Amerikada top həkim seçilən azərbaycanlı
Nərgiz Muğanlinskaya: "Hər bir işi görəndə, gələcəkdə
alacağın uduşda gözün olmalıdır”
İki dəfə
Amerikanın Baltimor şəhərinin top həkimi seçilib. Deyir ki, uğura gedən yol heç
vaxt yüngül olmur. O yol yüngül olsa idi, onda hamı uğurlu olardı. Uşaqlığından
həkim olmaq istəyib. Çətinliklərdən qorxmayıb. Düşünür ki, hər bir işi görəndə,
gələcəkdə alacağın uduşda gözün olmalıdır. O uduşu qazanmaq şansın səni uğura
aparacaq.Müsahibimiz
Amerikada yaşayan həkim, professor Nərgiz
Muğanlinskayadır.Bakıda
anadan olub. 90-cı illərdə Həbib bəy Mahmudbəyov adına 2-nömrəli
texniki-humanitar liseydə təhsil alıb. Orta təhsilini qızıl medalla bitirdikdən
sonra Azərbaycan Tibb Universitetinin Müalicə işi fakültəsinə daxil olub və oranı
da qırmızı diplomla bitirib: "2003-cü ildə Amerikaya köçməli oldum. Orada da
tibbi elmləri üzrə magistr dərəcəsini aldım. Ondan sonra isə rezidenturada təhsil
aldım və bitirən kimi məni orada proqram direktorunun müavini vəzifəsində saxladılar.
Burada 6 il işləyəndən sonra nüfuzlu hospitallardan biri rezidentura proqramı
açaraq məni oraya proqram direktoru vəzifəsinə dəvət etdi. İyunun 29-da biz ilk
rezidentlərimizi qəbul etdik. Məni sevindirən fakt odur ki, həmin rezidentlərin
içində həmvətənlərim, yəni azərbaycanlılar da var”.
- Tibbi universitetini qırmızı diplomla bitirdikdən
sonra Amerikaya köçdünüz. Ümumiyyətlə, Amerika macəranız necə başladı?
-
Yoldaşım kimyaçıdır. Ona Amerikada iş təklif etdikləri üçün bütün ailəmiz
buraya köçəsi oldu. Amerikaya gələndə ən böyük çətinlik buranın sisteminə
uyğunlaşmaq, ingilis dilini lazımi səviyyədə öyrənmək idi. Hətta bura gəlməzdən
öncə 4 saylı xəstəxanada cərrahiyə internaturasını bitirmişdim. Lakin Amerikaya
gələndən sonra depressiyaya düşdüm. Nə işlə məşğul olacağımı, harada işləyəcəyimi,
ümumiyyətlə, bu ölkədə peşəkar mənliyim nədir bilmirdim.
- Universiteti qırmızı diplomla bitirən biri üçün
Amerikada nə işləyəcəyini bilməmək yəqin ki, asan deyildi... Bəs necə oldu
orada həkim kimi fəaliyyətə başladınız?
- Əvvəllər
mənə də burada həkim işləmək əlçatmaz gəlirdi. Sonra anladım ki, məqsəd varsa,
insanın həyata keçirməyəcəyi xəyalı qalmaz. Bu, Azərbaycanda da belədir,
Amerikada da. Amerikada yenidən rezidentura təhsili almalı idim. Babamın işlədiyi
tibb sahəsini seçmək qərarına gəldim. Babam terapevt idi. Mən da ona baxıb həmişə
onun kimi olmaq istəyirdim. Bura gələndə cərrahiyə və terapiya arasında qaldım
və terapiyanı seçdim. Buna səbəb babamın danışdığı bir əhvalat idi. Kimsə ona
deyəndə ki işdən çıxaracağam səni, o da cavab verirdi ki, işdən çıxara bilərsən,
amma "stetoskop”u əlimdən almağa gücün çatmaz. Məsələn, cərrah həkimin işi bir
çox adamdan, yəni assistent, narkozçu və s. asılıdır, terapevt isə xəstə ilə
birbaşa, heç kimin köməyi olmadan işləyir.
- Amerikada həkim olmaq üçün nə etmək lazımdır?
- Amerikada
həkim olmaq istəyənlər üçün internetdə kifayət qədər resurs və məlumatlar
mövcuddur. Namizəd, müvafiq testlərdən keçməlidir və ondan sonra rezidenturaya
qəbul olunmaq üçün sənədləri verir. İstiqamətdən asılı olaraq, rezidentura müddəti
3-5 il arasında davam edir. Ondan sonra bir dəfə də imtahan verirsiniz. O
imtahan sizə yüksək səviyyəli həkim adını qazandırır.
