Bir millət, iki dövlət
Azərbaycan ilə Türkiyə arasında əlaqələrin böyük
tarixi var. Ortaq kök, dil, din birliyi, oxşar mədəniyyət, adət və ənənələr bu əlaqələri
şərtləndirən amillər sırasında yer alır. Türkiyə və Azərbaycan öz tarixlərinin ən
mürəkkəb dövrlərində bir-birinə dəstək olduqlarını nümayiş etdiriblər. 1918-ci
ildə Nuru Paşanın komandanlığı ilə Türk Qafqaz İslam Ordusunun uzun mübarizələr
və müharibələr nəticəsində Bakını xilas etməsi Azərbaycan üçün önəmli dönüş
nöqtəsi olub. Azərbaycan xalqının ümummilli lideri Heydər Əliyevin dediyi
kimi:"Türk ordusunun Azərbaycana, Bakıya gəlməsi,Azərbaycanıdaşnakların
təcavüzündən xilas etməsi hər bir azərbaycanlınınqəlbində yaşayır. Azərbaycan
xalqı həmin ağır dövrdə türkxalqının ona göstərdiyi köməyi heçvaxt
unutmayacaqdır”. Anadoluda Qazi Mustafa Kamal Atatürkün öndərliyi ilə
aparılan milli mücadiləyə də azərbaycanlılar maddi və mənəvi yardım göstəriblər.
Hələ Azərbaycan Sovet İttifaqının tərkibində olarkən də iki respublika arasında
rəsmi münasibətlər mövcud olub. 1967-ci ildə Türkiyə Cümhuriyyətinin Baş naziri
Süleyman Dəmirəlin və 1969-cu ildə Türkiyə Cümhuriyyətinin prezidenti Cövdət
Sunayın Bakıya səfərləri bu əlaqələrin xarakterinin müəyyənləşdirilməsində
böyük rol oynayıb.
Azərbaycan 1991-ci ildə öz müstəqilliyini bərpa edəndən
sonra həmin il noyabrın 9-da onu tanıyan ilk dövlət məhz Türkiyə olub. 1992-ci
il yanvarın 14-də Azərbaycan-Türkiyə diplomatik əlaqələri yaradılıb. Bu vaxtdan
etibarən Türkiyənin Azərbaycanda, 1992-ci ilin avqustundan Azərbaycanın Türkiyədə
diplomatik missiyası fəaliyyətə başlayıb. Diplomatik münasibətlərin yaradılması
iki ölkə arasında qarşılıqlı əlaqələrin inkişafında geniş perspektivlər açıb. Hər
iki dövlət qarşılıqlı faydalı əməkdaşlıq prinsiplərini əsas tutaraq ardıcıl
addımlar atmağa başlayıb. Türkiyə müstəqil dövlət quruculuğu yoluna qədəm
qoymuş Azərbaycan Respublikasının səylərini dəstəkləyərək, hərtərəfli əlaqələrin
inkişafına geniş yardım göstərib. Azərbaycanın beynəlxalq aləmlə
inteqrasiyasında, regional təhlükəsizliyin qorunmasında və ümumiyyətlə, ölkəmizin
siyasi-iqtisadi və elmi-mədəni maraqlarının reallaşmasında Türkiyə ilə hərtərəfli
əməkdaşlığın genişlənməsinə xüsusi əhəmiyyət verən Heydər Əliyev 1993-cü ildə
yenidən hakimiyyətə qayıtdıqdan sonra bu istiqamətdə kursun yüksələn xətt üzrə
inkişafını təmin edib.
2003-cü ildə Azərbaycan Prezidenti seçilən İlham
Əliyev də Türkiyə ilə münasibətlərin inkişafına müstəsna diqqət ayırıb. Ötən
dövr ərzində Prezident İlham Əliyev Türkiyəyə dəfələrlə rəsmi və işgüzar səfərlərdə
olub. Eynilə Türkiyə dövlətinin rəsmiləri, rəhbər şəxsləri, o cümlədən
prezidentlər, baş nazirlər dəfələrlə Azərbaycanda səfərdə olublar. Fəxrlə deyə
bilərik ki, Mustafa Kamal Atatürkün "Azərbaycanın sevinci bizim sevincimiz, kədəri
isə bizim kədərimizdir” və Heydər Əliyevin "Biz bir millət, iki dövlətik”
fikirləri artıq həm Türkiyədə, həm də Azərbaycanda iki ölkə arasındakı münasibətlərin
tarixini, bu gününü və perspektivlərini özündə dəqiq ifadə edən ən mükəmməl
formul kimi qəbul edilməkdədir.
