Bakı-Tbilisi-Qars dəmir yolu Təbrizə qədər uzansa...
"İranBakı-Tbilisi-Qarsdəmir yolunun Təbriz şəhərinə qədər
uzadılmasını təklif edib”. Bu barədəAPA-nın Gürcüstan bürosuna
açıqlamasında İranın yol və şəhərin inkişafı naziri Abbas Axundi deyib.O bildirib ki, bu məsələ ilə bağlı Türkiyə tərəfi ilə müzakirə
aparılıb və memorandum imzalanıb: "Bu, çox böyük layihədir və üzərində iş
gedir. Bu layihə reallaşsa, dairəvi dəmir yolu yaranacaq. İran və Türkiyə
layihə üzrə işlər aparmaqla bağlı razılıq ifadə edib”.
Cənub-Qərb nəqliyyat dəhlizinə toxunan A. Axundi bildirib ki, onun
çox uğurlu olacağını hesab edir: "Bu dəhliz region və dünyada olan dəhlizlərlə
rəqabət apara biləcək. Əminəm ki, İran, Azərbaycan, Gürcüstan və Ukraynanın bu
dəhlizlə bağlı əməkdaşlığı uğurlu olacaq.”
O, İran və Azərbaycan arasında infrastruktur sahəsində əməkdaşlığın
çox yaxşı davam etdiyini qeyd edib: "Astara-Astara dəmir yolunun tikintisi davam
edir. Azərbaycan tərəfi ilə Astaradan Rəştə qədər olan dəmir yolunun
tikintisinin maliyyələşdirilməsi ilə bağlı danışıqlar apardıq. Bununla bağlı
memorandum imzalanıb. Layihə ilə bağlı müqavilənin imzalanması da nəzərdə
tutulur. Bundan sonra Azərbaycan layihənin inkişaf etdirilməsində iştirak
edəcək”.
Millət vəkili, İqtisadi siyasət,
sənaye və sahibkarlıq komitəsinin üzvü Tahir Mirkişiliqəzetimizə
verdiyi açıqlamada bildirdi ki, Bakı-Tbilisi-Qars
dəmir yolunun istifadəyə verilməsi, gözlənildiyi kimi, regionda iqtisadi
aktivliyi artırıb: "Bununla yanaşı, Şimal-Cənub nəqliyyat dəhlizi üzrə dəmir
yolu layihəsinin də tamamlanmaq üzrə olduğun nəzərə alsaq, hər iki layihənin
inteqrasiya olunması bütün istiqamətlər üzrə yük daşımalarını artıracaqdır.
Türkiyə və İran, Avropa Birliyi-İran arasında ticarət dövriyyəsini
artırılmasına əsas əngəl, nəqliyyat daşımaların imkanının məhdud olmasıdır ki,
BTQ dəmir yolunun Təbrizə qədər uzanması bu problemləri aradan qaldırmaqla,
bütün tərəflər üçün cəlbedici iqtisadi imkanlar yaradacaqdır. Təbii ki, burada
həm də Azərbaycan tərəfi iqtisadi cəhətdən fayda əldə edəcəkdir. Regionda
ölkələr arasında iqtisadi münasibətlərin inkişafı həm də onlar arasında
geosiyasi münasibətlərin inkişafına xidmət edir ki, bu, son nəticədə,
bütövlükdə regionun inkişafı üçün həyati əhəmiyyət kəsb edir” .
Politoloq Fikrət Sadıxovdeyir ki, Ermənistandan başqa bütün ölkələr
bu layihəyə qoşula bilər: "Biz əvvəlcədən də bu layihəni digər ölkələr üçün
açıq elan etmişdik və bildirmişdik ki,
Ermənistandan başqa kim qoşulmaq istəyirsə, qoşula bilər. Bu, ilk növbədə İranın
maraqları üçün önəmli addımdır. Mənə elə gəlir ki, əslində burada heç bir
problem yaranmamalıdır. İlk olaraq ona görə ki, Təbrizdə bizim soydaşlarımız
yaşayır. Bu vasitə onların başqa ölkələrə səfəri üçün qısa bir yoldur. Təbii
ki, bir sıra məsələləri müzakirə etməyə ehtiyac var və müəyyən bir şərtlər
qoyulmalıdır. Ermənistan və onun vətəndaşları o yoldan istifadə etməsinlər.