- Buradakı xəyallarınızdan keçib, Amerikada
sıfırdan başlamısınız. Motivasiya mənbəyiniz nə idi?
- Mən ömrüm
boyu həkim olmaq istəyirdim. Elə motivasiyam da özümü həkim kimi təsəvvür etməyim
idi. Buraya köçəndən sonra ayrı bir işlə məşğul olmağı təsəvvür belə edə bilməzdim.
İşimin ustası olmaq məqsədim idi. Mən istəyərdim ki, ailəm və ölkəm mənimlə həmişə
fəxr etsin. Çox çalışdım, hədəf qoydum, ailəmin də dəstəyi ilə istədiyim yerə
çatdım.
- Artıq uzun müddətdir ki, Amerikada yaşayırsınız.
Azərbaycanda ən çox nə üçün darıxırsınız?
- Mən
ilk dəfə bura gələndə insanlar Azərbaycan barədə çox az bilirdilər. Hər yerə xəritə
ilə gedir, onlara Azərbaycanı göstərirdim. Ölkəmin hər qarışı, adət-ənənəsi mənim
üçün dəyərlidir. Ən çox yeməklərimizdən ötrü darıxıram. Həqiqətən də dünyada ən
dadlı yeməklər bizdədir. Azərbaycanın ruhu, atmosferi, mədəniyyəti, adətləri, ən
əsası isə insanlarından ötrü darıxıram. Azərbaycanlı tələbələrlə tez-tez ünsiyyətdə
olub, onlara burada rezidenturaya qəbul üzrə məsləhətlər verirəm. Bundan 1 il
öncə tələbələrlə skayp görüşü edirdim. Bizim çox istedadlı gənclərimiz, cavan həkimlərimiz
var.
- Uğur sirriniz nədir? Xüsusilə, əcnəbi ölkədə
qadın kimi hansısa çətinlikləriniz olubmu?
- Uğura
gedən yol heç vaxt yüngül olmur. O yüngül olsa idi, onda hamı uğurlu olardı. Mən
həmişə öz tələbələrimə deyirəm ki, həkimlik çox xüsusi peşədir. Bu peşə ancaq
seçilmiş insanlar üçündür. Kimsə doğurdan da həkim olmaq istəyirsə, ən yaxşı həkim
olmağı özünə hədəf qoysun. Çətinliklərə rast gələndə qorxmasınlar. Burada bir məsəl
var deyirlər ki, gələcəkdə alacağın uduşda gözün olsun. Yəni əldə edəcəklərini
düşün. Onda sən başa düşəcəksən ki, çətinliklər hamısı dərs idi. İstənilən peşədə
qadın olmaq əlavə çətinliklər yaradır. Burada belə bir söz var ki, qadın işdə
özünü elə aparmalıdır ki, ailəsi yoxdur, evdə özünü elə aparmalıdır ki, işi
yoxdur. Bu əlavə təzyiq, stress yaradır. Buna baxmayaraq, qadın həkim olmaq çox
gözəl hissdir. Pandemiya dövründə həkimliyin necə vacib peşə olduğunu, həkimlərin
necə fədakar olduqlarını gördük. Bütün dünya dayansa belə, həkimlər işləyəcək.
- Nərgiz xanım, koronavirusla Amerika da mübarizə
aparır. İnsanlar stress, qorxu içindədirlər. Həmyerlilərinizə nə demək istərdiniz?
- Təşviş,
həyəcan hər yerdə olub. Onun əsas səbəbi odur ki, insanlar bilmədiyi şeydən həmişə
qorxurlar. Spesifik koronavirus barədə isə biz çox az bilirdik. Mənə elə gəlir
ki, əsas faktor da budur. Burada əsas ümidlərdən biri odur ki, mutasiyaya
uğrayıb insan üçün təhlükəsiz bir virusa çevriləcək. Başa düşüləndir ki,
karantin şəraitində yaşamağa məcbur olan insanlar stress və depressiyaya məruz
qalırlar. Lakin, burada mütləq anlamaq lazımdır ki, karantinin əsas məqsədlərindən
biri də birdən-birə çox adamın xəstələnməsinə mane olmaqla, resursların
çatışmazlığının qarşısının alınmasıdır. Praktiki olaraq, hər bir yeni xəstəliyə
nə qədər gec yoluxsan, o qədər da yaxşıdır. Çünki vaxt keçdikcə hər bir xəstəliyin
müalicəsi aşkar olunur və çarəsi tapılır. İlk mərhələdə yoluxanlar isə çox əziyyət
çəkirlər. Biz bunu 80-ci illərdə, QİÇS virusu təzə aşkar olunanda müşahidə
etdik. Əvvəllər həmin virusdan çox adam ölüb. İndi isə vəziyyət tam başqadır,
çünki müalicə üsulları və dərmanlar artıq bəllidir. Həmin dövrdə ümidsiz hesab
olunan xəstələr indiki dövrdə sağlam insanlar qədər yaşamaq imkanına malikdirlər.
