Rasim Musabəyov: “Belə davam edə bilməz”
Politoloq: "Azərbaycan və Türkiyə Ermənistanın
işğalçı siyasətinə seyrçi qalmayacaq”
İyulun 12-də Ermənistan silahlı qüvvələrinin bölmələri
növbəti dəfə təxribata əl ataraq Azərbaycan-Ermənistan dövlət sərhədinin Tovuz
istiqamətində mövqelərimizi ələ keçirtməyə çalışıb, artilleriya atəşindən
istifadə edərək hücuma cəhd edib. Azərbaycan Ordusunun ayıq-sayıqlığı, həyata
keçirdiyi əks-tədbirlər nəticəsində düşmən geri otuzdurulub, bir neçə gün davam
edən döyüşlərdə düşmənin xeyli canlı qüvvəsi və hərbi texnikası məhv edilib. Həmin
hadisələrdən sonra dünya azərbaycanlıları yaşadıqları ölkələrdə aksiyalar keçirərək
beynəlxalq ictimaiyyətin diqqətini təkrar Ermənistan-Azərbaycan, Dağlıq Qarabağ
münaqişəsinə yönəltməyə çalışıb, işğalçı dövlətə təzyiq göstərilməsinə
çağırışlar ediblər. Bu hadisələr fonunda Türkiyə-Azərbaycan birgə təlimləri
keçirilir, rəsmi Ankaranın ölkəmizə hər cür dəstək verməyə hazır olduğu bəyan
edilir, prezidentlər Rəcəb Tayyib Ərdoğan və Vladimir Putin arasında Dağlıq
Qarabağ münaqişəsinə dair müzakirə aparılır. Bütün bunlarla bağlı "Kaspi” qəzetinin
suallarını millət vəkili, politoloq
Rasim Musabəyov cavablandırır.
- Rasim müəllim, istərdim
ilk öncə ermənilərin dövlət sərhədində törətdiyi təxribata münasibət bildirəsiniz.
Sizcə, bu, nəyə hesablanmışdı, məqsəd nə idi, arxasında nə dayanırdı?
- İşğalçı Ermənistan daim təxribatçı hərəkətlərə
yol verib. Dağlıq Qarabağ münaqişəsi başlanan gündən indiyə qədər Ermənistanın
məşğul olduğu yeganə iş terror aktları, təxribatlar törətməkdir. Bunun da səbəbi
var. Ermənistan anlayırdı ki, ayrı cür Azərbaycanı müharibəyə cəlb etmək,
torpaqları zəbt etmək mümkün deyil. İndiki dövrdə isə fərqindədirlər ki,
aparılan danışıqlar çərçivəsində Azərbaycandan torpaq qoparda bilməyəcəklər, rəsmi
Bakı prinsipial mövqeyindən geri çəkilməyəcək, tarixi torpaqlarımızda ikinci
erməni dövlətinin yaradılmasına imkan verilməyəcək, bununla da işğal altında saxladıqları əraziləri rəsmiləşdirmək qeyri-mümkün olacaq. Bununla
yanaşı, məhz işğalçılıq siyasətinə görə Ermənistanın üzləşdiyi problemlər, o
cümlədən iqtisadi tənəzzül, siyasi gərginlik, eyni zamanda pandemiyanın
yaşatdığı çətinliklər rəsmi İrəvanı çıxılmaz duruma salıb. Şübhəsiz ki, bu kimi
bir sıra səbəblərdən Ermənistan Azərbaycanla dövlət sərhədində təxribat törədib,
olduqca gərgin vəziyyət yaradıb. Hansı ki, bunun acı nəticəsini onlar özləri çəkə
bilərlər. Müasir dövrdə cəbhə xəttində Azərbaycanla istənilən hərbi toqquşmada
məğlub olacağını yaxşı dərk edən Ermənistan son təxribatla bir növ test aparıb,
ölkəmizin qərb istiqaməti ilə xarici bazarlara çıxan strateji neft-qaz kəmərlərinə
təhlükə yaratmaq istəyib. Düşmən ölkənin niyyəti bu ərazidə vəziyyəti gərginləşdirməkdən,
ardınca prosesləri beynəlxalq ictimaiyyətə öz istədikləri kimi çatdırmaqla Azərbaycana
təzyiq göstərilməsinə nail olmaqdan ibarət ola bilərdi. Yaxud, Rusiya Ermənistan
vasitəsilə bu təxribatı törətdirməklə Cənub Qaz Dəhlizi və sair bu kimi
strateji layihələri sıxışdırmaq, enerji bazarında öz mövqelərini daha da möhkəmləndirməyi
hədəfləyə bilərdi. Nəzərə alsaq ki, Ermənistan Kollektiv Təhlükəsizlik Müqaviləsi
Təşkilatının (KTMT) üzvüdür, bu təxribatla işğalçı dövlət həm də təşkilat üzvlərinin, xüsusən də Rusiyanın
reaksiyasını yoxlayıb. Çünki, sözügedən təşkilata üzv dövlətlərin hər hansı
birinin sərhədinə hücum cəhdinə qarşı birgə mübarizə aparmaq məsələsi var. Bu
yolla KTMT-ni proseslərə cəlb etmək niyyəti güdülə bilərdi. Bir çox amillər
Ermənistanı belə bir təxribata əl atmağa sövq edə bilərdi.
