Aqrar sektor ərəblərin diqqət mərkəzində
Sentyabrın 28-də Kənd Təsərrüfatı
Nazirliyində Birləşmiş Ərəb Əmirliklərinin "MBM” şirkətlər qrupunun nümayəndə
heyəti ilə görüşdə aqrar sektorda investisiya tələb edən sahələr və bu sahələrə
sərmayələrin qoyulması ilə bağlı müzakirələr aparılıb.
Nazirliyin mətbuat xidmətinin
məlumatına görə, nazir Heydər Əsədov iki ölkə arasında siyasi və iqtisadi əlaqələrin
yüksələn xətlə inkişaf etdiyini, həmçinin kənd təsərrüfatı sahəsində də əməkdaşlıq
üçün geniş potensialın olduğunu vurğulayıb. Dövlətimizin başçısı tərəfindən aqrar
sahəyə göstərilən diqqət və qayğıdan danışan nazir bu sahənin prioritet elan
olunduğunu və çoxşaxəli inkişaf etdiyini, 11 iqlim tipindən 9-nun Azərbaycanda
mövcudluğunu, ölkəmizdə kənd təsərrüfatının bütün sahələri üçün əlverişli
investisiya mühitinin və böyük ixrac potensialının olduğunu nəzərə çatdırıb.
Görüşdə investisiya tələb
olunan sahələr, xüsusilə də Azərbaycandan Birləşmiş Ərəb Əmirliklərinə və digər
ölkələrə kənd təsərrüfatı məhsullarının ixrac edilməsi məqsədilə aqroparkların,
pestisid istehsalı müəssisəsinin, heyvandarlıq məhsullarının saxlanması və
ticarəti üçün logistik mərkəzin yaradılması, respublikamızda istehsal edilən məhsulların
ixrac imkanları və s. məsələlər müzakirə olunub.
"MBM” şirkətlər qrupunun
korporativ məsələlər üzrə direktoru Federico Carvellini Azərbaycanın Asiya və
Avropada strateji məkanda yerləşdiyini, yüksək inkişaf etdiyini, ölkə rəhbərliyinin
aqrar sahəyə böyük önəm verdiyini nəzərə alaraq kənd təsərrüfatı sahəsində əməkdaşlığa
maraq göstərdiklərini diqqətə çatdırıb. O, səfərdə əsas məqsədin Azərbaycanda kənd
təsərrüfatı sahəsində əməkdaşlıq imkanlarını araşdırıb, aqrar sahənin inkişafı
üçün texniki və maliyyə dəstəyi göstərməkdən ibarət olduğunu bildirib.
Federico Carvellini kənd təsərrüfatı
infrastrukturunun yenidən qurulmasına və aqroparkların yaradılmasına sərmayə
qoyuluşu, Azərbaycanda fəaliyyət göstərən şirkətlərlə əlaqə yaradılması və əməkdaşlığa
dair təkliflərlə Kənd Təsərrüfatı Nazirliyinə müraciət edəcəklərini söyləyib.
Əməkdar
kənd təsərrüfatı işçisi Çingiz Fərəcov qəzetimizə açıqlamasında bildirdi ki, kənd təsərrüfatının
inkişaf etdirilməsi üçün böyük investisiyalara ehtiyac var. Ona görə də bu
sektora xarici investorların cəlb edilməsi önəmli məqamlardandır: "Kənd təsərrüfatı
xalq təsərrüfatının ən ağır sahələrindən biridir. Çünki burada torpaqla işləmək
tələb olunur. Ona görə dünya ölkələri Azərbaycanda kənd təsərrüfatının
inkişafına çox nadir hallarda investisiyalar ayırırlar. Birləşmiş Millətlər Təşkilatının
ərzaq və kənd təsərrüfatı təşkilatı olan FAO kənd təsərrüfatına tətbiq olunan
kiçik layihələr üçün kiçik məbləğlər ayrırır. Lakin bununla kənd təsərrüfatını
qlobal şəkildə inkişaf etdirmək qeyri-mümkündür. Amma indi ərəb ölkələrinin Azərbaycanda
kənd təsərrüfatına investisiya ayırması təqdir olunacaq bir şeydir. Çünki bizim
dövlətimizin büdcəsində kənd təsərrüfatına tələb olunan qədər vəsaitin
ayrılması üçün imkan yoxdur. Ona görə xarici ölkələrin investisiya ayırması
arzuolunandır. Həm də prezidentimiz pambıqçıların respublika müşavirəsində, eləcə
də Nazirlər Kabinetinin iclaslarında dəfələrlə qeyd edib ki, ayrı-ayrı
rayonlar, nazirliklər, komitələr, şirkətlər xarici investorların cəlb olunması
üçün çalışmalıdırlar”.
Ç.Fərəcov investisiya yatırmaq üçün müxtəlif sahələrin
olduğunu dedi. Onlardan biri istixanalardır: "Düzdür, respublikamızda
istixanaların sayı gündən-günə artır, ərazilərin miqdarı ildən-ilə genişlənir.
Lakin respublikamızda, xüsusilə bu il tərəvəzə olan tələbat çox zəif ödənildi.