Bu koronavirusa da aiddir, çalışın ki, özünüzü qoruyun, sağlam qalın. Xəstələnmək
qismətinizdirsə, mümkün qədər gec xəstələnin çünki gələcəkdə bu xəstəlik üçün də
müalicə çətin olmayacaq. Ona görə də səbr etmək lazımdır.
- "Sınmış ürək sindromu” adlı nadir xəstəliklə
bağlı dissertasiyanı müdafiə etmişiniz. Bu xəstəliklə bağlı məlumat verərdiniz?
- "Sınmış
ürək sindromu”na həkimlər çox vaxt diaqnoz qoya bilmir. Bu xəstəliyi çox az həkim
tanıyır. Bu sindromun patologiyası budur ki, xəstə ürək çatışmazlığı və infarkt
simptomları ilə gəlir. Onu yoxlayanda görürlər ki, xəstə infarkt keçirməyib. Bu
zaman ürəyin döyünmə gücü azalır. Ona görə də bu xəstələr ürək çatışmazlığı simptomları
ilə daxil olur. Kimsə stress, həyəcan, emosiya keçirəndə bu sindrom baş verir. Stressdən
sonra baş verdiyinə görə bunu "sınmış ürək sindromu” adlandırırlar. İnfarkt isə
fərqlidir. Statistika göstərir ki, klassik infarktı, daha çox kişilər, sınmış
ürək sindiromunu isə qadınlar keçirir. İnfarktda sol tərəfdən sancı olur. O
sancı ya həyəcandan, ya da fiziki hərəkətdən sonra müşahidə olunur. Hərdən hava
çatışmır. Əl və boynun keyiməsi kimi simptomlar olduqda həkimə müraciət etmək
lazımdır. Təəssüflər olsun ki, qadınlarda bu simptomlar qeyri-adi olur.
Standart olmur. Bütün tibb kitablarında həkimlərə öyrədilən simptomlar
qadınlarda olmaya da bilər.
- Amerikada 2 dəfə top həkim seçilmisiniz...
- Bəli,
bu uğur məni çox sevindirdi. Top həkimi seçmək üçün ildə 1 dəfə bütün həkimlərə
sorğu göndərilir. Ən güclü həkimlərin adlarının yazılması xahiş olunur. Sorğu
belə olur ki, bu həkimlər öz ailə üzvlərini hansı həkimə göndərərdilər? 2 dəfə
seçildim. Bu, çox nüfuzlu nailiyyətdir. Mən 2018-2019-cu ildə terapevtlər
arasında ən çox səs toplamışam. Çox sevinirəm ki, amerikalı həkimlər öz ailə
üzvlərinin sağlamlığını mənə etibar edirlər.
- İki övladınız var. Peşə seçimində dəstək
olursunuzmu? Ümumiyyətlə, övladlarınızı necə istiqamətləndirirsiniz?
- Müasir
dövrdə valideynlər düşünür ki, uşaq öz peşəsini özü seçməlidir. Mən bununla
razı deyiləm. Övladlarıma istiqamət verməyin tərəfdarıyam. 1-2 il öncə
uşaqlarla belə bir oyun oynadıq. Bir vərəq qələm götürdük. Mən uşaqlardan
soruşdum ki, siz hansı evi və maşını istəyirsiniz? Onlar seçdilər və biz qiymətlərinə
baxıb, vərəqə qeyd etdik. Sonra dedim ki, siz ildə neçə dəfə istirahətə getmək
istəyirsiniz? Dedilər 2 dəfə. İstirahət paketlərinə baxdıq. Həyat üçün əhəmiyyətli
maddi dəyəri olan məqamları hesabladıq. Nəticədə hansısa rəqəmə çatdıq və bunu
12 aya böldük. Qərara gəldik ki, ayda filan qədər pul lazımdır ki, bunları edə
bilək. Sonra baxdıq ki, hansı peşələr uşaqlara bu gəliri verə bilər. Həmin peşələri
seçdik və onlara çatmaq üçün də çox oxumaq lazım olduğunu başa düşdüklərinə əmin
oldum. Heç vaxt uşağı sındırmaq olmaz. Amma ona istiqamət vermək çox vacibdir.
Aygün ƏZİZ