- Onlar bu təxribatla
planlaşdırdıqlarına nail ola bildilərmi?
- Onlar sadəcə, test etdilər. Düşünmürəm ki, ermənilər
Bakı-Tbilisi-Ceyhan, Bakı-Tbilisi-Ərzurum, Cənub Qaz Dəhlizi kimi neft-qaz kəmərlərini
vurmağı, bu layihələri dayandırmağı qarşılarına məqsəd qoymuşdular. Bu, onlar
üçün fəlakətlə nəticələnə bilərdi. İlk günlərdən Türkiyənin bu məsələyə sərt
reaksiyasını gördük. Prezident Ərdoğan başda olmaqla bir çox Türkiyə rəsmiləri
bildirdilər ki, daim Azərbaycanın yanındadırlar, hər cür dəstəyə hazırdırlar. Hətta
Ərdoğan xüsusi vurğuladı ki, dövlət sərhədindəki təxribat hər hansı sərhəd
pozuntusu deyil, birbaşa Azərbaycana qarşı məqsədli hücumdur. O, bu hücumun Ermənistanın
səviyyəsini aşan bir hadisə olduğunu söylədi. Qeyd etdi ki, burada məqsəd təxribat
xarakterli yanaşma ilə Dağlıq Qarabağ münaqişəsinin həlli ilə bağlı prosesin
qarşısını almaq və bölgədə yeni toqquşma sahələri meydana çıxarmaqdır. Bütün
bunlardan sonra həm havadarları geri çəkildi, həm də forfost Ermənistanın ipini
çəkdilər.
- Bu hadisədən sonra
- iyulun 14-15-də Azərbaycan Ordusuna dəstək, şəhidlərimizin ruhuna hörmət əlaməti
olaraq paytaxt Bakıda və regionlarda vətəndaşlarımızın, həmçinin xarici ölkələrdə
yaşayan azərbaycanlıların dinc yürüşləri, aksiyaları keçirildi. Xaricdə Azərbaycan
diaspor nümayəndələrinin təşkil etdiyi belə aksiyalarda ermənilər tərəfindən
soydaşlarımıza hücum edildi, növbəti təxribat törədildi. Yaşanan bu olay nəyin
göstəricisi idi?
- Ermənilərin işi təxribat törətməkdir. Mümkün
olduğu təqdirdə bunun cavabını hüquqi müstəvidə vermək gərəkdir. Bundan boyun
qaçırdıb hüquqdan yayındıqları təqdirdə, onları ağıllandırmaq üçün əlavə
imkanlar da mövcuddur. Xaricdə yaşayan azərbaycanlılar bacardıqlarını etməkdədirlər.
Heç də dinc oturub ermənilərin təxribatlarını seyr etmirlər. Onların cavabını
harada necə lazımdırsa o cür də verirlər.
- Bütün bu baş verənlər
fonunda xaricdə məskunlaşan antimilli şəbəkə, eləcə də onların buradakı təmsilçiləri
Azərbaycan xalqı ilə vahid mövqedən çıxış etmək, Ordumuza dəstək olmaq əvəzinə vətənpərvərlik nümayiş etdirən Azərbaycan diaspor nümayəndələrini tənqid hədəfinə
çevirdilər. Hətta bir sıra hallarda düşmənlə eyni cəbhədə yer alıb Azərbaycan
xalqına və dövlətinə qarşı açıq mövqe ortaya qoydular. Onların ermənilərlə bu
cür sinxron hərəkətlərini təsadüf saymaq olarmı?