Yanvarın 13-də ölkə başçısı İlham Əliyev Türkiyə
Prezidenti Rəcəb Tayyib Ərdoğana təbrik məktubu ünvanlayaraq, Azərbaycan və
Türkiyə arasında diplomatik münasibətlərin qurulmasının 25 illiyi ilə əlaqədar
həmkarını təbrik edib, dost və qardaş Türkiyə xalqına ən xoş və səmimi arzularını
çatdırıb. Məktubda qeyd edilib ki, müstəqil Azərbaycanın tarixində qardaş
Türkiyə diplomatik əlaqələr yaradılan ilk dövlətdir. Xalqlarımız və ölkələrimiz
arasındakı münasibətlərin dərin tarixi köklərə əsaslandığını diqqətə çatdıran
dövlət başçısı bildirib ki, ötən illər ərzində "bir millət-iki dövlət” prinsipi
dünyada bənzəri olmayan Azərbaycan-Türkiyə əlaqələrinin bütün sahələrini əhatə
edib. Prezident vurğulayıb ki, dostluq və qardaşlıq üzərində qurulmuş əlaqələrimiz
bu gün birgə səylərlə strateji müttəfiqlik səviyyəsinə yüksəlib. Ölkə
başçısının sözlərinə görə, Azərbaycan-Türkiyə tərəfdaşlığı xalqlarımızın
rifahına, ölkələrimizin çiçəklənməsinə, regionda əmin-amanlığın və sabitliyin bərqərar
olmasına xidmət edir. Prezident İlham Əliyev təbrik məktubunun sonunda əminliklə
qeyd edib ki, Türkiyə-Azərbaycan birliyi və həmrəyliyi bundan sonra da
xalqlarımızın mənafelərinə uyğun olaraq möhkəmlənəcək və genişlənəcəkdir.
Milli Məclisin
Azərbaycan-Türkiyə parlamentlərarası əlaqələr üzrə işçi qrupunun üzvü, Milli
Dirçəliş Hərəkatı Partiyasının (MDHP) sədri Fərəc Quliyev mövzu ilə bağlı "Kaspi”yə açıqlamasında bildirib
ki, Azərbaycan-Türkiyə münasibətləri digər ölkələrlə münasibətlərdən tamamilə fərqlənir.
Deputatın sözlərinə görə, ölkələrimiz arasındakı münasibətlərə artıq "Bir millət,
iki dövlət” prizmasından yanaşılır. F.Quliyev deyib ki, türkiyə ilə Azərbaycan
sadəcə strateji müttəfiq deyil, qardaş ölkələrdir: "Bu münasibətlərin səviyyəsinə
bir örnək gətirərək qeyd edim ki, Türkiyədə fövqəladə vəziyyət baş verdiyi
zaman Azərbaycanın Fövqəladə Hallar Nazirliyinin əməkdaşlarının bir qrupu heç
bir müraciət, çağırış gözləmədən, dərhal qardaş ölkədə oldular. Təbii ki, bu,
ölkə başçısı İlham Əliyevin göstərişi əsasında olmuşdu. Ümumiyyətlə, bütün ağır
zamanlarda Türkiyə ilə Azərbaycan bir yerdə, çiyin-çiyinə olub, bir-birinə
qarşılıqlı dəstək göstəriblər. Hətta xatırlayıram ki, prezidentlər səviyyəsində
keçirilən mühüm bir toplantıda Ermənistan prezidenti Serj Sarkisyan Türkiyə əleyhinə
əsassız fikirlər səsləndirərkən, Azərbaycan prezidenti İlham Əliyev dərhal buna
reaksiya verdi, "Türkiyə nümayəndəsi toplantıda yoxdur, amma mən burdayam” deyərək,
erməni prezidentə layiqli cavab verdi, onu yerində oturtdu. Mənəvi, insani,
diplomatik baxımdan bütün münasibətlərdə ölkələrimiz arasındakı qardaşlıq özünü
büruzə verməkdədir. Bütün bunlarla yanaşı, Azərbaycanla Türkiyənin özlərindən
asılı olmayaraq, düşmənləri eynidir. Böyük Ermənistan xülyasına qapılan ermənilər
Azərbaycanla yanaşı, Türkiyənin ərazilərinə də əsassız iddialar irəli sürürlər.
Hətta ermənilər saxta soyqırımı üzərindən türkiyəyə qarşı təbliğatlarından da
qalmırlar. Belə olan halda düşmənlərimiz də, mənafelərimiz də ortaqdır. Artıq
açıq şəkildə demək olar ki, Azərbaycan-Türkiyə münasibətləri mədəni, humanitar,
iqtisadi, ticari müstəvidən hərbi-siyasi müstəviyə də keçib. Fikrimcə, bu
istiqamətdə daha dərin inteqrasiya olacaq. Bu, sadəcə müttəfiqlik deyil, gələcəkdə
birgə davranışlar üçün möhkəm təməldir”.
