Bir-birinə güvəni sonsuz olan cütlük - Ailə
Xəyal
Azəroğlu: "Günay bir az anama oxşadığı üçün məndə maraq oyatdı”
Günay Verdiyeva: "Xəyal
həmişə davranışları ilə mənə dəyərli olduğumu hiss etdirib”
Onlara görə, evliliyin əsas
şərtlərindən biri qarşılıqlı anlayış və güvəndir. Və düşünürlər ki, insan həm
maddi, həm də psixoloji cəhətdən özünü ailə qurmağa hazır hiss etdiyində
evlənməlidir.
"Ailə” rubrikasının bu dəfəki
qonaqları "Azersun
Holding”in İctimaiyyətlə
Əlaqələr departamentinin bölmə müdiri Xəyal Azəroğlu və xanımı keyfiyyətə
nəzarət üzrə mütəxəssis Günay Verdiyevadır. Cütlüyümüzün Azər adında bir
övladı var.
2017-ci ildə təsadüf
nəticəsində qarşılaşan Xəyalla Günay maraqlı tanışlıq hekayəsi bölüşürlər. Eyni
şirkətdə, amma fərqli departamentlərdə çalışmışlar. Xəyal deyir ki, ilk baxışda
Günay diqqətini cəlb edib və elə o vaxtdan onunla maraqlanmağa başlayıb: "Bir
işlə bağlı Günaygilin departamentinə getmişdim, təsadüfən orda gördüm,
diqqətimi cəlb etdi. Xüsusilə də, bir az anama oxşadığı üçün məndə maraq oyatdı
və kim olduğunu araşdırmağa başladım. Bir müddət sonra sosial şəbəkədə dost
olduq. Həmin gündən tez-tez yolumu onların departamentindən salırdım. Hər dəfə
bir bəhanə ilə ora gedib ünsiyyət qurmağa çalışırdım. Düzdür, bir qədər çətin
olsa da, istəyimə çatdım. Müəyyən qədər ünsiyyətimiz var idi, amma tam olaraq
yaxınlaşıb fikirlərimi deməyə cəsarət etmirdim. Bir gün təsadüfən iş çıxışı
turniketdə rastlaşdıq. Demək, mən gedirəm, arxamca da Günay gəlir. Dönüb Günaya
baxa-baxa salam verirdim və bu məqamda turniketə kartı yaxınlaşdırmağı unudub
birbaşa keçdim. Birdən qulağıma nə isə səs gəldi, döndüm ki, turniketi
sındırmışam. Həmin an hamı mənə baxdı, açığı çox utanmışdım (gülür). Ondan
sonra qərara gəldim ki, belə olmaz, gərək hisslərimi açıq etiraf edim. Bir neçə
dəfə işdə qarşısını kəsib danışmaq istədiyimi bildirəndə, dayanmırdı, qaçıb
gedirdi. Gördüm ki, real alınmayacaq, axırda sosial şəbəkədə mesaj yazıb hər
şeyi açıqlayıb, fikrimin ciddi olduğunu dedim. Daha sonra yenə şirkətdə yaxınlaşıb
danışmaq istədiyimi bildirəndə, bu dəfə etiraz etmədi. Sonda görüşməyə razı
oldu və qərarlaşdıq ki, başqa bir məkanda oturub söhbət edək, bir-birimizi
tanıyaq”.
Hisslərini
açıq şəkildə etiraf etməsi xoşuma gəldi
Günay deyir ki, Xəyala iş
yoldaşı kimi yanaşırmış, onların otağına məhz ona görə tez-tez gəldiyini
düşünmürmüş: "Xəyalı işdə bir müddət idi ki, tanıyırdım, amma heç vaxt ağlıma
gəlmirdi ki, mənə qarşı hissləri var. Bir gün iş çıxışı hamı evə gedirdi.
Ayrı-ayrı departamentlərdə olsaq da, çıxış bir qapıdan idi. Necə oldusa,
çıxışda qarşılaşdıq, Xəyal salam verib yanımdan keçdi və turniketə doğru
yaxınlaşdı və həmin hadisə baş verdi (gülür). Ondan sonra artıq mənim diqqətimi
çəkdi və o an dərin duyğular hiss etməyə başladım. O duyğuları hiss edəndə isə,
əks bir düşüncə ağlına gəlmir. Daha sonra sosial şəbəkədən yazıb hisslərini
açıq şəkildə etiraf etməsi də xoşuma gəldi, ona görə tanımaq üçün şans verdim”.
Xəyalı
sevirdim və sevdiyim insanı tanımaq üçün...
İlk görüş
bir çoxları üçün özəl və müəyyən gözləntilərlə dolu olur. Maraqlıdır,
cütlüyümüzün ilk baş-başa görüşü necə keçib? Günay bildirir ki, görüşə gedərkən
artıq Xəyal haqqında olan düşüncələri dəqiq idi: "Görüşə sırf Xəyalla söhbət
etmək üçün getdim. Bəzən insanların beynində müəyyən suallar olur ki, gedim
yoxlayım, görüm necə insandır, mənə uyğundur, ya yox, uyğun olmasa, bir də
görüşmərəm. Bu fikirlərin heç biri məndə yox idi. Mən Xəyalı sevirdim və
sevdiyim insanı tanımaq üçün görüşə getmişdim. Artıq bir müddət idi ki,
birlikdə işləyirdik təxmini necə biri olduğunu anlamışdım. Ona görə görüşə
gedəndə, gözləmədiyim bir davranış tərzi ilə qarşılaşacağımı düşünmürdüm”.