Hətta onlara bu yol qadağan olunsun. Belə bir tələb mütləq irəli sürülməlidir”.
İqtisadçı Rəşad Həsənovbildirir ki, bu ideyanın gerçəkləşməsi Bakı- Tbilisi-Qars dəmir yolu
layihəsinin effektivliyini artıracaq: "BTQ dəmir yolunun Azərbaycan çıxışı
əsasən iki istiqamətli idi. Bunlardan biri Qazaxıstan, digəri Türkmənistan
istiqamətlidir. İranın bu məsələdə
maraqlı olması burdan daşınacaq yüklərin və sərnişinlərin həcminin artmasına
müsbət təsir göstərəcək. Həmçinin də layihənin effektliliyini artıracaq. Bizdə
olan məlumata görə, 2017-ci il ərzində Çin, İran dəmir yollarının
təkmilləşdirilməsi məqsədi ilə bu ölkəyə iki milyarda yaxın investisiya yatırıb.
Əgər Çin, İran dəmir yollarının inkişafında maraqlıdırsa, bu o mənaya gəlir ki,
növbəti dövrlərdə öz məhsullarını dünya bazarına İran üzərindən çıxarmağa
üstünlük verəcək. Belə bir şəraitdə təbii ki, BTQ dəmir yolunun İran dəmir
yolları ilə birləşdirilməsi gələcəkdə
üçüncü bir xətdən gələn yüklərin və sərnişinlərin Azərbaycan üzərindən
daşınmasına gətirib çıxarda bilər. Bu baxımdan düşünürəm ki, bu gələcəkdə
BTQ dəmir yolunun mənfəətinin yüksəlməsinə səbəb olacaq. Burada söhbət
sadəcə ondan getmir ki, Cənub-Şərqi Asiya ölkələrindən daşınan yüklər
Azərbaycan üzərindən üçüncü ölkəyə getsin. Həmçinin yerli sahibkarların da
kommunikasiyalardan istifadə edərək öz daşıma proseslərini sürətləndirməsi və
eyni zamand,a xərclərin aşağı salınması məsələsi də var ki, bu da yerli
iqtisadiyyata öz müsbət təsirini göstərəcək”.
"Ekonomiks” Beynəlxalq
İqtisadi Araşdırmalar Birliyinin sədri Fikrət Yusifov qeyd edir ki, BTQ dəmir yolunun istismara
verilməsindən sonra layihəyə maraq regionda daha da artıb: "İran tərəfinin BTQ
dəmir yolunu Təbriz şəhərinə qədər uzatmaqla bağlı təklifi də dediyimiz
maraqlar sırasından olan bir məsələdir. Layihənin işlənməsi ilə bağlı İran
tərəfinin artıq Türkiyə ilə danışıqlar apararaq memorandum imzalaması isə
təqdirəlayiqdir. Çünki BTQ dəmir yolu xəttinin genişləndirilməsi onun bütün
cəhətlərdən daha maraqlı olması demək olacaqdır. Layihənin müəllifi kimi bu
təklif Azərbaycan üçün İran və Türkiyədən heç də az maraqlı deyil. BTQ dəmir
yolunun Təbrizə qədər uzadılması, praktik olaraq Azərbaycan və Gürcüstan
üzərindən İranla Türkiyə arasında dairəvi dəmir yolunun yaranması demək
olacaqdır. Belə olan halda, bütün dairəvi yollar kimi, bu yolun da əhəmiyyəti
daha da artacaq və ondan istifadənin səmərəliliyi yüksələcəkdir.”
Günel Azadə