Azərbaycan-İran əlaqələrinin genişləndirilməsi müzakirə edilib
Azərbaycanda səfərdə olan İran İslam
Respublikasının İqtisadiyyat və maliyyə naziri, Azərbaycan Respublikası ilə
İran İslam Respublikası arasında iqtisadi, ticarət və humanitar sahələr üzrə
Dövlət Komissiyasının həmsədri Məsud Kərbasianın rəhbərlik etdiyi nümayəndə heyəti
Fəxri Xiyabanda Ümummilli Lider Heydər Əliyevin məzarını ziyarət edib, xatirəsini
ehtiramla anaraq abidəsi önünə əklil qoyub. Qonaqlar görkəmli oftalmoloq alim,
akademik Zərifə xanım Əliyevanın məzarını da ziyarət edib, abidəsi önünə çiçək
dəstələri düzüblər. İranlı qonaqlar həmçinin, Şəhidlər Xiyabanında Azərbaycanın
müstəqilliyi və ərazi bütövlüyü uğrunda canlarından keçmiş qəhrəmanlarımızın
xatirəsini ehtiramla yad edib, "Əbədi Məşəl” kompleksinə əklil qoyublar.
Sonra İqtisadiyyat naziri, Azərbaycan Respublikası
ilə İran İslam Respublikası arasında iqtisadi, ticarət və humanitar sahələr üzrə
Dövlət Komissiyasının həmsədri Şahin Mustafayev İran islam Respublikasının
İqtisadiyyat və maliyyə naziri, Dövlət Komissiyasının həmsədri Məsud Kərbasian
ilə görüşüb.
Nazir Şahin Mustafayev Azərbaycan
və İran arasında siyasi əlaqələrin yüksək səviyyədə olduğunu, əməkdaşlığın
bütün sahələrdə inkişaf etdiyini, əlaqələrin genişlənməsində Azərbaycan və İran
prezidentlərinin siyasi iradəsini və birgə səylərini vurğulayıb. Bildirilib ki,
son illərdə ölkələrimiz arasında əlaqələr yeni mərhələyə
qədəm qoyub və strateji səviyyəyə yüksəlib. Son 4 ildə yüksək səviyyəli 9 görüş
keçirilib, müxtəlif tərkibli nümayəndə heyətlərinin 100-dən çox qarşılıqlı səfəri
həyata keçirilib, 40-dan çox sənəd imzalanıb, Azərbaycan Respublikası ilə İran
İslam Respublikası arasında iqtisadi, ticarət və humanitar sahələr üzrə Dövlət
Komissiyasının 3 iclası keçirilib. Səhiyyə,
maliyyə, bank, nəqliyyat, ticarət sahələrində mövcud əlaqələrə və əməkdaşlığın
genişləndirilməsinə dair fikirlərini bildirən Şahin Mustafayev qeyd edib ki, ölkələrimiz
arasında ticarət dövriyyəsi 2016-cı ildə 70%, 2017-ci ilin yanvar-sentyabr
aylarında isə 33% artıb. İran tərəfindən Azərbaycan iqtisadiyyatına 3 mlrd. dollardan artıq investisiya qoyulub. Hazırda Azərbaycanda
500-dən İran şirkəti fəaliyyət göstərir. Son zamanlar ölkələrimiz arasında bir
sıra layihələr həyata keçirilib. Neftçala Sənaye Zonasında birgə avtomobil
istehsalı zavodu inşa olunur. Pirallahı Sənaye Parkında təməli qoyulmuş birgə əczaçılıq
zavodunda isə yaxın vaxtlarda tikinti işlərinə başlanılacaq. Energetika sahəsində
"Xudafərin/Qız Qalası” və "Ordubad/Marazad"
hidroqovşaqları, 330 kv-luq Muğan (İmişli-Parsabad)
elektrik xətti kimi layihələr həyata keçirilib, İrana elektrik satışına dair Çərçivə
Sazişi imzalanıb.