Kilometrlərlə piyada gedərək
Günayın razılığını alandan sonra, cütlük artıq iş
mühitində də birlikdə vaxt keçirir, bir-birini daha yaxından tanıyır. Xəyal
işdən kənar görüşləri zamanı sırf birlikdə daha çox vaxt keçirmələri üçün
Günaygilin evinədək piyada gəzdiklərini deyir: "Günay saat 6-da işdən çıxırdı
və ən geci 1 saat yarıma evdə olmalı idi. Vaxtımızı kilometrlərlə piyada
gedərək dəyərləndirirdik. Bu, həm sağlamlığımız üçün faydalı idi, həm də söhbət
etməyə zamanımız olurdu (gülür). Elə vaxt olurdu ki, restoranda oturub yemək
yeyirdik, kafedə qəhvə içirdik. Yəni maksimum dərəcədə zamanımızı səmərəli
keçirməyə çalışırdıq. Onu da deyim ki, söhbətimiz sadəcə sevgi, eşq, ailə
mövzusunda deyildi. Hər mövzudan danışa bilirdik. Beləcə, bir-birimizi tam
tanımaq şansımız oldu”.
- Bəs, iki insan ailə
qurmaq üçün bir-birilərini nə qədər müddət və necə tanımalıdırlar?
Xəyal: Bu,
insandan asılı olaraq dəyişir. Elə biri ola bilər ki, onu ilk görüşdən, söhbətdən
necə xarakterə sahib olduğunu anlayarsan, bəzən isə aylarla da danışsan, tanıya
bilmərsən. Mən Günayı ilk görüşdən tanıdım. Çünki ürəyində olan dilində, üzündə
idi. Amma konkret zamana gəlincə isə, təxmini bir neçə aya tanımaq olar. Bir məqamı
da qeyd edim ki, insanın davranışı dəyişir, amma xarakteri yox.
Günay: Məncə
də, müddət anlayışı yoxdur. Ailə çox müqəddəsdir. İnsanlar bu mövzuya
saxtakarlıqla yanaşmamalı, özlərini bir-birinə olduqları kimi tanıtmalıdırlar.
Bəzən insanların evlilik həyatından gözləntiləri fərqli olur. Bu zaman da
cütlüklər arasında anlaşmazlıq yaranır. Ona görə, bir-birilərini yaxşı tanımalı
və tanıtmalıdırlar.
- Maraqlıdır, siz
evlilikdən sonrakı dövrdə bir-birinizdə nələri kəşf etdiniz ki, sevgililik dönəmində
bunu bilmirdiniz?
Günay: Söhbətin
əvvəlində Xəyal məni anasına oxşatdığını və münasibətimizin yaranmasında bu
oxşarlığın da müəyyən dərəcədə rol oynadığını qeyd etdi. Əslində, bu, qızlarda da
belədir. Öz həyat yoldaşlarında atalarına aid nə isə axtarırlar. Xəyalda da
atamdakı kimi ailəyə bağlılıq hissinin olduğunu duydum. Yəni, evlilikdən sonra mən yox, biz olduq. Xəyalda
olan ailəcanlılığı, bölüşmək duyğusunu evləndikdən sonra gördüm və bu mənim
üçün çox dəyərlidir.
Xəyal:Günayın çox sual vermə bacarığını kəşf etdim (gülür). Əslində, bu, başadüşüləndir.
Çünki universitetdən sonra yenicə iş həyatına atılmışdı ki, ailə qurduq və ev
işlərinə aid bir çox şeyi bacarmırdı. Nə yemək bişirməyi, nə evin təmizliyini
necə edəcəyini bilmirdi. Mən evlənməmişdən öncə uzun müddət tək yaşadığım üçün
bunları bilirdim və yavaş-yavaş Günaya da öyrədirdim. Demək, olar ki, hər şeyi
soruşurdu. İndi hər işi məndən yaxşı görür. Onu deyim ki, ailə həyatı mənə də
özümü kəşf etmək şansı verdi. Anladım ki, həqiqətən ailəyə bağlı insanam.
Övladım və onun gələcəyi haqqında düşünməyə başladım.
- Gənclərimizin bir
çoxu evlilik təklifini maraqlı sürpriz şəklində edir. Sizdə bu proses necə
oldu?
Xəyal: Heç
vaxt belə nüanslara önəm vermirəm. Mən münasibətin ilk günündən məqsədimin
evlilik olduğunu Günaya demişdim və biz evlilik yolunda irəliləyirdik. Bir də
niyə "mənimlə evlənərsən?” sualını verim ki? Yəni təntənəli nə isə etməyə
ehtiyac duymadım.
