Azərbaycan dövləti vətənpərvər gəncləri ilə qürur duyur
Azərbaycanda əsası ulu öndər Heydər Əliyev tərəfindən
qoyulan dövlət gənclər siyasəti Prezident İlham Əliyevin rəhbərliyi ilə bu gün
də uğurla həyata keçirilir. Bu gün Azərbaycanda gənclər siyasəti dövlət siyasətinin
mühüm tərkib hissəsidir. Azərbaycan gəncliyi ictimai həyatın bütün sferalarında
aktiv fəaliyyəti ilə seçilir və siyasi, iqtisadi, humanitar, sosial tədbirlərin
həyata keçirilməsində mühüm rol oynayır.Bu günlərdə minlərlə gənci öz ətrafında birləşdirən
"İrəli” İctimai Birliyinin yaranmasının 8-ci ildönümünün yüksək səviyyədə qeyd
edilməsi, həmçinin Azərbaycan Prezidenti yanında Gənclər Fondunun fəaliyyətə
başlamasının beş illiyinin keçirilməsi, görülən işlər barədə əhatəli
hesabatların verilməsi də ölkədəki fənclər siyasətinin uğurla davam etdirilməsinə
əyani misaldır.
Milli
Məclisin Gənclər və idman komitəsinin sədri, millət vəkili Fuad Muradov mövzu ilə bağlı qəzetimizə açıqlamasında bildirib
ki, Azərbaycanda ulu öndər Heydər Əliyev tərəfindən əsası qoyulan dövlət gənclər
siyasəti ötən illər ərzində Prezident İlham Əliyev tərəfindən daha da inkişaf
etdirilib, hər bir azərbaycanlının prezidenti olan dövlət başçımızın yürütdüyü
siyasi kurs bütün ölkə gənclərini əhatə edib. Deputat qeyd edib ki, Azərbaycanda
dövlət gənclər siyasəti artıq dövlətin əsas siyasətinə çevrilib: "Azərbaycan
prezidenti mütəmadi olaraq gəncləri qəbul edir, onlarla səmimi söhbət edir,
müzakirələr aparır, gənclərin fikir və təkliflərini dinləyir. Bununla yanaşı, gənclərlə
bağlı 2005-2009 və 2011-2015 illər üzrə dövlət proqramları qəbul olunub,
2015-2025-ci illəri əhatə edəcək Azərbaycan gənclərinin inkişaf strategiyası
hazırlanıb və həyata keçirilməkdədir. Bu gün ən dinamik inkişaf edən sahə gənclərlə
əlaqəlidir. 2015-ci ildə növbəti dəfə parlament seçkiləri keçirildikdən sonra
qanunverici orqanda ayrıca olaraq Gənclər və idman komitəsi yaradılıb. Bir neçə
gənc parlamentdə təmsil olunmaq hüququ qazanıb ki, onlar da bu komitənin üzvləridirlər.
Ölkədə elə bir nazirlik, komitə, təşkilat, qurum yoxdur ki, orada gənclər
çalışmasın. Qanunverici, icra və məhkəmə hakimiyyətlərinin hər birində gənclər
təmsil olunur, Vətənə, dövlətə, xalqa layiqincə xidmət edirlər. Bütün bunlar isə
onu deməyə əsas verir ki, Azərbaycanın gələcəyi etibarlı və əmin əllərdədir. Azərbaycan
gəncinin özünü ifadə etməsi, realizə etməsi üçün dövlət hər cür şərait yaradıb.
Qürurverici haldır ki, artıq xarici ölkələr Azərbaycanın bu təcrübəsindən, dövlətin
gənclər siyasəti istiqamətində atdığı addımlardan yararlanmaq istəyirlər”.
