Azərbaycan - Türkmənistan yaxınlaşması “Kəpəz” problemini aradan qaldıracaqmı?
Azərbaycan hər zaman Ermənistan istisna olmaqla, qonşu dövlətlərlə
geniş əlaqələrin qurulmasına üstünlük verib. Dövlətimizin apardığı
balanslaşdırılmış siyasətin nəticəsində həm quru sərhədimiz olan, həm də Xəzər
hövzəsindəki ölkələrlə müxtəlif sahələrdə əməkdaşlıq davam etdirilir.
Azərbaycan Türkmənistanla da çoxtərəfli münasibətlərin inkişaf
etdirilməsinə hər zaman xüsusi önəm verib. Lakin Xəzər dənizindəki yataqların
işlənilməsində bir sıra mübahisəli məqamlar olurdu. Belə ki, Azərbaycanla
Türkmənistan arasında "Kəpəz” yatağı ilə bağlı fikir ayrılığı mövcuddur. Buna
baxmayaraq, Azərbaycan Türkmənistanla əlaqələrin genişləndirilməsinə, dost,
qardaş münasibətlərinin qurulmasına önəm verib. Bunun nəticəsidir ki, bu günlərdə Türkmənistan Nazirlər Kabineti
sədrinin müavini, xarici işlər naziri Rəşid Meredov Azərbaycana səfər edib.
Səfər çərçivəsində Prezident İlham Əliyev, xarici işlər naziri və digər dövlət
rəsmiləri ilə görüşlər keçirilib, ölkələr arasında münasibətlərin
genişləndirilməsi üçün bir sıra mühüm sənədlər imzalanıb.
Xüsusilə, Türkmənistan nümayəndə heyəti ilə görüş zamanı Prezident
İlham Əliyev bildirib ki, Azərbaycan Türkmənistan ilə bərqərar olmuş qardaşlıq
münasibətlərinə böyük önəm verir və bütün sahələrdə əlaqələrimizin
genişləndirilməsində maraqlıdır. Dövlət başçısı qeyd edib ki, bunu həm
xalqlarımız arasında mövcud olan tarixi əlaqələr, həm də bugünkü reallıqlar
zəruri edir: "Biz bu cür münasibəti Türkmənistan tərəfindən də görürük”.
Dövlət başçısı bu baxımdan qarşıdakı illərdə əməkdaşlığımızın və
tərəfdaşlıq əlaqələrimizin daha da möhkəmlənəcəyinə ümidvar olduğunu bildirib.
Ölkələrimiz arasında müxtəlif istiqamətlərdə, o cümlədən siyasi, iqtisadi,
nəqliyyat, humanitar və digər sahələrdə fəal əməkdaşlıq həyata keçirildiyini
deyən prezident İlham Əliyev qardaş və qonşu ölkələrimiz arasında qarşılıqlı
fəaliyyət üçün yeni imkanların yaradılması, əməkdaşlığın daha da inkişaf
etdirilməsi istiqamətində səyləri əsirgəməyəcəyini bildirib.
Mövzu ilə bağlı "Kaspi” qəzetinə açıqlamasında Milli Məclisin deputatı, Azərbaycan-Türkmənistan parlamentlərarası
əlaqələr üzrə işçi qrupunun üzvü Eldar İbrahimov bildirdi ki, Azərbaycan
hər zaman qonşu ölkələrlə geniş əlaqələrin qurulmasına üstünlük verib: "Təbii
ki, biz bu gün Türkmənistanla da hər sahədə əlaqələrin qurulmasına üstünlük
veririk. Azərbaycan bütövlükdə türkdilli ölkələrlə istər siyasi, istər
iqtisadi, itərsə də digər sahələrdə münasibətlərin qurulmasında maraqlıdır.
Düzdür, bu gün Türkiyə ilə Azərbaycan əlaqələri digərlərinə nisbətən qardaşlıq
və dostluq müstəvisindədir. Amma Azərbaycanın Türkmənistanla da əlaqələri var.
