Avropa Şurasından növbəti qərəzli addım
Avropa Şurasının ötən gün keçirilən iclasında növbəti dəfə
Azərbaycanı tənqid edən qərəzli qətnamələr qəbul edilib. Əslində bu və daha
əvvəl qəbul edilən qətnamələrlə Avropa Şurası və onun rəhbərliyi Azərbaycana
olan münasibətinin dəyişmədiyini göstərir.
Onsuz da son dövrlər bir sıra Avropa qurumlarının Azərbaycana qarşı
ikili standartlarla yanaşmasının şahidi olmaqdayıq. Xüsusilə, bu məsələdə
Avropa Şurası birincilik uğrunda mübarizə aparır. Buna misal kimi, AŞ-nin baş
katibi Turbyern Yaqlandın sentyabrın 13-də AŞ-a daxil ölkə səfirlərinin
iclasında Azərbaycana qarşı səsləndirdiyi fikirləri göstərmək olar. O,
ölkəmizin Avropa Şurasından çıxarılmasını təklif etmişdi. Təbii ki, onun
səsləndirdiyi fikirlər heç bir əsası olmadığı üçün dəstək qazanmadı. Lakin bu
onu göstərdi ki, AŞ-dəki anti-Azərbaycan qüvvələr zaman-zaman fürsət əldə
etdikdə, ölkəmizi hədəf seçməkdən çəkinmirlər. Bütün bunlar ondan qaynaqlanır
ki, Azərbaycanın əldə etdiyi uğurlar, ölkəmizin istər region, istərsə də qlobal
səviyyədə həyata keçirilən siyasətin formalaşdırılmasında söz sahibi olması
bəzi siyasi qüvvələri narahat edir və buna görə də ölkəmizə qarşı əsassız
qarayaxma kampaniyaları həyata keçirilir.
Əslində əsas fəaliyyət istiqamətinin demokratik prinsiplər və insan
hüquqlarının müdafiəsi olduğunu bəyan edən Avropa Şurası rəhbərliyində təmsil
olunan insanların siyasi kampaniyaların başında durması həmin qurumun nüfuzdan
düşməsindən xəbər verir. AŞ rəhbərliyində təmsil olunan şəxslərin Azərbaycana
qarşı ikili standartlar yürütməsi, Avropa Şurasına üzv olan 47 ölkə arasında
yalnız Azərbaycana münasibətdə Avropa Məhkəməsinin qəbul etdiyi qərarlardan
narahatlıq keçirməsi, təbii olaraq ölkəmizdə bu quruma birmənalı münasibət formalaşdırmır.
Baş katib T.Yaqlandın Azərbaycanın qurumdan çıxarılması ilə bağlı
təklifi və onun bu mövqeyinə tənqidi yanaşanlara sosial şəbəkə vasitəsilə
aqressiya nümayiş etdirməsi bu insanın qeyri-demokratik düşüncəyə sahib
olduğunu ortaya qoydu. Çox maraqlıdır ki, Azərbaycanı guya Avropa İnsan Haqları
Məhkəməsinin qərarlarını icra etməməkdə təqsirləndirən bir adam Böyük
Britaniya, İtaliya, Fransa və digər dövlətlərlə bağlı Avropa Məhkəməsinin qəbul
etdiyi 10 mindən artıq qərarın yerinə yetirilməməsi barədə bir kəlmə belə
söyləmir. Yaqland yalnız Azərbaycan haqqında danışır və yalanla, iftira ilə
dolu, ziddiyyətli fikirlər səsləndirir. Azərbaycan cəmiyyətinin,
ictimaiyyətinin yekdil olaraq Yaqlandın bu anti-Azərbaycan mövqeyinə qarşı çox
sərt mövqe ortaya qoyması və onun bu mövqeyini tənqid etməsinə baxmayaraq,
Avropa Şurasının baş katibi nəticə çıxararaq, öz ifadələrinə, bəyanatlarına
diqqət yetirmək əvəzinə, elə bəyanatlar, fikirlər səsləndirməyə başlayıb ki,
bu, Avropa Şurası ilə Azərbaycanın münasibətlərinə çox böyük kölgə salır. Nəticə
etibarı ilə Avropa Şurası və onun baş katibinin həyata keçirdiyi bu siyasət sözügedən
münasibətlərinin kəsilməsinə gətirib çıxara bilər.
Onu qeyd edək ki, Azərbaycan 2001-ci ildən Avropa Şurasının üzvüdür
və elə o vaxtdan bu yana ölkəmiz əsassız ittihamlara tuş gəlib. Bu qurumun baş
katibi olan Yaqland isə Azərbaycanın ən ağrılı problemi olan Dağlıq Qarabağ
məsələsi ilə bağlı bir dəfə də mövqe nümayiş etdirməyib. Avropa İnsan Haqları
Məhkəməsinin bir insanla bağlı çıxardığı qərar "insan haqları”ndan, "demokratiya”dan
danışmağa "əsas verdiyi” halda, niyə 25 ilə yaxın bir müddətdə Ermənistanın
işğalçılıq siyasəti nəticəsində öz el-obalarından didərgin düşən insanların pozulan
hüquqları bunu dilə gətirməyə əsas vermir? Niyə Ermənistan qoşunlarının dinc
əhaliyə açdığı atəş nəticəsində uşaqların qətlə yetirilməsinin səbəbkarları Avropa
tərəfindən sanksiyalara məruz qalmır? Sərsəng su anbarı ilə bağlı yaranmış
təhlükə və Ermənistanın uzun illərdir vurduğu ekoloji zərərlə bağlı elə Avropa
qurumlarının qəbul etdiyi qətnamələr niyə icra olunmur?
Avropa Şurasının Azərbaycanla bağlı qəbul etdiyi son qətnamələr isə
həqiqətən də bu qurumun əsil mahiyyətini ortaya qoymuş oldu.
Azərbaycanın AŞPA-dakı
nümayəndə heyətinin rəhbəri Səməd Seyidov gedən müzakirələr zamanı
ölkəmiz əleyhinə səsləndirilən fikirlərə cavab verib. O, hollandiyalı deputat
Omtzigt Pyeterin ittihamlarına sərt münasibət bildirib: "Cənab Omtzigt, siz
burda çox da canfəşanlıq edib, Azərbaycanda demokratiya naminə verdiyiniz
bəyanat və çıxışlarınızla özünüzü obyektiv biri kimi göstərməyə çalışmayın. Biz
çox yaxşı bilirik ki, sizin arxanızda hansı qüvvələr durub. Siz ermənilərlə
birgə işləyirsiniz. Siz yalnız dırnaqarası obyektiv ola bilərsiniz”.
S.Seyidov qeyd edib ki, ümumilikdə AŞPA Azərbaycanla bağlı
qeyri-obyektiv və ikili standartlar siyasəti yürüdür: "Təşkilatın baş katibi
son vaxtlar yalnız və yalnız Azərbaycanın üstünə düşüb. Bütün üzv ölkələrə eyni
və obyektiv münasibət göstərmək əvəzinə, yalnız bir ölkənin adını çəkir. Necə
olur ki, Rusiyanı təşkilata geri qaytarmaq üçün onlara qarşı tamam başqa cür
yanaşır, bizə gəldikdə tamam fərqli münasibət göstərir?"
Azərbaycanın AŞPA-dakı nümayəndə heyətinin üzvü Vüsal Hüseynov da
çıxışında Omtzigt Pyeter, Şvabe Frank kimi parlamentarların erməni lobbi
təşkilatlarının maraqlarını təmsil etdiklərini bildirib.
Bəxtiyar MƏMMƏDLİ