Azərbaycan Avropa Şurasından çıxarsa, nə itirər?
Xəbər verildiyi kimi, bir neçə gün əvvəl Avropa Şurası
Parlament Assambleyasında Azərbaycan əleyhinə yenə qərəzli qətnamələr qəbil
edilib. Bu əslində, Avropa Şurasının uzun illərdən bəri Azərbaycana olan mənfi
münasibətinin davamı idi. Hətta iş o yerə gəlib çatdı ki, avropalı deputatlar
təşkilatın rəhbərliyinin Azərbaycanla bağlı atdığı bu addıma əks reaksiya
verdilər.
Sentyabr ayının əvvəllərində Avropa Şurasının baş katibi Torbyorn
Yaqlandın Azərbaycanın təşkilatdan çıxarılması ilə bağlı təklifi heç də yaddan
çıxmayıb. Qurum rəhbərinin belə bir təklifi hələ də qaranlıq məqamlardan xəbər
verir. Əslində Azərbaycanın Avropa Şurasında təmsil olunması Dağlıq Qarabağ
münaqişəsinin həllini sürətləndirmək məqsədi daşıyıb. Lakin təşkilata üzv
olduğumuz 2001-ci ildən bu yana münaqişənin həlli ilə bağlı Avropa Şurası
konkret olaraq heç bir addım atmayıb. Əksinə, hər zaman Azərbaycan bu
təşkilatdakı qaragüruhçu, islamofob, ksenofob qüvvələrin hədəfinə tuş gəlib.
Əgər nəzəri baxımından Azərbaycan Avropa Şurasından çıxarsa, nə
itirəcək?
Mövzu ilə bağlı "Kaspi” qəzetinə açıqlamasında Milli Məclisin deputatı, politoloq Aydın Mirzəzadə bildirdi ki, bu
gün Azərbaycanın Avropa Şurasından çıxmaq niyyəti yoxdur və bu nəzərdən
keçirilmir: "Ancaq hadisələr bu cür davam edərsə, Avropa Şurası Azərbaycanı
"xüsusi” diqqətə götürərsə, əlbəttə ki, bu zaman münasibətlərin daha aşağı
pilləyə keçirilməsi, yaxud da təşkilatdan çıxmaq məsələsi qoyula bilər. Misal
üçün, son iki gün ərzində ABŞ və İsrailin YUNESKO-dan çıxması barəsində qərar
elan olunub. Maraqları qorunmadığına görə hər iki dövlət bu təşkilatla
əlaqələrini kəsir. Amma biz Avropa Şurasından çıxarıqsa, təşkilat itirəcək.
Çünki təşkilatın artıq hüquqi və siyasi təsir imkanları Azərbaycan üzərində olmayacaq.
İstənilən beynəlxalq təşkilat ilk növbədə öz təsir dairəsinin geniş və effektli
olmasında maraqlıdır. Əgər Azərbaycan çıxacaqsa, Avropa Şurasının qərarları, qurumun
gündəlik siyasəti bizim ölkə üzərində öz təsirini itirəcək. Digər tərəfdən,
Avropa məsələlərinin həllində Azərbaycan Avropa Şurasız da iştirak edəcək. Amma
Avropa Şurası Azərbaycanın töhfəsindən istifadə edə bilməyəcək. Azərbaycan isə
bu məsələdə heç nə itirməyəcək. Ora keçirdiyimiz vəsait büdcəmizdə qalacaq,
ölkəmiz yenə də islahatların aparıldığı, eləcə də demokratiyanın mövcud olduğu,
insan hüquqlarının qorunduğu ölkə kimi qalacaq. Azərbaycan yenə də Avropanın
əməkdaşlıq və ikitərəfli əlaqələri inkişaf etdirmək istədiyi ölkə olacaq. Avropa
Şurası Parlament Assambleyası Azərbaycanla bağlı iki qətnamə qəbul edib. Amma
ondan da üstün və səmərəli olan Avropa Birliyinin 20 səfiri Azərbaycana səfərə gəlir,
Prezident İlham Əliyevlə görüşdə ikitərəfli münasibətlər müzakirə olunur və
eyni zamanda dövlət başçısını bu ay Brüsseldə baş tutacaq sammitə dəvət edirlər”.