Günay: Əslində,
heç vaxt qırmızı gül, şar, hədiyyə həvəsində olmamışam və belə bir gözləntim də
yox idi. Amma Xəyal həmişə davranışları ilə mənə dəyərli olduğumu hiss etdirib.
- Xəyal bəy aktiv
"facebook” istifadəçisi olmağına baxmayaraq, sizin profiliniz yoxdur. Bu, sizdə
qısqanclıq hissi yaratmır? Yəni heç olubmu, "facebook” profilinə daxil olaraq fəaliyyətini izləyəsiniz?
Günay: Xeyir,
elə bir qısqanclıq hissim olmayıb. "Mənim profilim yoxdur, səndə niyə var?”
fikri də yaranmayıb. Çünki Xəyalın "facebook” səhifəsindən mən də istifadə edirəm. Bu, qətiyyən onun fəaliyyətini,
kimlərlə danışdığını yoxlamaq məqsədi ilə olmur. Məsələn, mən onun telefonun
kodunu bilmirəm. Təsadüfən kompüterdə açıq olanda və ya telefonda paylaşımlara
birlikdə baxanda, nələrisə görürəm. Sosial şəbəkədən isə özüm könüllü şəkildə
imtina etmişəm. Bu seçimimdə Xəyalın rolu yoxdur və bunun əskikliyini də hiss
etmirəm.
Xəyal: Mənim
nə instaqram, nə də feysbuk parolumu Günay bilmir. Çünki buna ehtiyac yoxdur,
evə gəldim telefonum göz qabağında olur. Mənim profilimdən də ortaq istifadə
edirik. Onun üçün nə isə maraqlı olanda, mənim profilimlə daxil olub istədiyi məlumatı
əldə edə bilər.
- Amma, etiraf etmək
lazımdır ki, günümüzdə gənclər arasında yaranan münaqişələrin bir hissəsi də sırf
bu sosial şəbəkə kodu ucbatındandır. Sizcə, bu nədən irəli gəlir?
Günay: Sırf
səthi düşüncənin göstəricisidir. Bunun başqa bir açıqlaması ola bilməz.
Xəyal: Bu,
artıq qısqanclıq deyil, güvənsizliyin əlamətidir. Məsələn, heç bir profilimin
kodunun Günayda olmamağı o demək deyil ki, nə isə problem var. Nədənsə, bu
mövzulara pis baxıram. Müasir dövrdə yaşayırıq. İkimizin də votaspı var. Mən
işlə bağlı xanımlarla danışa bilərəm. Günay da bilir ki, bu, mənim işimdir. Nə
mən, nə də Günay hələ bu vaxtadək bir-birimizin telefonunu götürüb yazışmalara
baxmamışıq. Aramızda sözləşmişik ki, evdə mobil telefonla məşğul olmayaq. Daha
çox bir-birimizlə vaxt keçiririk, söhbət edirik, oğlumuzla oyunlar oynayırıq.
Maraqlıdır, münasibətinizdə
ən çox güzəştə gedən tərəf kim olur?
Xəyal: Günay
(gülür).
Günay:Açığı, evləndikdən sonra elə də ciddi problemimiz olmayıb. Sadəcə, gündəlik
xırda məişət problemi yaşanır. Xəyal çox emosional insandır, tez reaksiya
verir. Həmin məqamlarda isə mən güzəştə gedirəm.
- Son olaraq gənclərə
tövsiyələriniz nələrdir?
Xəyal: Belə
bir deyim var ki, subaylıq sultanlıqdır. Həqiqətən də elədir, amma bəlli bir
yaşa qədər. Elə gənclərimiz var ki, 20-21, bəziləri isə 25 yaşdan sonra evlənir.
Gənclərə tövsiyə edə bilərəm ki, doğru məqamda evlənsinlər. Təhsillərini başa
vursunlar, iş həyatı ilə tanış olduqdan, özlərini həm psixoloji, həm də maddi cəhətdən
evliliyə hazır hiss etdikdən sonra ailə qursunlar. Bir çox insan evləndikdən
sonra sosial həyatının bitəcəyini düşünür, amma bizdə elə deyil, mən dostlarımla,
Günay rəfiqələri ilə görüşür. Bu tip məsələlərdə bir-birimizə qadağa
qoymamışıq.
Günay: Məncə
də, insan özünü hazır hiss etdikdə evlənməlidir. Burada fiziki yaşdan çox,
düşüncə olaraq hansı yaşda olmağımız önəmlidir. Müəyyən bir yaşdan sonra insan kimləsə
daimi olaraq nəyisə bölüşmək, hər addımında yanında olacaq birini istəyir. Ən əsası,
evlilik həyatımızı çərçivəyə salmırsa, şablonlaşdırmırsa, evlənmək olar. Bundan
başqa, evlənən iki şəxs birlikdə vaxt keçirməyi istəməlidir. Bəzi evliliklərdə
kişilər daha çox dostları ilə olanda xanım deyinir, evdə müəyyən problemlər
yaranır. Amma Xəyal dostları ilə də əylənir, evə gələndə övladımızla, mənimlə də
vaxt keçirir. Qarşılıqlı olaraq bir-birimizi anlayırıq.
Günel
Azadə