“Azərbaycan bizim üçün vacib ölkədir” - Almaniyanın XİN rəhbəri

“Almaniya xarici işlər naziri ilə təkbətək və geniş tərkibli görüşdə hər iki ölkə üçün böyük maraq doğuran məsələlər müzakirə olunub”.

APA-nın məlumatına görə, bunu Azərbaycanın xarici işlər naziri Elmar Məmmədyarov Almaniyanın xarici işlər naziri Frank-Valter Ştaynmayerlə birgə görüşdən sonra keçirdiyi mətbuat konfransında deyib.
O bildirib ki, ötən il iki ölkə arasında ticarət dövriyyəsinin həcmi 3 milyard dollara yaxın olub və bu istiqamətdə əməkdaşlıq davam etdirilməlidir: “Görüşdə regional məsələlər, Suriya, Türkiyə, İran, Ukrayna məsələləri müzakirə edilib. Həmçinin təhsil sahəsində əməkdaşlığa da toxunulub”.
F.V.Ştaynmayer isə qeyd edib ki, Almaniya Avropa İttifaqının “Şərq Tərəfdaşlığı” proqramında iştirak edən bütün ölkələrlə, o cümlədən Azərbaycanla əməkdaşlığı gücləndirmək istəyir: “Azərbaycan bizim üçün strateji baxımdan Şərq və Qərb arasında körpü rolunu oynayır, həmçinin enerji baxımından vacib ölkədir. İqtisadi münasibətlərimiz dərin və genişdir. Cənub Qaz Dəhlizi tək gələcəyə yönələn yox, həm də iddialı bir layihədir və ikitərəfli əməkdaşlığımıza böyük perspektivlər açır”.