Azərbaycan regional əməkdaşlığa hazırdır, Ermənistan necə?
Rəsmi Yerevan əsassız ərazi iddialarından,
geosiyasi alət rolunda çıxış etməkdən əl çəkərsə...
Azərbaycan, işğalçı Ermənistan istisna olmaqla
dünya dövlətləri ilə bərabərhüquqlu, qarşılıqlı maraqlara söykənən əməkdaşlıqda
daim maraqlı olub. İndiyə qədər regional və beynəlxalq müstəvidə bütün
ölkələrlə formalaşan münasibətlər yalnız dostluğa, sülhə xidmət edib. Bu
əməkdaşlıqdan bütün tərəflər ictimai-siyasi, iqtisadi və sair dividentlər
qazanıb. Lap əvvəldə qeyd etdiyimiz kimi, yalnız Ermənistan bütün proseslərdən
kənarda qalıb. Bunun yeganə səbəbi Ermənistanın yürütdüyü təcavüzkarlıq
siyasəti, qonşularına qarşı əsassız ərazi iddiaları ilə çıxış etməsidir. Belə
ki, cəmisi 2 milyonluq demoqrafik göstəriciyə malik olan Ermənistan 85 milyon
əhalisi olan Türkiyəyə, 84 milyonluq İrana, 10 milyonluq Azərbaycana və 4
milyonluq Gürcüstana qarşı ərazi iddiaları irəli sürür. Soyqırımı, deportasiya siyasəti həyata keçirən bu işğalçı ölkə 30 ilə yaxın bir
müddətdə Azərbaycanın 20 faiz ərazisini işğal altında saxlayıb, 1 milyondan
artıq azərbaycanlını qaçqın və məcburi köçkünə çevirib. Məhz belə işğalçı
siyasətinə, əsassız ərazi iddialarına görə, Ermənistan regiondakı bütün
proseslərdən, o cümlədən Bakı-Tbilisi-Ceyhan, Cənub Qaz Dəhlizi,
Bakı-Tbilisi-Ərzurum neft-qaz layihələrindən, Bakı-Tbilisi-Qars dəmir yolu və
sair nəqliyyat layihələrindən kənarda qalıb, olduqca ağır iqtisadi vəziyyətlə
üzləşib.
Bölgənin
yeni əməkdaşlıq çərçivələri
Amma sentyabrın 27-dən başlayan və 44 gün davam
edən Vətən Müharibəsi nəticəsində Azərbaycanın işğal altındakı torpaqlardan
düşməni qovması, BMT Təhlükəsizlik Şurasının qətnamələrini yerinə yetirməsi,
ərazi bütövlüyünü təmin etməsi regionda yeni reallıq yaradıb. Bölgədə 30 ilə yaxın
bir müddətdə davam edən işğala son qoyan Azərbaycan, bu gün və gələcək üçün
yeni təhlükəsizlik, əməkdaşlıq formatını təşkil edib. Bu, Ermənistan üçün də
bir şansdır və regionda yaşayan xalq olaraq ermənilərin gələcəyi rəsmi
Yerevanın bu şansı necə dəyərləndirməsindən asılı olacaq. Prezident İlham
Əliyevin dekabrın 1-də Azərbaycan xalqına müraciətində vurğuladığı kimi, bu
format, bu əməkdaşlıq nədən ibarət olacaq, bunu həyat göstərəcək. Həmin
müraciət zamanı üçtərəfli razılaşmaya diqqət çəkən ölkə başçısı deyib ki,
Azərbaycan bu yeni əməkdaşlıq formatının yaradılması üçün lazımi işləri görüb,
öz torpaqlarını azad edib və noyabrın 10-da imzalanmış Bəyanatda göstərilən
məsələlər həllini taparsa, onda bölgəmizdə yeni əməkdaşlıq çərçivələri
yaradılacaq. Prezident Ermənistanın da bu əməkdaşlıqda iştirakını istisna
etməyib: "Bəyanata, tərəflərin razılığı əsasında Naxçıvan Muxtar Respublikası
ilə Azərbaycanın qərb rayonlarını birləşdirən yeni nəqliyyat
kommunikasiyalarının inşası - bu məsələni tam və gələcəyə hesablanmış çərçivədə
həll etmək üçün əlavə bənd də salınıb. Bu o deməkdir ki, iki dəhliz olmalıdır.