Onu da qeyd edim ki, "Kəpəz” yatağı ilə bağlı Azərbaycanla Türkmənistan
arasında fikir ayrılığı mövcuddur. Düşünürəm ki, zaman-zaman iki ölkə arasında
əlaqələr inkişaf etdikcə, bu fikir ayrılığı da aradan qalxacaq. Prezidentlər, o
cümlədən xarici işlər naziri səviyyəsində səmimi şəkildə masa ətrafında
müzakirələr aparıldıqca dostluq, qardaşlıq əsasında buna nail olunacaq. Fikrimcə,
bu görüşlərin nəticəsi olaraq "Kəpəz” yatağı ilə bağlı yaranmış problemin
aradan qalxması mümkün ola bilər”.
E.İbrahimov əlavə etdi ki, Azərbaycan və Türkmənistan dövlət
rəsmiləri arasında olan bu görüşlər həm də iki ölkə parlamentinin bir-birinə
daha çox yaxınlaşmasına gətirib çıxaracaq: "Əlbəttə, biz digər ölkələrin parlamentləri
ilə əlaqələrin genişləndirilməsinə çalışırıq. Bu yaxınlarda Özbəkistanda
parlamentində görüşlərimiz oldu. Ümumiyyətlə, bütövlükdə Orta Asiya ölkələri
ilə münasibətlərin genişləndirilməsində çox maraqlıyıq. Türkmənistanla da
əlaqələrimizi genişləndirmək istəyirik. Onu da qeyd edim ki, Azərbaycanın
Türkmənistandakı səfiri Həsən Zeynalov da çalışır ki, iki ölkə arasındakı
münasibətlər daha da genişlənsin. Bundan başqa, Türkmənistanın Azərbaycana yeni
səfiri təyin olunub və yəqin ki, onunla da görüşlər keçiriləcək. Əlbəttə, biz
ölkələrimiz arasında münasibətləri yaxşılaşdırmalıyıq. Bu baxımdan, Azərbaycan
parlamenti olaraq bu sahədə təşəbbüs göstəririk. Təbii ki, bu məsələlər də
qarşılıqlı olmalıdır və Türkmənistan tərəfi də əlaqələrin genişləndirilməsinə
təşəbbüs göstərməlidir”.
Böyük Quruluş Partiyasının
sədri, millət vəkili Fazil Mustafa bildirdi ki,
Türkmənistanla əlaqələrimizi yaxşı səviyyədə saxlamağa çalışmalıyıq: "Çünki həm
türk cümhuriyyətlərindən biridir, həm də qonşu dövlətdir və bizim Xəzərdə
əməkdaşlıq etmək imkanlarımız var. Düşünürəm ki, bütün məsələlər bir yerdə
müzakirə edilib həll olunmalıdır. Həlli mümkün olmayan problem yoxdur. "Kəpəz”
yatağı ilə bağlı da ümumi razılaşmaya gəlmək imkanımız var. Yəni, bunların
hamısı hansısa konfliktə gətirib çıxarmamalıdır. Təbii ki, hər ölkənin
maraqları nəzərə alınmaqla bu kimi məsələlərdə güzəştli davranış mümkündür.
Çünki iki türk dövlətinin yaxınlaşmasından söhbət gedir. Hesab edirəm ki,
Türkmənistan nümayəndə heyətinin Azərbaycan prezidenti ilə görüşünün bu
məsələyə müsbət təsiri olacaq”.
F.Mustafa əlavə etdi ki, bütün sahələrdə iki ölkə arasında
münasibətlərin inkişaf etdirilməsi mümkündür: "Türkmənistan tərəfinin buna
reaksiyasının necə olacağını demək çətindir. Amma hər halda müsbət bir tendensiya
var və ümid edək ki, bu, yaxşı nəticə verəcək”.
Bəxtiyar MƏMMƏDLİ