Bu il tərəvəz olmadı. Pomidorun qiyməti 2 manat 50 qəpiyə qədər yüksəldi. Bu da
Azərbaycanda görünməmiş hadisədir. İnvestisiyalar istixanaların genişləndirilməsinə
ayrıla bilər. Bu istixanalarda təkcə tərəvəz yox, üzüm, kiçik parnik
ağaclarında meyvə də yetişdirmək mümkündür”.
İnvestisiya ayrılmalı sahələrdən birinin də ətlik
maldarlıq olduğunu deyən Ç.Fərəcovun sözlərinə görə, hər il ərəb ölkələrində
Qurban bayramı çox geniş qeyd olunur. Səudiyyə Ərəbistanı, Qətər hər il Azərbaycandan
qurbanlıq qoyunlar istəyir: "Bizdə isə onlara veriləcək qurbanlıq qoyunlar elə
də çox deyil. Ona görə də qoyunçuluğu inkişaf etdirmək, sayı artırmaq,
qoyunları kökəltmək üçün investisiyalar ayrıla bilər. Azərbaycanda
xırdabuynuzlu heyvanların, yəni qoyunların kökəldilməsi üzrə ayrı-ayrı
komplekslər, təsərrüfatlar istifadəyə verilə bilər”.
Ç.Fərəcov deyir ki, hinduşka təsərrüfatlarının
yaradılması da perspektivlidir. Eyni zamanda, o bildirdi ki, müasir bağların
salınmasına ehtiyac var.
Ç.Fərəcov qeyd etdi ki, əgər bu investisiyalar müsbət
nəticələr verərsə, vaxtında ayrılarsa, məhsul istehsalı intensiv şəkildə
artacaq: "Məhsul xarici ölkələrə də ixrac oluna bilər. Son vaxtlar ölkədə
pambıqçılıq, tütünçülük, baramaçılığın inkişafına diqqət artırılıb. Lakin bunu
həddindən artıq genişləndirmək üçün imkanlar məhduddur. Bu sahələrə də investisiyalar
ayrıla bilər. Bizdə Misir sortu pambığı əkilə bilər. Amerikada gözəl tütün
sortları var. Onları, Trabzon və başqa sortları əkmək olar. Yeni fındıq bağları
salına bilər. Nəinki ərəb ölkələrinin, digər ölkələrin də investisiya yatırması
təqdir olunan haldır və bunun üçün geniş iş aparılmalıdır”.
İqtisadçı ekpsert Rəşad
Həsənov deyir ki, Azərbaycanın
aqrar sektoru bir çox xarici investorlar üçün maraqlıdır: "Məsələn, ərəb ölkələrindən,
Polşa, hətta Kanadadan Azərbaycanın aqrar sektoru ilə maraqlanan investorlar
var. Amma ölkədəki investisiya mühiti bu istiqamətdə real fəaliyyətlərin baş
tutmamasına gətirib çıxarır. Əgər aparılan islahatlar ölkədə normal investisiya
mühiti formalaşdıracaqsa, ölkənin bir neçə iqtisadi istiqaməti üzrə xarici
investisiyanı cəlb etmək mümkündür ki, onlardan biri də aqrar sektordur. Azərbaycanda
bu sektor indiyə qədər daha çox ekstensiv inkişaf yolu keçib. Hazırda ölkənin təbii
şəraiti, iqlim qurşaqları, torpaq ehtiyatları imkan verir ki, burada intensiv
formada innovasiyanın tətbiq edilməsi ilə daha ciddi məhsuldarlıq əldə edilsin
və sektorun səmərəliliyi artırılsın”.
Ekspertin sözlərinə görə, Azərbaycanın kənd təsərrüfatına
maliyyə yatırılmasının müsbət tərəflərindən biri odur ki, məhsulun bazarı var:
"Azərbaycanda istehsal olunan kənd təsərrüfatı məhsullarının xaricə ixrac edilməsi
üçün hər hansı problem yoxdur. Xüsusilə, Rusiya Azərbaycanın kənd təsərrüfatı məhsullarını
ixrac etmək üçün əsas bazar hesab olunur. Orada tələbat kifayət qədər böyükdür.
Bu isə o deməkdir ki, Azərbaycanda istehsal mühitini normallaşdırıb, keyfiyyətli
məhsul istehsal edib, bu bazarlara çıxarılmasını təmin etmək o qədər də çətin
deyil. Əsas problem bu istiqamətə investisiyanın yatırılması və rəqabətqabiliyyətli
məhsulun istehsal edilməsidir”.
R.Həsənov deyir ki, ərəblər səhralıqda kənd təsərrüfatı
quran insanlardır. Onların kənd təsərrüfatına baxışları tam fərqlidir: "Məsələn,
İsrail səhranın ortasında, qumun içində elə bir kənd təsərrüfatı istehsalı
formalaşdırıb ki, hətta dünya ölkələrinə kənd təsərrüfatı məhsullarını ixrac
edir. Onların ölkəyə gəlməsi təcrübə və əlavə investisiya baxımından müsbət
haldır. Ümid edirəm ki, deyilənlər reallaşacaq”.
Aygün Asimqızı