar. Və unutmasınlar ki,
siyasətdə "kim güclüdürsə və yaxud pul verirsə, onu müdafiə edək” prinsipini
əsas götürmək onlara başucalığı gətirmir.
Azər NURİYEV