Bu, bizim tarixi nailiyyətimizdir. Bununla biz Naxçıvanı həm mühasirədən
çıxarırıq, eyni zamanda, yeni bir nəqliyyat damarını açırıq. Bütün ölkələr
buradan faydalanacaq. Azərbaycan öz ayrılmaz tərkib hissəsi olan Naxçıvanla,
həmçinin Türkiyə ilə birləşir. Rusiya, Azərbaycan, Türkiyə, İran və əgər
istəsə, Ermənistan da bu dəhlizə qoşula bilər. Beləliklə, bölgədə beştərəfli
yeni əməkdaşlıq platforması yaradıla bilər. ...Biz istəyirik ki, bölgədə
uzunmüddətli sülh olsun. Buna nail olmaq üçün gərək əməkdaşlıq da təhlükəsizlik
tədbirləri ilə birlikdə inkişaf etsin. Biz əməkdaşlığa hazırıq”.
Ermənistanı
çox ciddi iqtisadi fəlakət gözləyir
Mövzu ilə
bağlı fikirlərini "Kaspi” qəzetinə bölüşən Milli Məclisin İqtisadi siyasət,
sənaye və sahibkarlıq komitəsinin sədri Tahir Mirkişili işğalçılıq siyasəti nəticəsində indiyə qədər
Ermənistanın regional layihələrdən kənarda qalmasına, ölkə iqtisadiyyatının
acınacaqlı durumuna fikir yönəldib. Bildirib ki, Ermənistanı gələcəkdə çox
ciddi iqtisadi fəlakət gözləyir: "Qarabağın işğaldan azad edilməsi onun
resurslarını istismar edən Ermənistan üçün çox böyük iqtisadi zərbədir. Komitə
sədri bildirib ki, hazırda Ermənistanın xarici dövlət borcu təqribən 8,1
milyard dollar, valyuta ehtiyatlarının toplam həcmi isə 0,95 milyard dollardır.
Ölkənin xarici dövlət borcu ümumdaxili məhsulun (ÜDM) 60,32 faizinə çatıb. Bu
ilin yanvar-sentyabr aylarında Ermənistan iqtisadiyyatında geriləmə 6,6 faiz olub.
İqtisadiyyata sərmayə qoyuluşu cəmi 99 milyon dollar təşkil edib. Milli valyuta
olan dram sürətlə qiymətdən düşür: hazırda 1 dollar 525 dramdır. Qarşıda isə
nağd pul çatışmazlığı, hiperinflyasiya, vergi ödənişlərinin kəskin azalması,
işsizlik və yoxsulluq səviyyəsinin artımı var. Ehtiyatda olan 500 milyon dollar
savaş günlərində dramın çökməsinin qarşısını almaq üçün valyuta
intervensiyalarına sərf olunub”.
Onları
kimsə xilas edə bilməyəcək
Deputat nəzərə çatdırıb ki, İkinci Qarabağ
Müharibəsinin nəticələri Ermənistan üçün ümumiyyətlə, fəlakətlidir: "Bundan
başqa, Ermənistanda 10 ən iri vergiödəyici arasında "GeoMining Gold",
"İnternational Masis Tobacco", "Alex Holding" var. Bu
şirkətlərin üçü də Zod, Vejnəli və sair yataqların istismarı, Hadrut, Fizuli və
Qubadlı rayonlarındakı tütün plantasiyaları, habelə Kəlbəcər rayonunun təbii
ehtiyatlarının istismarı hesabına fəaliyyət göstərirdi. Ermənistanın enerjiyə
tələbatının 11,3 faizi Qarabağdakı 6 elektrostansiya hesabına ödənirdi. Həmin
stansiyaların 3-ü Kəlbəcərdə, biri Suqovuşanda, ikisi Laçındadır. Yəni
Ermənistan 5 hidroelektrostansiyadan aldığı enerjini birdəfəlik itirib.
