“Azərbaycanın abadlaşmayan və sosial simasını dəyişməyən bölgəsi yoxdur”
Azərbaycanda
sosial problemlərin, o cümlədən yoxsulluq probleminin həlli istiqamətində həyata
keçirilən tədbirlər nəticəsində son 14 ildə işsizlik və yoxsulluq 5 faizə
düşüb, 1.5 milyondan artıq yeni iş yeri açılıb, 3 mindən çox məktəb, altı
yüzdən çox tibb ocağı tikilib və ya əsaslı şəkildə təmir edilib. Bölgələrdə
40-dan çox Olimpiya İdman Kompleksi, sosial və mədəniyyət obyektləri inşa
edilib, şəhər və rayonlarda Heydər Əliyev Mərkəzi, Gənclər Evi, Tarix
Diyarşünaslıq Muzeyi, digər sosial və
mədəni obyektlər tikilərək əhalinin istifadəsinə verilib, yeni parklar,
istirahət mərkəzləri yaradılıb. Vətəndaşların sosial problemlərinin həlli, o
cümlədən mənzil-məişət şəraitinin yaxşılaşdırılması istiqamətində atılan
addımlar yalnız qaçqın və məcburi köçkünləri deyil, digər kateqoriyadan olan
insanlarımızı da əhatə edib. Buna misal olaraq, Azərbaycan Milli Elmlər
Akademiyasının işçiləri, alimlər, yazıçılar, mədəniyyət nümayəndələri,
hərbçilər, idmançılar, jurnalistlər, müharibə veteranları, qazilər və şəhid
ailələrinin müxtəlif illərdə dövlət tərəfindən pulsuz mənzillərlə təmin
edilməsini göstərmək olar. Ölkədə sosial evlərin inşası ilə bağlı böyük
layihənin icrasına da başlanıb və bu məqsədlə Mənzil İnşaatı Dövlət Agentliyi
yaradılıb. Bakının köhnə, istifadə müddəti bitmiş binalarının yerində müasir
mənzillərin inşası ilə bağlı yeni təşəbbüsə start verilib. Bu işlərin
yekunlaşması nəticəsində yaxın gələcəkdə minlərlə gənc ailənin mənzil-məişət
problemi birdəfəlik həllini tapacaq.
Bütün bunlarla
bərabər, ötən illər ərzində sovet dövründən qalmış əmanətlər əhaliyə
qaytarılıb, ölkə əhalisinin bütün kommunal problemləri həllini tapıb. Azərbaycanda
həyata keçirilən sosial-iqtisadi layihələr nəticəsində kənd təsərrüfatını
stimullaşdırmaq üçün böyük meliorativ tədbirlər də görülüb, yüz minlərlə hektar
torpaq dövriyyəyə buraxılıb. Pambıqçılıq, baramaçılıq, üzümçülük, tütünçülük və
digər sahələrin inkişaf etdirilməsi istiqamətində görülmüş işlər nəticəsində
400 mindən artıq vətəndaş işlə təmin olunub. Ötən müddət ərzində Azərbaycan
sahibkarlarına ümumilikdə 2 milyard manatdan artıq güzəştli şərtlərlə kreditlər
verilib ki, bunun da hesabına yeni istehsal sahələri, çoxsaylı iş yerləri
yaradılıb. Görülən bütün bu işlərlə paralel olaraq, bu illər ərzində maaşlar,
pensiyalar və digər sosial ödənişlər də dəfələrlə artırılıb.
Milli
Məclisin Əmək və sosial siyasət komitəsinin üzvü Musa Quliyev sadalanan
bütün bu faktlara toxunaraq bildirib ki, Azərbaycan
dövlətinin sosial siyasətinin əsasında insan amili və onun rifahı dayanır.
Dövlətin sosial siyasətinin bir necə istiqamətinin olduğunu diqqətə çatdıran
millət vəkili qeyd edib ki, bu siyasət Azərbaycanda insanların keyfiyyətli
həyat sürməsinə yönəlib. O, əlavə edib ki, Azərbaycan BMT-nin İnsan İnkişafı
İndeksinə görə, 200 dövlət arasında 70-ci yerlərdə dayanır. Bunun MDB məkanında
ən yaxşı göstəricilərdən biri olduğunu xatırladan deputat deyib ki, bu
göstəriciyə əhalinin sosial rifah halının ardıcıl şəkildə yaxşılaşması, pensiya
təminatı, məşğulluğun təmini, yoxsulluğun aşağı salınması, mənzil təminatının
yaxşılaşdırılması, təhsil və səhiyyə imkanlarının yaxşılaşdırılması ilə nail
olunub: "Azərbaycan vətəndaşlarına sosial təminat 2 istiqamət üzrə həyata
keçirilir. Biri odur ki, ümumi olaraq, bütün vətəndaşların sosial təminat
hüquqları təmin edilir. Yəni, vətəndaşlar işlə təmin olunur, dövlət hər bir
kəsin sağlamlığına, təhsil almasına, sağlam mühitdə yaşamasına təminat verir.
