Azərbaycan Prezidentinə beynəlxalq miqyasda olan ehtiramın göstəricisi
Çağdaş
zəmanəmizdə bəşəriyyəti çətin vəziyyətə salan koronovirus epidemiyası heç şübhəsiz
ki, mövcud geosiyasi sahədə də ciddi dəyişikliklərə əsas verir. Üçüncü minilliyin
başlamasından cəmi 20 il keçməsinə baxmayaraq artıq əksər beyin mərkəzləri və
analitiklər yenicə formalaşmağa başlayan geosiyasi konfiqurasiyanın
konturlarının tamamilə yeni istiqamətdə dəyişəcəyini proqnozlaşdırırlar. Bu, əlbəttə
ki, heç də ürəkaçan nəticələrə gətirib çıxaracağına ümid vermir. Pandemiya insanlar üçün ciddi sağlamlıq problemləri yaratmaqla
bərabər mənfi fəsadları hələ uzun müddət hiss olunacaq sarsıdıcı qlobal
sosial-iqtisadi və humanitar təhlükələr yaradıb. COVID-19 pandemiyası
şəraitində özünütəcrid və franqmentar xarakter daşıyan tədbirlər əvəzinə,
qlobal həmrəyliyə və qlobal baxışa böyük ehtiyac var. Təəssüf ki, indiyədək
beynəlxalq münasibətlər sistemində BMT və onun əsas qurumları olan Baş
Assambleya və Təhlükəsizlik Şurası, eləcə də dünyanın aparıcı ölkələri qlobal
liderlik əvəzinə, geosiyasi rəqabət və özünütəcridə kökləniblər.
Pandemiyanın dünyada tüğyan
etdiyi bir zamanda Azərbaycanı
Respublikasının Prezidenti İlham Əliyevin BMT Baş Assambleyasının COVID-19-a qarşı
mübarizəyə həsr olunmuş xüsusi sessiyasının keçirilməsi təşəbbüsünü irəli sürməsi və bu ideyanın dünyanın 130-dan çox dövləti tərəfindən dəstəklənməsi
ölkəmizə, onun liderinə beynəlxalq miqyasda olan ehtiramın göstəricisidir. Prezident İlham Əliyevin qlobal əməkdaşlığa
verdiyi töhvə onun beynəlxalq aləmdəki nüfuzunu, dünya dövlətləri tərəfindən
qiymətləndirilməsini bir daha sübut
edir. Başqa sözlə desək, dünyanın
130-dan çox dövlətinin BMT Baş Assambleyasının xüsusi sessiyasının təşkil
olunması təşəbbüsünü dəstəkləməsi dövlətimizin beynəlxalq aləmdə böyük
diplomatik uğurudur.
Qeyd etmək
lazımdır ki, BMT Nizamnaməsinə əsasən,
Baş Assambleya ehtiyac duyulduğu təqdirdə xüsusi sessiyalar keçirə bilər və
indiyə qədər Baş Assambleyanın xüsusi sessiyaları məhdud sayda keçirilib.
Prezident İlham Əliyev Qoşulmama Hərəkatı ölkələri adından BMT Baş
Assambleyasının dövlət və hökumət başçıları səviyyəsində videokonfrans vasitəsilə
xüsusi sessiyasının keçirilməsi təklifi ilə Baş katib Antonio Quterreşə müraciət
ünvanlayıb. BMT Baş katibi mayın 28-də Baş Assambleyanın "Prosedur Qaydaları”
adlı sənədinin 9 (a) bəndinə uyğun olaraq bütün üzv ölkələrə müraciət edərək 30
gün müddətində, yəni iyunun 27-nə qədər təşəbbüsə dair münasibət bildirilməsini
xahiş edib. Qaydalara əsasən, BMT-yə üzv 97 ölkə təşəbbüsü dəstəklədiyi təqdirdə,
xüsusi sessiya təşkil olunmalıdır. Artıq rəsmi məlumatlara görə, sözügedən müddətin
bitməsinə qədər 130-dək ölkə təşəbbüsə dəstək verdikləri barədə Baş katibin
ofisini məlumatlandırıb.
Təəssüflə qeyd etməliyik ki, bu humanist təşəbbüsə qarşı çıxış edən yeganə dövlət Ermənistan olmuşdur. Azərbaycanın artan nüfuzu, dünya miqyasında
sözünün eşidilməsi Ermənistanı narahat etdiyindən bütün dünya COVİD-19-a qarşı
mübarizədə qlobal həmrəyliyin vacibliyini vurğuladığı halda, Ermənistan qlobal
xarakter daşıyan bu təşəbbüsə qarşı çıxış etməklə özünün iç üzünü bir daha göstərdi, BMT
sistemində və dünya dövlətləri arasında özünü rüsvay etdi. Bütün dünya bir daha
Ermənistanın əsl irticaçı mahiyyətinin şahidi oldu. Təbii ki, bu münasibət işğalçı Paşinyan hökumətinin
diplomatik səbatsızlığını bir daha sübut etdi.
Ermənistanın əksinə olaraq ölkəmiz koronavirus pandemiyasından daha çox zərər
çəkən 30-dan artıq ölkəyə yardımlar göstərdi, Ümumdünya Səhiyyə Təşkilatına könüllü
ianə etdi. Bütün bunlar isə xeyirin şər üzərindəki qələbəsinin bir daha
göstəricisidir.
Mayis
Əliyev
"Sosial
hüquqların Araşdırılması”İctimai Birliyinin sədri, professor