İşçi qrupun
üzvü, Yeni Azərbaycan Partiyası (YAP) Gəncə Şəhər Təşkilatının sədri Naqif Həmzəyev müasir dövrdə Azərbaycanın etibarlı strateji tərəfdaşı
olan Türkiyə ilə münasibətlərin daha da genişləndirilməsini dövlətimizin xarici
siyasətinin çox mühüm tərkib hissəsi kimi qələmə verib. Deyib ki, ötən 25 illik
dövr ərzində hər iki dövlət birlikdə tarixi hadisələrlə zəngin uğurlu yol qət
edərək, gözəl ənənələri yüksək səviyyədə davam etdiriblər. Millət vəkilinin
sözlərinə görə, hər iki ölkənin dövlət başçılarının, eləcə də siyasi, iqtisadi,
ticarət, elm, təhsil, mədəniyyət və digər sahələr üzrə aidiyyəti qurumların rəhbərlərinin
qarşılıqlı səfərləri ikitərəfli əməkdaşlığın inkişafında əhəmiyyətli rol
oynayıb və bütün sahələrdə əlaqələr uğurla inkişaf edərək ölkələrimiz arasında
strateji tərəfdaşlıq münasibətlərinin yüksək səviyyəyə qalxmasına səbəb olub.
N.Həmzəyev bildirib ki, Azərbaycan-Türkiyə münasibətləri həm iki ölkə üçün, həm
də region üçün çox önəmli rol oynayıb, regionda sülhün, sabitliyin, tərəqqinin
təmin olunmasına xidmət edir: "Ümummilli lider Heydər Əliyevin xarici siyasət
kursunda Türkiyə ilə əlaqələrin inkişafına yönəlmiş ardıcıl və məqsədyönlü xətt
Prezident cənab İlham Əliyev tərəfindən yüksək səviyyədə inkişaf etdirilərək,
ikitərəfli siyasi və iqtisadi əməkdaşlığın inkişafında əhəmiyyətli rol oynayıb.
Ölkələr arasında bütün sahələr üzrə əlaqələrin dinamik şəkildə inkişafının göstəricisi
olan qlobal iqtisadi layihələr, o cümlədən Bakı-Tbilisi-Ceyhan neft,
Bakı-Tbilisi-Ərzurum qaz və Bakı-Tbilisi-Qars dəmir yolu layihələri regionda
sülhün və təhlükəsizliyin təmin olunmasına öz töhfəsini verməklə yanaşı,
xalqlarımızın rifah halının yaxşılaşdırılmasına da mühüm təsir göstərib. Bütün
bunları nəzərə alaraq, Azərbaycan və Türkiyə arasında diplomatik əlaqələrin
qurulmasının 25 illiyi münasibətilə mən də xalqımızı və türk qardaşlarımızı təbrik
edir, tarixi qardaşlıq münasibətlərinin, beynəlxalq və regional təşkilatlarda
qarşılıqlı dəstəyin, xalqlarımızın rifahına xidmət edən əlaqələrin daimi
olmasını arzu edirəm”.
İşçi qrupun
digər üzvü, Böyük Quruluş Partiyasının (BQP) sədri Fazil Mustafa da qəzetimizə açıqlamasında deyib ki, Azərbaycan-Türkiyə
münasibətləri ən yüksək səviyyədə müzakirə olunur, hər iki dövlətin maraqlarına
uyğun qərarlar qəbul olunur. Onun fikrincə, bütövlükdə Azərbaycan-Türkiyə
münasibətlərinin inkişafı istiqamətində məsələyə yanaşma daha düzgündür: "Ölkələrimiz
arasında əməkdaşlıq əlaqələrinin mövcudluğu, həmçinin yüksək səviyyəli Şuranın
fəaliyyəti, vaxtaşırı toplanması ümumi gələcək planlarımızın müzakirə olunması
baxımından olduqca faydalıdır. Biz də işçi qrupu olaraq qarşılıqlı şəkildə
Türkiyə tərəfi ilə təmas halındayıq. Bir-birimizə dəstək verməyə davam edirik.
Ölkələrimiz arasındakı münasibətlərin gələcəyinə gəlincə, bu, bizim, yəni hər
iki dövlətin çalışmalarından asılıdır. Bizim maraqlarımız, strateji hədəflərimiz
birdir. Gərək bunu qətiyyətlə davam etdirək”.
Sonda qeyd edək ki, beynəlxalq təşkilatlarda müxtəlif
beynəlxalq və regional məsələlər uzrə Azərbaycanla Turkiyənin mövqeləri çox
yaxındır və ya üst-üstə düşür. Tərəflər regional və beynəlxalq təşkilatlarda məsləhətləşmələr
aparır, bir-birinə qarşılıqlı dəstək verir. Azərbaycan BMT, İKT, NATO, Avropa
Şurası, Qara dəniz İqtisadi Əməkdaşlıq Təşkilatı, Türkdilli Dövlətlər Birliyi kimi təşkilatlar çərçivəsində də Türkiyə ilə
faydalı əməkdaşlıq edir. Türkiyə və Azərbaycan arasında əlaqələrin gücləndirilməsi
Qafqaz bölgəsində sabitliyin təmin edilməsinə yönəlib.
Rufik
İSMAYILOV