Digər istiqamət isə odur ki, sosial müdafiəyə ehtiyacı olan insanlara dövlət öz
yardımını göstərir. Yəni, onlara ünvanlı sosial müavinətlər verilir, əməkdə,
təhsildə, mədəniyyətdə və sair sahələrdə fərqlənənlərə Prezidentin xüsusi
təqaüdü təyin edilir. Bununla yanaşı, dövlət tərəfindən əhalinin mənzil
təminatının yaxşılaşdırılması üçün də ardıcıl tədbirlər görülür. Xüsusilə
Qarabağ əlilləri və şəhid ailələri üçün dövlətin ayrıca proqramı var və bu
proqram çərçivəsində hər il yüzlərlə belə ailə mənzillə təmin olunurlar”.
Milli
Məclisin Aqrar siyasət komitəsinin sədri Eldar
İbrahimov da hesab edir ki, Azərbaycanda bütün
sosial-iqtisadi məsələlər uğurla öz həllini tapır. Onun sözlərinə görə, bu gün
Azərbaycanın abadlaşmayan və sosial simasını dəyişməyən bölgəsi yoxdur: "Biz
daim yeni tikinti, sosial, mədəni və digər obyektlərin təməlinin qoyulmasının
və ya açılışının şahidi oluruq. Bu gün ümummilli lider Heydər Əliyevin müəyyən
etdiyi sosial-iqtisadi inkişaf strategiyası uğurla həyata keçirilir və yeni
dövrün tələblərinə uyğun şəkildə inkişaf etdirilir. Prezident İlham Əliyev
qarşıya belə məqsəd qoyub ki, Azərbaycan dünyanın ən inkişaf etmiş ölkələrinin
sırasında olmalıdır və bu istiqamətdə 2003-cü ildən məqsədyönlü siyasət həyata
keçirilir. Bu, həm daxili, həm də xarici siyasətdə özünü göstərir. Ümumiyyətlə,
Azərbaycanın daxili siyasətində inkişaf şaxələndirilmiş iqtisadi strategiyaya
əsaslanır. Azərbaycan dövləti neft kapitalının insan kapitalına çevrilməsini,
neft gəlirlərinin qeyri-neft sektoruna yatırılması ilə ölkənin bütün
regionlarının inkişafının təmin etdirilməsini qarşıya məqsəd qoyub. 2004-cü
ildən başlayaraq regionların sosial-iqtisadi inkişafı ilə bağlı dövlət
proqramları icra olunur və hazırda bu proqramların üçüncü mərhələsi həyata
keçirilir. Dövlət proqramlarında qarşıya qoyulan məqsədlərin hamısı demək olar
ki, icra olunur. Bundan başqa, təhlükəsizlik tədbirlərinin də yüksək səviyyədə
təmin olunduğu Azərbaycan dünyada sabitlik məkanı kimi tanınır. Belə bir
şəraitdə isə həm investisiyaların qoyuluşuna maraq göstərilir, həm də
əhalimizin rifah halı yaxşılaşır”.
Böyük Quruluş Partiyasının (BQP) sədri, millət vəkili Fazil MustafaAzərbaycanda son illər ərzində sosial sahədə gözlənildiyindən daha çox addımlar
atıldığını xatırladıb. O, bildirib ki, son illər ərzində Prezident İlham Əliyev
tərəfindən əhalinin sosial vəziyyətinin yaxşılaşdırılması üçün infrastruktur
layihələrinə xüsusi diqqət yetirilib. Millət vəkili qeyd edib ki, əhalinin aztəminatlı,
xüsusilə yoxsul təbəqəsinin və əlillərin problemlərinin həlli istiqamətində
addımlar atılıb: "Azərbaycan İpoteka Fondunun yaradılması, ipoteka şərtlərinin
asanlaşdırılması, əhalinin mənzil problemlərinin həlli üçün imkanların
yaradılması, sosial evlərin tikintisinə başlanılması, əlillər üçün evlərin
tikilməsi, jurnalistlərə evlərin paylanılması - bunlar hamısı sosial
kateqoriyaya aid olan məsələlərdir. Eyni zamanda son illər ərzində sosial
sahədə mövcud olan bir çox nöqsanlar, o cümlədən əvvəllər sosial müavinətlərin
verilməsi, əlilliyin müəyyən edilməsi sahəsində mövcud olan bir çox neqativ
hallar ortadan qaldırılıb. Bununla belə, sosial sahə bütün ölkələrdə, o
cümlədən ABŞ-da həmişə nöqsanların olduğu sahə olub. İstər-istəməz əhalinin
işsizi də, yoxsulu da, müəyyən problemləri həll edilməyənləri də olur. Amma bu
insanların çox sıxıntı içində qalmaması üçün bu istiqamətdə vaxtaşırı çevik qərarların
qəbul olunması vacibdir”.
Millət
vəkillərinin səsləndirdiyi fikirlərdən, eyni zamanda yazının əvvəlində
sadalanan faktlardan bir daha aydın olur ki, Azərbaycanda dövlət
daim öz vətəndaşına qayğı ilə yanaşır, onun rifah halının yüksəldilməsini,
sosial problemlərinin həllini prioritet
vəzifə kimi görür və bu istiqamətdə məqsədyönlü siyasət həyata keçirir.
Alpər
TURAN