A.Mirzəzadə qeyd etdi ki, Azərbaycan bu gün Avropa qitəsinin enerji
təhlükəsizliyini təmin edən bir ölkədir: "Vaxtı ilə ulu öndər Heydər Əliyevin
uzaqgörənliyi nəticəsində inşa edilmiş Bakı-Tblisi-Ceyhan neft kəməri
günü-gündən daha artıq tərəfdaş cəlb edir. Məsələn, bu günlərdə Türkmənistan
neftinin BTC vasitəsilə ötürülməsi barədə qərar qəbul edilib. "Şimal-Cənub”
dəmiryol xətti Azərbaycandan keçəcək. "Azəri-Çıraq-Günəşli” neft yataqlarının
istifadəsi barəsində yeni müqaviləyə əsasən, Azərbaycana birdəfəlik 3,6 milyard
dollar bonus veriləcək. Yəni, göründüyü kimi, belə bir ölkəni itirmək Avropa
Şurası üçün doğrudan da təsirli olacaq. Amma seçimi onlar edir. Azərbaycan
əməkdaşlığa hazırdır. Ancaq Yaqland kimi Avropa Şurası təmsilçilərinin dostluq
körpüsünü dağıtmaq istəyi ilk növbədə bu qurum üçün zərərli olacaq”.
Deputat Azərbaycanın Avropa Şurasından çıxacağı halda, ölkəmizin
maliyyə sıxıntıları olacağı ilə bağlı səsləndirilən fikirlərə toxunaraq dedi
ki, bu yanaşmalar doğru deyil: "İlk növbədə ona görə ki, Azərbaycan xaricdən
bir o qədər çox kredit götürməyib. Ölkəmiz biznes layihələri üzrə kredit götürür
və ümumiyyətlə, bu gün Azərbaycanın kreditlərə ehtiyacı belə yoxdur. Bizim
valyuta ehtiyatlarımız 42 milyard dollara bərabərdir və bu, ildən-ilə artmaqda
davam edir. Azərbaycan məhsullarına onsuz da bazar var və bu genişlənməkdədir. Hansı
kredit və investisiyasının kəsilməsindən söhbət gedir? Azərbaycan özü kredit
verən bir ölkədir. Bu gün investor daha çox gəlir götürməkdə, qoyulan
investisiyanın qorunmasında maraqlıdır və o, bazar seçərkən heç də Yaqlandın
fikrini soruşmur. Azərbaycanın Avropa Şurasından çıxması heç də Avropadan
çıxması demək deyil. Ölkəmiz demokratik prinsiplərdən əl çəkməyəcək, insan
hüquqlarının qorunmasını arxa plana atmayacaq, xarici investisiya üçün
əlverişli şərait yaradılması öhdəçiliyindən çıxmayacaq. Ona görə də bəzi ekspertlərin
fikri sadəcə olaraq, cəmiyyəti çaşdırmaq məqsədi güdür”.
Millət vəkili, politoloq
Rasim Musabəyov bildirdi ki, Prezident İlham Əliyevin qeyd etdiyi
kimi, Azərbaycan Avropa Şurasında qalmaqla elə də böyük qazanc əldə etmir,
çıxsa da itiriləsi bir şey yoxdur: "Sadəcə olaraq, Avropa Şurası bir siyasi
meydandır və oranı boş qoymaq düzgün deyil. Onsuz da bu təşkilatda Azərbaycana
xor baxan dövlətlər və onların nümayəndələri var. Onlar qarşı tərəfin cavabını
gözləmədən ermənilərin xeyrinə ard-arda qərarlar qəbul edəcəklər. İndi
təşkilatda təmsil olunduğumuz üçün cavablarını elə oradaca veririk. Yox əgər
çıxarıqsa, Azərbaycan rəsmi şəkildə təşkilatın cavabını verər”.
Bəxtiyar MƏMMƏDLİ