Ailəvi baxdığımız Yeni il filmləri
İnsanlar müxtəlif olduqları kimi,
düşüncələri, seçimləri də fərqlidir. Bu, film seçimi mövzusunda da eynidir. Hər
kəs boş vaxtında izləmək üçü zövqünə uyğun filmlər seçir. Amma bu dəfə sizinlə
Yen il əhval ruhiyyəsini əks etdirən filmlərin siyahısını bölüşəcəyik.
İlk film "Şaxta baba” (The Santa Clause) adlanır. Bu filmdə Yeni il ərəfəsində ata ilə oğulun münasibətlərindən
danışılır. Belə ki, oğlu Çarli ilə münasibətlərində bəzi problemlər olan Skott
Kalvin bir qəzaya şahid olur. Tapın görək bu qəza kimin başına gəlir? Yeni il
ərəfəsində uşaqlara hədiyyə paylamalı olan Şaxta babanın. Qəzadan sonra yeriməyə
çətinlik çəkən Şaxta baba bütün işləri Skottun üzərinə qoyur. Bu işi sevə-sevə
üzərinə götürən Skott Şaxta baba libasını geyinərək uşaqlara hədiyyələr verir. Qısa
zamanda yeni işini sevən Skottun, oğlu ilə də münasibətlərində dəyişikliklər
müşahidə olunur.
İkincisi isə romantik komediya janrında olan "Tətil” (The holiday)
filmidir. Baş rollarını Cud Loy, Kameron Dias, Keyt Uinslet və Cek Blek
oynayırlar. Filmdə Yeni il tətilində evlərini dəyişən iki həmkar xanımın tətil
boyunca yaşadıqları macəradan danışılır. Biri amerikan, digəri ingilis olan
qəlbi qırıq xanımlar yeni eşq axtarırlar. Belə ki, bu xanımlardan biri xəyanətə
uğrayaraq sevgilisindən ayrılıb, digəri isə uzun zamandır gizli sevdiyi bəyin
başqa biri ilə nişanlandığını eşidir. Beləcə, xanımlar baş verən bu kədərli
hadisələri unutmaq üçün bir-biriləri ilə ölkələrini, evlərini dəyişirlər.
"Qütb ekspresi” (The Polar
Express) filmi isə 3-cü sırada yer
aldı. Uşaqların sevərək izlədiyi bu animasiya filmində balaca oğlanın qatarda
səyahət edən zaman başına gələnlərdən bəhs edilir. Bu film Şaxta babaya
inanmayanlar üçün çəkilib desək, yanılmarıq. Filmi izlədikdən sonra fikirləriniz
dəyişəcək. Balaca oğlan Şaxta babanın varlığına inanmır. Bu oğlan yeni il ərəfəsində qəribə bir qatara minir və
qütbə doğru yola düşür. Yol boyunca qatarda bir çox
möcüzəli hadisələr yaşanır. Bununla da balacanın Şaxta babaya olan inamı
yavaş-yavaş geri qayıdır. Əslində, oğlan qatarın onu Cənub qütbünə apardığını
bilmir. Filmi izləyərkən istər-istəməz hadisələrin təsirinə düşürsən. Oğlanın
oradan necə qayıtdığını, başqa hansı hadisələrin şahidi olduğunu isə film
izləyərkən biləcəksiniz.
"34-cü küçədə möcüzə” (Miracle on 34-th
street) filmi 4-cü sıradadır. Yeni ilin bütün ab-havasını özündə əks
etdirən bu film, ən çox izlənənlər arasındadır. Fantastik komediya janrında
olan film, Kris adlı bir bəyin Şaxta baba qiyafəsi geyinməsi ilə başlayır. Kris
işini o qədər sevir ki, bir müddət sonra özünün həqiqətən də Şaxta baba
olduğuna inanmağa başlayır. İmkansız deyə bir şeyin olmadığını Yeni il gecəsi
bizə xatırladan bu filmin baş rolunda Hollivudun unudulmaz siması Natali Vudun 9 yaşındakı
halını görürük. 96 dəqiqəlik film ilk dəfə 1947-ci ildə çəkilib. Oskara layiq
görülən bu film, 1973-cü ildə televiziya, 1994-cü ildə isə kinotetar üçün
yenidən çəkilib.
Yeni il
əhval-ruhiyyəli filmlərdən danışıb, "Evdə
təkbaşına” (Home alone) filminin adını çəkməsək, olmaz. Eyni ad altında 4
film çəkilib. "Evdə təkbaşına 1,2,3,4,” adı ilə məşhurlaşan bu kinolar
uşaqlarla birlikdə böyüklərin də ürəyinə yol tapıb. Böyük həvəslə ailəvi
şəkildə izlənilən bu filmlər içərisində "Evdə təkbaşına 1 və 2”-də yer alan
Kevin daha çox sevilir. Evə girib soyğunçuluqla məşğul olan oğrulara qarşı öz
üsulları ilə mübarizə aparan Kevini izləməkdən yorulmayanlar, illərdir ki, hər
Yeni il ərəfəsində bu filmin kanallarda nümayişini böyük həvəslə gözləyir.
Günel
Azadə