Baydendən Poroşenkoya vida mesajı
Birləşmiş Ştatların vitse-prezidenti Cozef Bayden öz postunda sonuncu
səfərini Ukraynaya edib. Əvvəlcə Ukrayna prezidenti Pyotr Poroşenko ilə görüşən
C. Baydenə Ukrayna üçün elədiklərinə və dəstəyə görə təşəkkür elan edilib. Görüş
zamanı Donbasdakı vəziyyət, eləcədə də ölkədəki islahatlar müzakirə olunub.
"İslahatların davam etdirilməsi Ukraynaya beynəlxalq dəstəyi təmin edəcək. Bilirsiniz
ki, sizdən başqa heç kim bu çətin missiyanı başa çatdıra bilməyəcək. Xırda
maraqları və ziddiyyətləri bir kənara qoyub daha yüksək amallar uğrunda
çalışmaq gərəkdir. Bu, hamıya - deputatlar, hakimlər, KİV və geniş ictimaiyyətə
aiddir. Sizlərin hər biri tarixin çağırışlarına cavab verməli və zamanın
sınağından çıxa biləcək birləşmiş, demokratik Ukrayna qurmalısınız”, - deyə
Bayden Poroşenko ilə birgə mətbuat konfransında vurğulayıb. O, həmçinin Ukrayna
hökumətinin iqtisadi uğurlarını yüksək qiymətləndirib. Əlavə edib ki, bu sahədə
hələ çox işlər görülməlidir. Vitse-prezident rəsmi Kiyevi bu istiqamətdə Beynəlxalq
Valyuta Fondu (BVF) ilə işlərini gücləndirməyə çağırıb.
Bir faktı da qeyd edək ki, Barak Obamanın administrasiyasında Bayden
Ukrayna məsələsinə məsul idi. Ukraynaya simpatiyasını gizlətməyən Bayden
dəfələrlə Kiyevdə olub. 2015-ci ildə Ukraynada səfərdə olarkən Ali Radada çıxış
edib və ölkə rəhbərliyini 2004-cü ildə baş verən inqilabdan sonra buraxılan
səhvləri təkrarlamamağa çağırmışdı. "İslahatlar keçirildi, sonra isə istiqaməti
dəyişdi. Biz islahatlar və dəyişikliklər istəməyən oliqarxların hakimiyyətdən
uzaqlaşdırıldıqlarını, sonradan isə yenidən hakimiyyətə qaytarılmalarının
şahidi olduq. Biz islahat istəyən islahatçılardan siyasi qisas alındığının
şahidi olduq”. O bir neçə dəfə Poroşenko komandasını və Ukrayna parlamentini
sözün əsl mənasında islahatlar keçirməyə, korrupsiyaya son qoymağa və
qohumbazlıqdan imtina etməyə çağırıb. Onun qənaətincə, belə olarsa, bütün dünya
Ukraynanı dəstəkləyəcək, onu Rusiya ilə apardığı müharibədə müdafiə edəcək.
Baydenin bu sözlərini ekspertlər o zaman Obamanın prezidentliyinin son ilində
sonuncu şans kimi qiymətləndirmişdilər. Bu səbəbdən də vəzifəsindən getməkdə
olan vitse-prezidentin indiki səfərini bir çoxları görülən işlərin yekunu kimi
dəyərləndirirlər. Ekspertlər onu da qeyd edirlər ki, mövzu ilə bağlı Davosda da
müzakirələr keçirilə bilər. Belə ki, C.Bayden Kiyevdən Davosa yollanacaq.
Burada Ukraynadakı vəziyyətlə bağlı qeyri-rəsmi müzakirənin keçiriləcəyi
gözlənilir. Həmin tədbirdə ABŞ-ın bir sıra nüfuzlu siyasi xadimləri, o cümlədən
sabiq müdafiə naziri Robert Geytsin də iştirak edəcəyi bildirilir. Bir sıra
ekspertlər hesab edir ki, Geyts Poroşenkonun komandasına ABŞ-ın yeni administrasiyası
üzvləri ilə körpü qurmağa kömək edə bilər.
Ukrayna Xarici Siyasət Assosiasiyasının prezidenti Vladimir Handoqiy qəfil
səfəri təbii hal sayır və hesab edir ki, Bayden sadəcə, vidalaşmağa gəlib.
"Obama da artıq Avropanın başlıca ölkələrini gəzib. Bayden Kiyevə tərəfdaşları
ilə görüşmək üçün gəlib və gələcək ABŞ prezidenti barədə fikirlərini bölüşəcək.
Mənə elə gəlir ki, bu səfər sadəcə protokol xarakteri daşıyır”.
