“ÜAK-ın qeydiyyatının ləğvi məqsədyönlü şəkildə ortaya atılıb”
Rusiya
ilə Azərbaycan arasında münasibətlər yüksək səviyyədədir və bütün sahələr üzrə
qarşılıqlı səmərəli əməkdaşlıq əlaqələri inkişaf etməkdədir. Azərbaycan Şimal
qonşusu ilə münasibətlərin strateji xarakter daşıdığını hər zaman bəyan edib,
ticarət-iqtisadi, siyasi əlaqələrin daha da möhkəmlənməsində maraqlı olub. Eyni
zamanda Azərbaycan dövləti bütün hallarda Rusiyanın regiondakı strateji
maraqlarını nəzərə alıb, beynəlxalq təşkilatlar çərçivəsində faydalı əməkdaşlıq
əlaqələri qurulub və qarşılıqlı dəstək ruhu hökm sürüb.
Bundan
başqa, Azərbaycan dövləti rus dilinin və mədəniyyətinin qorunub saxlanması,
rusdilli təhsil müəssisələrinin, rus icmasının və digər bu kimi təşkilatların fəaliyyətinin
təmin edilməsi, ölkədə yaşayan çoxsaylı rus icması nümayəndələrinin vətəndaş
hüquqlarının təmin olunması üçün də bütün zəruri addımları atıb və atmaqdadır.
Lakin əfsuslar olsun ki, son zamanlar bəzi Kreml rəsmilərinin, eləcə də
Rusiyanın bir sıra rəsmi dairələrinin davranışlarında ölkələrimiz arasındakı
münasibətlərə xələl gətirəcək davranışlar müşahidə olunmaqdadır.
Rusiya
Ədliyyə Nazirliyi tərəfindən Ümumrusiya Azərbaycanlıları Konqresinin (ÜAK)
qeydiyyatının ləğv edilməsi ilə bağlı məhkəməyə müraciətin edilməsi də bu qəbildəndir.
Ehtimal var ki, Rusiya Ədliyyə Nazirliyi tərəfindən qaldırılmış iddia əsasında
mayın 15-də keçiriləcək məhkəmə prosesində ÜAK-ın qeydiyyatı ləğv ediləcək. Təbii
ki, bu vəziyyət həm Rusiyadakı azərbaycanlıları, həm də Azərbaycan cəmiyyətini,
o cümlədən ölkəmizdəki rus icmasını narahat etməyə bilməz. Məhz bu
narahatlıqdan irəli gələrək, sıralarında milliyyətcə rus olan 120 min Azərbaycan
vətəndaşını birləşdirən Azərbaycanın Rus İcmasının Respublika Şurası bir daha bəyanat
yayıb. Bəyanatda bildirilib ki, Rusiyada müəyyən qüvvələr ÜAK-ın təşkilati fəaliyyətində
xırda çatışmazlıqları axtarmaqla, Rusiyanın böyük ictimai təşkilatının ləğvinə
şərait yaratmağa çalışırlar. Qeyd olunub ki, bu münasibət Azərbaycan və Rusiya,
Azərbaycan və rus xalqları arasındakı dostluq əlaqələrinin inkişafına və genişlənməsinə
xidmət etmir. Bəyanatın sonunda Rusiyadakı sağlam qüvvələrə çağırış edilib ki,
ÜAK-ın ləğvinə yönəlmiş niyyətlərin gerçəkləşməsinə imkan verilməsin. Azərbaycanın
Diasporla İş üzrə Dövlət Komitəsi də ÜAK-ın ləğv edilməsi üçün məhkəməyə göstərilən
təzyiqlərlə bağlı etiraz bəyanatı yayıb.