Millət
vəkili, Yeni Azərbaycan Partiyası (YAP) Gəncə Şəhər Təşkilatının sədri Naqif Həmzəyev də "Kaspi”yə açıqlamasında deyib ki, bu gün Azərbaycan
dövləti vətənpərvər gəncləri ilə qürur duyur. Onun sözlərinə görə, ölkəmizdə
ulu öndər Heydər Əliyevin müdrik siyasi kursunun Prezident İlham Əliyev tərəfindən
uğurla yerinə yetirilməsi nəticəsində sağlam, fəal, təşəbbüskar, yaradıcı
potensiala malik gənclər yetişir, Azərbaycanın dinamik inkişafında mühüm rol
oynayırlar. Millət vəkili bildirib ki, bütün bu uğurların təməlində ümummilli
lider Heydər Əliyevin müəllifi olduğu dövlət gənclər siyasəti dayanır: "Azərbaycanda
müasir gənclər ordusu formalaşıb. Ölkə başçısı İlham Əliyevin Azərbaycana rəhbərlik
etdyi dövrdə gənclər siyasəti tamamilə yeni mərhələyə qədəm qoyub. Bu da gənclərimizdən
zamanın tələblərinə uyğun olaraq, daha kreativ, daha innovativ olmağı tələb
edir. Dövlət başçısının həyata keçirdiyi siyasi kursu dəstəkləyən minlərlə gənc
müxtəlif təşkilat və birliklərdə fəaliyyət göstərərək, dövlətə və dövlətçiliyə
öz töhfələrini layiqincə verirlər. Hazırda gənclərimiz ölkəmizdə 300-dən çox gənclər
təşkilatında, 30-dan çox beynəlxalq platformada təmsil olunurlar. Gənclər Təşkilatları
sıralarında birləşən gənclər Yeni Azərbaycan Partiyası sıralarında da yetişir və
formalaşırlar. Partiya üzvlərinin 40 faizini məhz gənclər təşkil edir. Yüksək
intellektli gənclərimiz müxtəlif transmilli şirkətlərdə də uğurla fəaliyyət
göstərirlər. Xaricdə təhsil alıb ölkəmizə qayıdan, elm və təhsil sahəsində
nümunə olan, parlamentdə, məhkəmə-hüquq sistemində və digər dövlət qurumlarında
fəaliyyət göstərən gənclər, Azərbaycanın üçrəngli bayrağını əzəmətlə
dalğalandıran idmançılarımız doğma Vətənimizin adına qürur və şərəf gətirirlər”.
Millət
vəkili, Azərbaycan Tələbə Gənclər Təşkilatları İttifaqının (ATGTİ) sədri Şahin
İsmayılov da
bizimlə söhbətində Azərbaycanın müstəqilliyinin 25 ilinin tamam olduğunu diqqətə
çatdıraraq, müasir tariximizin hər bir ilində gənclərlə bağlı hansısa əlamətdar
hadisənin yaşandığını vurğulayıb. Deyib ki, gənclər siyasəti istiqamətində
atılan bütün addımlar sistemli xarakter daşıyır, ölkəmizin gələcəkdə daha da
inkişaf etdirilməsinə hesablanır: "Azərbaycanda mövcud olan dövlət gənclər
siyasəti, o cümlədən bu məqsədlə yaradılan hüquqi baza, qəbul edilən dövlət
proqramları və s. beynəlxalq tərəfdaşlar tərəfindən də uğurlu model kimi
qarşılanır. Təbii ki, dövlət gənclər siyasətinin bu cür uğur qazanmasında
dünyaşöhrətli siyasətçi, ümummilli lider Heydər Əliyevin böyük xidmətləri olub.
Hətta 90-cı illərin əvvəlində ölkədə hökm sürən gərginliklər fonunda belə, o, gənclərlə
görüşüb, onların fikir və təkliflərini dinləyib, gənclərə tövsiyələrini
çatdırıb, dövlət quruculuğunda gənclərin vacib rolunu xüsusi diqqətə çatdırıb. Ulu
öndərin əsasını qoyduğu bu siyasət indi də gündəmdədir, Prezident İlham Əliyev
tərəfindən davam etdirilir. Bunun nəticəsində Azərbaycan gəncliyi bütün sahələrdə
özünə yer tapa bilir, bilik və bacarıqlarını, imkanlarını ifadə edir,
potensialını üzə çıxarır. Fikrimcə, bu faktın özü gənclik üçün böyük məna kəsb
edir”.
Rufik
İSMAYILOV