Səfərlə bağlı ukraynalı ekspertlərin fikirləri fərqlidir. Onlar hesab
edirlər ki, Bayden Poroşenkonun komandasına Donald Tramp administrasiyası ilə
münasibətləri qurmaq yolları, onun detalları barədə ətraflı məlumat verəcək.
Yeri gəlmişkən, respublikaçılar Trampın seçkiqabağı kampaniyasının ən
qızğın dövründə yaşanan qalmaqallı bir insidenti hələ də yaddan çıxarmayıblar.
Belə ki, bəlli olmuşdu ki, Trampın seçki qərargahının rəhbəri Pol Manafortun
adı Ukraynanın Regionlar Partiyasının "qara buqalteriyası”nda hallanıb.
Manafort istefaya getdi, Tramp isə bundan sonra Pyotr Poroşenko ilə BMT Baş
Assambleyasının sentyabrda Nyu-Yorkda keçirilən toplantısında görüşməkdən belə
qaçdı. İndi həm Tramp, həm də Ukrayna tərəfi qalmaqaldan uzaq dayanmağa çalışır
və bildirirlər ki, Ukrayna və ABŞ arasında münasibətlər dəyişilməz olaraq
qalacaq.
"Vitse-prezidentin səfəri Birləşmiş Ştatların Ukraynaya verdiyi önəmin,
eləcə də Ukraynanın müstəqilliyi prosesinə şəxsi dəstəyinin göstəricisidir.
Səfər həm də iki ölkə arasında diplomatik münasibətlərinin qurulmasının 25
illiyinə həsr olunub”, - deyə ABŞ tərəfinin yaydığı məlumatda vurğulanıb.
Ukrayna tətbiqi siyasi tədqiqatlar Mərkəzi – "Penta”nın rəhbəri
Vladimir Fesenko hesab edir ki, Ukrayna məsələsi ABŞ xarici siyasətində
prioriteti olaraq qalacaq. Lakin Tramp administrasiyasının bu məsələnin həllinə
baxışını dəyişə bilər. Məsələn, politoloq Vadim Karasev hesab edir ki, "Ukraynanı
postsovet məkanın uğurlu inkişaf etmiş modelinə çevirmək emosiyaları öz yerini
sərt praqmatizmə verməli oldu”. Başqa bir politoloq Turi Romanenko isə bildirib
ki, Tramp Poroşenkonun komandasına Ukraynanın Rusiya ilə böhranlı vəziyyətdən
çıxmaq barədə təkliflər paketi hazırlamağı təklif edib: "Əgər belə təkliflər
daxil olmazsa, onda razılaşmalar Ukraynanın iştirakı olmadan imzalanacaq”.
Onun
sözlərinə görə, yeni ABŞ administrasiyası ilin sonuna kimi ən böyük əhəmiyyət
kəsb edən iki münaqişə - Suriya və Ukrayna münaqişələrinin həll etmək
niyyətindədir. Ekspert hesab edir ki, Ukrayna tərəfinin gözləmə mövqeyi mənfi
nəticələrə gətirib çıxara bilər. Onun qənaətincə, Donbasdakı münaqişəli
vəziyyətin Ukraynanın iştirakı olmadan necə həll etməyin yolunu ukraynalı
oliqarx Viktor Pinçuk WSJ nəşrinə olan müsahibəsində açıq şəkildə göstərib.
Həmin şəxsin açıqladığı həll variantında isə Ukraynanın Donbasda münaqişəyə son
qoyulması üçün kompromislərə getməsi nəzərdə tutulub. Bura isə Ukraynanın
Avropa İttifaqı və NATO-ya üzvlük planından əl çəkilməsi, Krımın kimə məxsus
olması məsələsinə uzun müddət toxunmamaq, Donbasda yerli idarəetmə orqanlarına
seçkilərin keçirilməsi və təhlükəsizliklə bağlı məsələlər nəzərdə tutulub.
İstisna deyil ki, oliqarxın məqaləsi Vaşinqton tərəfindən buraxılan bir mesajdır.
Lakin istənilən halda, Ukrayna tərəfi bu kompromislərə getməz. Artıq Kiyev bu
təklifə münasibət bildirib və onun heç müzakirə belə olunmayacağını bəyan edib.
Hətta oliqarxı "Rusiya ssenarisini” reallaşdırmaq cəhdində günahlandırıblar.
Beynəlxalq münasibətlər üzrə Kral İnstitutunun məsləhətçisi Ceyms Şerr "Chatham
House”da yerləşdirdiyi məqaləsində qeyd edir ki, oliqarxın müəyyən etdiyi
güzəştlər yeni bir dinamika yaradır. Bu, Ukraynanın əvvəlcə de-fakto, sonra isə
de-yure Rusiyaya tabe etdirilməsi olacaq.
Azər