- Açığı, mən onları izləmirəm. Hər kəs öz vicdanı,
xalqı, dövləti qarşısında məsuliyyət daşıyır. Heç kim və heç nə unudulmur. Belə
hadisələrin gedişində insanların sərgilədiyi mövqe silinmir, yaddan çıxmır. Hər
şey sosial mediada, internetdə, saytlarda, mətbuatda əks olunur, qalır. Kimsə
özünü yaramazlığa vurur, milli-dövlətçilik maraqlarına zidd fəaliyyət göstərirsə,
bunun xəcalətini mütləq çəkəcəkdir. Ola bilsin hansısa məqamda hüquq müstəvisində
onlara qarşı tədbir görmək qeyri-mümkündür və bu səbəbdən məsuliyyətdən qaça
bilirlər. Amma vicdanlarından qaça bilməyəcəklər. Hər kəs öz vicdanı qarşısında
cavab verəcək. Bundan başqa, əgər biri mənəviyyatsızlıq edirsə, onun bu xoşagəlməz
hərəkətinə istinad etməyin özü mənasızdır.
- İyulun 29-dan
etibarən Azərbaycanla Türkiyənin növbəti birgə hərbi təlimləri keçiriləcək.
Plana əsasən təlimlər avqustun 1-dən 5-dək quru qoşunlarının cəlb edilməsi ilə
Bakıda və Naxçıvanda, hərbi aviasiya vasitələrinin iştirakı ilə iyulun 29-dan
avqustun 10-dək Bakı, Naxçıvan, Gəncə, Kürdəmir və Yevlax şəhərlərində keçiriləcək.
İndiki dönəmdə belə hərbi təlimlərin keçirilməsi nə məna kəsb edir?
- Bu hərbi təlim əvvəlcədən nəzərdə tutulmuş plana
uyğun olaraq keçirilir. Lakin bir qədər əvvəl qeyd etdiyimiz dövlət sərhədindəki
təxribat, onun ardınca yaşanan olaylardan sonra hərbi təlimlərin miqyası bir qədər
genişləndirilib. Bu, bir çox avantüralara, təxribatlara meyl edənlərə tutarlı
cavabdır, mesajdır, qulaqburmadır. Onların ağıllarını başına gətirmək üçün bu hərbi
təlimlərin əhəmiyyəti böyükdür. Bu təlimlər gec-tez genişmiqyaslı hərbi hücuma
çevrilib işğal altındakı torpaqlarımızı düşməndən azad edəcək. Düşünürəm ki,
bunun da zamanı var və bu, baş verəcək.
- Türkiyə və Rusiya
prezidentləri iyulun 27-də telefonla danışıblar. İki ölkənin prezidenti Suriya
və Liviyadakı vəziyyətlə yanaşı, Azərbaycan-Ermənistan qarşıdurmasını da
detallı şəkildə müzakirə ediblər.Bu fakt artıq onu göstərir ki, Dağlıq Qarabağ
problemi böyük dövlətlərin ciddi müzakirə mövzusuna çevrilib. Bu kontekstdə
fikirlərinizi də bilmək maraqlı olardı.
- Ərdoğan və Putin görüşəndə gündəlikdəki məsələlərlə
bərabər, Dağlıq Qarabağ probleminin dinc yolla həlli ətrafında da müzakirələr aparırlar.
Türkiyə Rusiya ilə Liviya və Suriyada üz-üzə gəlir. Dağlıq Qarabağ münaqişəsinin
həlli, Cənubi Qafqazdakı maraqlar baxımından Türkiyə və Rusiya burada da üz-üzə
gələ bilər. Fikrimcə, bu, daha təhlükəlidir. O baxımdan telefon əlaqəsi zamanı
prezidentlərin bu məsələni diqqətdə saxlaması təbiidir. Böyük dövlətlərin
Dağlıq Qarabağ münaqişəsinin həlli ilə bağlı hər hansı addımı ümumən problemin
ölü nöqtədən tərpədilməsinə doğru səydir. Bunun konkret nəticəyə gətirib
çıxaracağını söyləmək nəzəri baxımdan mümkün deyil. Əvvəl-axır bu səylər nəticə
verməlidir. Lakin bu, heç də o demək deyil ki, Azərbaycan və Türkiyə Ermənistanın
işğalçı siyasətinə daim seyrçi qalacaq. Bu, belə davam edə bilməz. Danışıqlar
heç bir nəticə verməyəcəyi halda, silahlar işə düşəcək, problemin hərbi yolla həlli
gündəmə gələcək. Türkiyə və Azərbaycanın davamlı birgə hərbi təlimləri bu mənada
dünyaya mühüm mesajdır.
Rufik İSMAYILOV