Azərbaycan-İran əməkdaşlığının mühüm istiqamətlərindən
olan Şimal-Cənub nəqliyyat
dəhlizi üzrə Azərbaycanda 8,3 km dəmir yolu xətti,
Azərbaycan-İran sərhəddində dəmir yolu
körpüsü istismara hazırdır. İranda 1,4 km dəmir yolu xəttinin və terminalın
tikintisi davam edir. Bu ilin 9 ayında 2016-cı
ilin analoji dövrü ilə müqayisədə Şimal-Cənub nəqliyyat dəhlizinin Azərbaycan-İran
hissəsi üzrə dəmir yolu ilə daşınan yüklərin həcmi 77%, Rusiyadan İrana və əks
istiqamətdə keçən TIR-ların sayı isə 12% artıb. 2017-ci ilin avqust
ayından yük maşınlarına tətbiq olunan rüsumlar qarşılıqlı olaraq 160 dollardan
100 dollara endirilib.
Azərbaycan viza verilməsi prosedurunu sadələşdirib
və elektron vizaların verilməsinə başlanılıb. Əməkdaşlığın genişləndirilməsi
imkanlarına gəlincə, nazir Şahin Mustafayev Şahtaxtı-Poldəşt
sərhəd keçid məntəqəsinin 12 saatlıq, Biləsuvar sərhəd keçid məntəqəsinin
isə 24 saatlıq iş rejiminə keçirilməsinin, Bakı-Tehran arasında aviauçuşların
sayının artırılmasının əhəmiyyətini qeyd edib. İqtisadiyyat naziri kənd təsərrüfatı
avadanlıqlarının istehsalı və meyvəqurutma sahəsində birgə müəssisələrin
yaradılması, toxum istehsalı, arıçılıq məhsullarının qablaşdırılması sahələrində
əməkdaşlıq perspektivlərini diqqətə çatdırıb, iranlı iş adamlarını Azərbaycanın
Aktaudakı Logistik Mərkəzindən istifadəyə dəvət edib.
İran islam Respublikasının İqtisadiyyat və maliyyə
naziri Məsud Kərbasian Azərbaycan Respublikası ilə İran İslam Respublikası
arasında iqtisadi, ticarət və humanitar sahələr üzrə Dövlət Komissiyasının həmsədri
təyin olunmasından məmnunluğunu bildirib, ölkələrimiz arasında əlaqələrin
inkişafı üçün səylərini əsirgəməyəcəyini vurğulayıb. Qeyd olunub ki, son
zamanlar ölkələrimiz arasında əməkdaşlığın inkişafı istiqamətində mühüm işlər
görülüb, bir sıra qarşılıqlı səfərlər həyata keçirilib, görüşlər keçirilib. İran
nümayəndə heyətinin Azərbaycana növbəti səfərinin də əlaqələrin inkişafına töhfə
verəcəyinə əminlik vurğulanıb. Əməkdaşlığın genişləndirilməsi perspektivlərinə
dair fikirlərini bölüşən Məsud Kərbasian Qəzvin-Rəşt dəmir yolu xəttinin önəmini
qeyd edib, işlərin 95%-nin görüldüyünü və dəmir yolu xəttinin 2018-ci ilin mart
ayında istifadəyə veriləcəyini bildirib. Məsud Kərbasian səhiyyə sahəsində əməkdaşlığa
və təcrübə mübadiləsinə, sərhəd-keçid məntəqələrində iş rejiminin uzadılmasına,
kənd təsərrüfatı, maliyyə və bank sahələrində əməkdaşlığa dair fikirlərini
bölüşüb.
Görüşdə həmçinin, bu ilin dekabrında Tehranda
keçirilməsi nəzərdə tutulan Dövlət Komissiyasının iclasına, eləcə də qarşılıqlı
maraq doğuran digər məsələlərə dair müzakirələr aparılıb.