Ermənistanın taxıla olan ehtiyacının 25 faizi Qarabağ hesabına ödənirdi. Artıq
bu, mümkün deyil, çünki ermənilər Hadrut, Füzuli, Kəlbəcər, Zəngilan və Qubadlı
rayonlarındakı tarlalardan məhrum oldular. Və ən nəhayət, Ermənistan dünya
şərab bazarına çıxardığı, 8 ölkədə satdığı "Kataro" şərab brendini də
itirdi. "Kataro" şərabları Hadrutun Tuğ kəndində istehsal olunur. Həmin
kənd isə erməni işğalından qurtulub. Ermənistanı çox ciddi iqtisadi fəlakət
gözləyir. Bundan isə onları kimsə xilas edə bilməyəcək”.
Bütün danışıqlar Rusiya ilə aparılır
Millət vəkili, siyasi şərhçi Sahib Alıyevbildirib ki, indiyə qədər yeritdiyi siyasətdən, qonşularına qarşı mərdimazarlıqdan, əsassız ərazi iddialarından, geosiyasi alət rolunda çıxış etməkdən əl çəkməsi Ermənistan qarşısında qoyulan ən əsas şərtdir. Onun sözlərinə görə, bütün bunlar baş verəcəyi təqdirdə, təbii ki, regiondakı proseslərə Ermənistan da qoşula bilər: "Naxçıvan dəhlizi məsələsini Prezident İlham Əliyev də xalqa müraciətində xüsusi vurğulayıb. Bu dəhliz Azərbaycanla Rusiya arasında aparılan danışıqların predmetidir. ÇünkiErmənistanın bütün dəmiryolları, səhmləri Rusiyadadır. Təsadüfi deyil ki, rəsmi Moskvanı təmsil edən nümayəndə heyətinin regiona səfəri zamanı Rusiyanın dəmir yolları idarəsinin rəisi də tərkibdə yer almışdı. O, Azərbaycana səfərdə də iştirak etdi. Yəni bu dəhlizlə bağlı bütün danışıqlar Rusiya ilə aparılır, görüləcək işlər Bakı ilə Moskva arasında müəyyənləşdirilir. Ermənistanın üzərinə düşən yeganə iş bütün bu proseslərə mane törətməməkdir. Dövlət olaraq onların bu prosesə hər hansı töhfə verəcəyini gözləməyə dəyməz. Xalqa müraciətində Prezident İlham Əliyevin vurğuladığı kimi, bu dəhlizdən Azərbaycanla yanaşı Türkiyə, Rusiya və İran da istifadə edəcək. Əgər istəsə, Ermənistan da qoşula bilər. Bunun üçün isə fikrimin əvvəlində qeyd etdiyim kimi, Ermənistan indiyə qədər olan siyasətindən, işğalçılığından, alət rolunu oynamağından əl çəkməli, normal qonşu kimi davranmalıdır”.
İlk
növbədə kommunkiasiyalar açılmalıdır
İqtisadçı
millət vəkili Azər Badamovda işğalçılıq siyasəti nəticəsində Ermənistanın düşdüyü çətin durumdan söhbət
açıb. Bildirib ki, bu müharibədə Ermənistan ordusunun məhv edilmiş və qənimət
götürülmüş hərbi texnikasının dəyəri 4 milyard ABŞ dolları təşkil edib. O,
ölkədəki ağır iqtisadi durumu da xatırladaraq, bundan çıxış yolunun yalnız qonşularla
sağlam münasibətlər qurmaqdan, əsassız ərazi iddialarından əl çəkməkdən, normal
həyat tərzi sürməkdən ibarət olduğunu vurğulayıb: "Noyabrın 10-da Azərbaycan,
Rusiya və Ermənistan arasında üçtərəfli bəyanat imzalanıb. Bu bəyanatın 9 şərti
var. Onların əksəriyyəti indiyə qədər icra olunub. Bir neçə şərt – bənd isə
hazırda icraatdadır. Misal üçün, Bəyanatın 9-cu maddəsində qeyd olunur ki,
Naxçıvan-Mehri-Zəngilan nəqliyyat dəhlizi açılmalıdır. Bu dəhlizin
təhlükəsizliyini Rusiya Federasiyasının sərhəd qoşunları təmin edəcək. Bu
dəhliz açılandan sonra Ermənistan qonşu dövlət olaraq səmimi, qarşılıqlı
maraqlara hesablanan münasibətlər qurmağa həvəs göstərəcəksə, o zaman regionda
yeni iqtisadi vəziyyət meydana çıxacaq. İlk növbədə kommunikasiyalar açılmalıdır.
