Azərbaycanlıları Gürcüstana çəkən səbəblər
2017-ci ilin
yanvar-noyabr ayları ərzində 1 milyon 556 min Azərbaycan vətəndaşı Gürcüstana
səfər edib. Bu barədə Trend Gürcüstanın Milli Turizm Administrasiyasına
istinadən xəbər verir. Qeyd olunur ki, bu, ən yüksək göstəricidir. Rusiyaya
gəlincə, həmin dövrdə 1 milyon 309 min 900 rusiyalı Gürcüstana səfər edib. Bu,
keçənilki göstərici ilə müqayisədə daha çoxdur. Bundan əlavə, bütün postsovet
dövrü ərzində il ərzində ilk dəfə olaraq respublikaya bu qədər rusiyalı gəlib. Türkiyəyə
gəlincə isə Gürcüstana səfər edənlərin sayı 1 milyon 136 mindir. Maraqlıdır,
azərbaycanlı turistləri Gürcüstana çəkən səbəblər hansılardır? Bu sualın
cavabını ekspertlərimiz verdilər.
Bazar araşdırmaçısı
(marketoloq), həvəskar səyahətçi video-blogger Vaqif Hüseynov bildirir ki, bunun səbəbi ilk olaraq Azərbaycan
hava yolları şirkətinin təklif etdiyi qiymətlərdədir: "Biletlər çox fantastik
qiymətə satılır. Bu qiymətlərdən dolayı insanlar lou-kost şirkətlərdən istifadə
edirlər. Hansı ki, bu şirkətlər aşağı büdcəlidir və uçuşları bizə yaxın ölkələr
arasında əsasən Gürcüstandan olur. Çox sadə bir nümunə deyim, misal üçün - mən
və dostlarım bu dəfə yeni ili Avropada qeyd etməyi düşünürük. Biz Gürcüstana
gedib, oradan uçacağıq. Yəni orta büdcəli insan olaraq öz büdcəmə qənaət
edirəm. İkinci faktor isə Azərbaycanda gecə həyatı anlayışının olmamağıdır.
Buna görə də, gecə həyatı yaşamaq istəyən gənclər həftə sonu üçün Gürcüstana üz
tuturlar. Digər məsələ isə xaric ab-havasının olmasıdır. Yəni sırf "istirahətə getdim” demək üçün ən yaxın ölkə
kimi Gürcüstanı seçirlər”.
Bakı şəhəri strateji olaraq çox gözəl tranzit
mövqedə yerləşir, amma təəssüf ki, sadaladığım faktorlar bu əlverişli şərait
imkanını Bakıdan alır” deyən səyahətçi qeyd etdi ki, normalda lou-kost
şirkətlər beynəlxalq qanunvericiliyə görə, əsas aeroportdan uça bilməz: "Yəni
rəqabət prinsiplərinə zidd olduğuna görə, ikinci dərəcəli hava limanından istifadə
olunmalıdır. Buna görə də, Gürcüstanda Tbilisidən yox, Kutaisidəki hava
limanından istifadə edirlər. Bizdə isə Bakıdan yox, Gəncədən, Qəbələdən,
Lənkərandan aşağı büdcəli uçuşları həyata keçirmək olar. Bundan başqa, hansı
ölkələrə uçuş tələbatı var, onu da nəzərə almaq lazımdır. "Buta Airways” açıldı,
bu, yaxşı haldır. Amma uçuşların sayı hazırda çox məhduddur. Bunu
genişləndirsələr, daha yaxşı olar. Ayda 3 dəfə yox, hər gün uçuşların olmasını
təmin etmək lazımdır”.
Müsahibimiz Gürcüstana gedənlərinin sayının çox
olmasına təsir edən başqa bir səbəbi də qeyd etdi: "Digər bir səbəb budur ki,
ölkədaxili bəzi onlayn ödənişlərə, misal üçün onlayn alış-veriş saytlarına
əlavə dəyər vergisi tətbiq edilir. Bu işlə intensiv məşğul olan şəxslərin
büdcəsində ciddi fərq yarandığından, Gürcüstana gedib orada özlərinə hesab
açırlar və ödənişləri bu yolla edirlər. Sözsüz ki, bu da Gürcüstana gedən
insanların sayına təsirsiz ötüşmür”.
"Çox gəzən bilər”
verilişinin aparıcısı Mirsəməd Cəfərlideyir ki, statistik hesablamalarda Azərbaycandan
Gürcüstana müxtəlif məqsədlər üçün gedən
hər kəsi turist kimi qeydə alırlar, ona görə
də belə böyük rəqəm alınır: "Yəni 1 milyon 556 min insanın 10 ay ərzində ora
turist kimi getməsi real deyil. Sərhədi keçən hər kəsi turist sayırlar. Onu da
deyim ki, hazırda Gürcüstanda istirahət elə də ucuz başa gəlmir. Çox məhdud
imkanları, balaca otaqları olan rahatlıqdan kənar otellərdə 10-15 manata qalmaq
mümkündür. Bəzi insanlar uzaq xarici ölkələrə gedə bilmirlər və Gürcüstan onlar
üçün ən yaxın xarici ölkə kimi daha səmərəlidir. Təbii ki, qiymətlər
Azərbaycanın bölgələrindəki qiymətlərdən nisbətən ucuzdur”.
Müsahibimiz deyir ki, yeni turizm obyektləri
tikilməlidir: "Bizim daxili turizm obyektlərimiz həddən artıq azdır. Yəni
ölkəmizə gələn turist axınını təmin edə biləcək sayda deyil. Ona görə də,
bayram ərəfəsində və ya hansısa bir tədbir olanda, otellər 10-15 gün öncədən
tutulur. Gərək regionlarda 3-4 ulduzlu turizm obyektləri tikilsin”.
Turizm üzrə ekspert
Rüfət Məmmədovbildirir ki, əsas səbəb ölkələr arasındakı
qiymət fərqidir: "Azərbaycanla Gürcüstan arasında turizm sahəsindəki qiymət
fərqi 30-40 faizdir. Azərbaycanda istirahət etmək, Gürcüstandakından baha başa
gəlir. Gürcüstan həm qış, həm da yay mövsümü
üçün turizm imkanlarına malik olan ölkələrdəndir. Digər bir səbəb isə Gürcüstanda kazinoların
olmasıdır. Hər otelin öz kazinosu var.
Bu baxımdan, bəzi insanlar sırf buna görə həftənin 5-ci günü sərhədi keçib ora
gedir və bazar günü qayıdırlar”.
Günel Azadə