Azərbaycan Prezidenti: “Münaqişəni mərhələlərlə həll etməliyik”
İlham
Əliyev: "Dağlıq Qarabağın statusu məsələsi Azərbaycanın ərazi bütövlüyünə
müdaxilə etməməlidir”
"Biz bu
münaqişəni mərhələlərlə həll etməliyik. Münaqişəni tam şəkildə bir gündə həll
edə bilmərik. O, mərhələli olmalıdır və birinci mərhələdə jurnalistin söylədiyi
və Rusiyanın təklif etdiyi kimi, işğal olunmuş ərazilərin bir qisminin azad
edilməsi baş verməlidir, Azərbaycan məcburi köçkünləri həmin ərazilərə
qayıtmalıdır, həmin ərazilərdə yenidən köçürülmə olmalıdır və eyni zamanda,
Ermənistan ilə Azərbaycan arasında münasibətlərin normallaşdırılması prosesi
getməlidir”.
Kaspi.az xəbər verir ki, bu barədə
Azərbaycan Respublikasının Prezidenti İlham Əliyev Münxen Təhlükəsizlik
Konfransı çərçivəsində Ermənistan-Azərbaycan Dağlıq Qarabağ münaqişəsi ilə
bağlı panel müzakirələrdə çıxışı zamanı deyib.
Prezident İlham Əliyev
bu təklifin
Azərbaycan tərəfindən ciddi şəkildə nəzərdən keçirildiyini və bütövlükdə, buna razılıq verildiyini dilə gətirib. Bildirib ki, bu, atıla
biləcək ən məntiqli addımdır: "...Bu halda,
Dağlıq Qarabağın statusu hər iki tərəf hazır olanda sonrakı müzakirəyə qala
bilər. Çünki yerlərdə proses getməsə,
ərazilərin azad edilməsi başlamasa, status üzərində razılığa gəlmək mümkün
olmayacaq. Bizim mövqeyimiz ondan ibarətdir ki, status məsələsi Azərbaycanın
ərazi bütövlüyünə müdaxilə etməməlidir. Eyni zamanda, biz həmişə söyləyirik ki,
Azərbaycan çoxkonfessiyalı, çoxmillətli ölkədir. Azərbaycanda sülh və rahat
şəkildə yaşayan çox sayda etnik azlıqlar var. Ərazi bütövlüyümüz tam bərpa
olunarsa, ermənilər milli azlıq kimi, ölkəmizdə istənilən digər millətin nümayəndəsi
kimi, bütün hüquqlara və imtiyazlara malik olacaqlar”.