Bunlarla
yanaşı, Azərbaycan cəmiyyətinin təmsilçiləri də ayrı-ayrılıqda müxtəlif media
qurumlarında çıxış edərək, ÜAK-ın ləğv edilməsi üçün məhkəməyə göstərilən təzyiqlərə
münasibət bildiriblər. Azərbaycan
Prezidenti yanında Dövlət İdarəçilik Akademiyasının professoru, siyasi elmlər
doktoru Elçin Əhmədov bu barədə "Kaspi”yə açıqlamasında qeyd edib ki, Rusiya
Ədliyyə Nazirliyi tərəfindən qaldırılmış iddia əsasında mayın 15-də keçiriləcək
məhkəmə prosesində ÜAK-ın qeydiyyatının ləğv edilməsi Şimal qonşumuzda anti-Azərbaycan
qüvvələrin fəallaşmasının göstəricisidir. Onun sözlərinə görə, Rusiyada erməni
lobbisi ilə birgə fəaliyyət göstərən bir sıra qurumların fəallığı da məsələnin
bu həddə gəlib çatmasına səbəb olub: "Bu hadisə nəinki Azərbaycan vətəndaşlarını,
eləcə də bütün dünyadakı azərbaycanlıları narahat edir. Çünki ÜAK-ın ləğvi
siyasiləşmiş şəkildə, məqsədyönlü şəkildə ortaya qoyulub. Tarixən Rusiya və Azərbaycan
arasında əlaqələr yüksək səviyyədə olub. Bu gün də bu belədir. Prezident
Vladimir Putin də dəfələrlə çıxışlarında qeyd edib ki, Rusiya üçün Azərbaycan
strateji tərəfdaşdır. Rusiyada çoxmilyonlu azərbaycanlı icması yaşayır, onlar
Rusiyanın ictimai-siyasi, sosial-iqtisadi və mədəni həyatında fəallıqları ilə
seçilirlər. Rusiyanın Azərbaycan əsilli vətəndaşları fəal seçici və vergiödəyiciləridirlər.
Rusiyanın azərbaycanlı icması da iki ölkə arasında siyasi, iqtisadi, mədəni
münasibətlərdə körpü rolunu oynayır, bu əlaqələrin sağlam məcrada saxlanmasına
tərəfdardır. Belə olan halda, Azərbaycan icmasının ən böyük ictimai birliyinin
qeydiyyatının ləğv edilməsi çoxmədəniyyətli,
polietnik Rusiya cəmiyyətinin öz xarakterinə ziddir. Bu, Rusiyada tolerantlıq
mühitini, millətlərarası münasibətləri təhdid edən addımdır. Məhkəmənin belə qərar
qəbul etməsi Rusiya ilə Azərbaycan arasında ikitərəfli əlaqələrə də kölgə salar,
onları zədələyər. Düşünürəm ki, əgər belə arzuolunmaz qərar qəbul edilərsə, bu,
Rusiyanın regiondakı fəaliyyətinə, bitərəf mövqeyinə kölgə salacaq. Ümid edirik
ki, Rusiyadakı sağlam qüvvələr bu kimi reallıqları nəzərə alacaq, ədalətli qərarın
qəbul edilməsinə nail olacaqlar”.
İctimai Problemlərin Tədqiqi
Assosiasiyasının sədri, tarixçi-alim Məhərrəm Zülfüqarlıda hesab edir ki, ÜAK-ın ləğvi barədə qərarın qəbul edilməsi istiqamətində
atılan addımlar Rusiyadakı anti-Azərbaycan dairələrin və erməni lobbisinin Rusiya
və Azərbaycan arasında münasibətləri yenidən sınaq qarşısında qoymaq niyyətindən
irəli gəlir. Onun fikrincə, belə bir addım Ermənistana hərbi yardımın artırılması
fonunda baş verirsə, bu, Rusiyanın Dağlıq Qarabağ münaqişəsinin həllində tərəfsiz
vasitəçi missiyasına, ATƏT-in Minsk qrupunun həmsədri mandatına da kölgə salır:
"Azərbaycan-Rusiya münasibətləri yüksələn xətt üzrə inkişaf edir. Son dövrlər
ÜAK ətrafında baş verənlər bu münasibətlərə qısqanclıqla yanaşan qüvvələrin fəaliyyətindən
irəli gəlir. Azərbaycanın müstəqil siyasət yürütməsi, qütbləşən dünyada kiminsə
yanında yer alıb kimlərə qarşısa olmaması, hətta ən çətin məqamlarda Rusiyaya tətbiq
edilən embarqolarda iştirak etməməsi, Rusiya-İran-Azərbaycan formatında Bakıda ən
yüksək səviyyədə görüşün keçirilməsi, Vladimir Putin və İlham Əliyev arasındakı
sıx dostluq əlaqələri heç də hamını məmnun etmir. Buna görə də Rusiya rəhbərliyi
ayıq-sayıq olmalı, ölkələrimizarası münasibətlərə hər hansı formada xələl gətirə
biləcək addımın qarşısı zamanında alınmalıdır”.
Rufik İSMAYILOV