Bu, Ermənistanın iqtisadi inkişafı üçün pəncərə rolunu oynaya bilər”.
Əgər
bundan sonra Ermənistan sülhə töhfə verərsə...
Deputat vurğulayıb ki, Naxçıvan dəhlizi
Azərbaycanın Türkiyəyə açılan birbaşa qapısı olmaqla bərabər, Avropaya açılan
kommunikasiya xətləri də deməkdir. Onun fikrincə, bu, yeni bir reallıq yaradır:
"Bu dəhliz indiyə qədər mövcud olan digər nəqliyyat dəhlizlərindən 300 kilometr
qısa olması ilə də diqqət çəkir. Bu dəhliz vasitəsilə yüklərin daşınması,
sərnişinlərin hərəkəti vaxt və məsafə baxımından olduqca əlverişlidir. Ona görə
də, bu dəhliz iqtisadi baxımdan Azərbaycan üçün də xüsusi əhəmiyyətə malikdir.
Sözügedən dəhlizin istifadəyə verilməsi Azərbaycanın yeni beynəlxalq tranzit
nəqliyyat layihəsinə imza atması deməkdir. Təbii ki, bu, ölkəmiz üzərindən
daşımaların həcminin kifayət qədər artması ilə müşayiət olunacaq və dövlət
büdcəmizə əlavə vəsaitlər daxil olacaq. Bütün bu reallıqları, imkanları nəzərə
alanda, görürük ki, sözügedən dəhlizin istifadəyə verilməsi region ölkələrinin
hamısı üçün, o cümlədən Ermənistan üçün də xeyirlidir. Bu vaxta qədər
Ermənistan işğalçılıq siyasəti ilə özünü hərtərəfli blokadaya salmışdı. İki
qonşu dövlət olan Türkiyə və Azərbaycanla sərhədlərin bağlı olması Ermənistanı
dalana dirəmişdi. Əgər bundan sonra Ermənistan sülhə töhfə verərsə, səmimi
münasibətlərin qurulmasında yaxından iştirak edərsə, bu dalandan, iqtisadi
blokadadan qurtula biləcək”.
Yerevan-Tbilisi
münasibətlərində sərinliyə əsas səbəblər
A.Badamov deyib ki, işğalçılığa, əsassız iddialara
son qoyacağı təqdird,ə Ermənistan Azərbaycanın həyata keçirdiyi, gələcəyə
hesablanmış beynəlxalq dəhlizlərdən, layihələrdən yararlanmaq imkanı əldə
edəcək: "Bu gün Ermənistanın Rusiyaya yeganə çıxış yolu Gürcüstan vasitəsi
ilədir. Ermənistanın Gürcüstanla da münasibətlərinin tam səmimi olmaması,
xüsusən də Çavaxetiya bölgəsində ermənilərin separatçı bəyanatlarla çıxış
etməsi, 2008-ci ilin Rusiya-Gürcüstan müharibəsində Abxaziya və Osetiyada
ermənilərin Gürcüstana qarşı vuruşması və sair amillər Yerevan-Tbilisi
münasibətlərində sərinliyə əsas səbəblərdir. Bundan başqa, Ermənistanı
Gürcüstan vasitəsilə Rusiyaya birləşdirən nəqliyyat dəhlizi bütün fəsillərdə
işlək olmur. Orada relyef elədir ki, qış aylarında çoxlu qar yağır və yollar
keçilməz olur, bağlanır. Bu da Ermənistanı böyük çətinliklərlə üz-üzə qoyur.
Bütün bunları nəzərə alsaq, Azərbaycanla səmimi qonşuluq münasibətlərinin
yaradılması Ermənistan üçün yeni həyat mənbəyi, nəfəslik deməkdir.
Azərbaycansız Ermənistan dünyada heç nədir. Yalnız səmimi qonşuluq
münasibətləri sayəsində Ermənistan yenidən nəfəs ala bilər”.
Rufik
İSMAYILOV