Ailəli deyil, ailə olmağı bacaran cütlük - Ailə
Cabir Süleymanlı: "Xoşa gəlməyən bir xüsusiyyət
görəndə bunu sevdiyin şəxsə uyğun bir dillər izah etməlisən”
Nərgiz Süleymanlı: "Evlənən şəxs bilməlidir ki,
həyat yoldaşı olacaq insanın tək özü ilə yox, onun bütün müsbət, mənfi
keyfiyyətləri ilə evlənir”
Düşünürlər
ki, evlənəcəyin şəxsi dəyişməyə çalışmamalı, olduğu kimi qəbul etməlisən.
Həmçinin həyat yoldaşının mənfi xüsusiyyətlərini başqalarının yanında danışmağı
düzgün hesab etmirlər.
"Ailə”
rubrikamızın budəfəki qonaqları "Auxitec”
şirkətində Biznesin idarə edilməsi üzrə menecer işləyən Cabir Süleymanlı və
həyat yoldaşı psixoloq Nərgiz Süleymanlıdır. Cütlüyümüzün Yusuf və Ömər
adlı iki övladı var.
"O qızı tapın”
Cütlüyümüzlə
söhbətə tanışlıq tarixləri ilə başladıq. Cabir deyir ki, tanışlıqları onun
fərdi təşəbbüsü ilə olub: "İlk dəfə bir-birimizi qatıldığımız tədbirdə
görmüşük. Hər şey təsadüf nəticəsində oldu. O zaman ortaq dostlarımızın
olduğunu belə bilmirdim. Nərgiz ilk görüşdən gözlərinin rəngi ilə diqqətimi
cəlb etdi və tədbirdən sonra "O qızı tapın” kinosundakı kimi onu axtarmağa
başladım. Axtarış zamanı məlum oldu ki, Nərgiz çox yaxın, tələbəlik dövründə
bir evdə qaldığım dostumun həyat yoldaşı ilə universitetdə bir oxuyub (gülür).
Ortaq tanışlar vasitəsilə axtardığım xanımı tapdım və beləcə yavaş-yavaş
münasibətin qurulması mərhələsinə keçdik”.
Cabir
düşünür ki, tanışlığın, ilk görüşün harada olması yox, sonrakı dönəm,
münasibətin hansı istiqamətdə irəliləyəcəyi önəmlidir: "Bəzən kimlərsə
insanları qınayır ki, toy kasetindən özünə həyat yoldaşı seçir və ya sosial
mediada tanış olduğu biri ilə evlənir. Məncə, bunlar elə də böyük əhəmiyyət
daşımır. Yəni kimisə haradasa görməlisən. Kasetdə, "instagram”da, "facebook”da,
avtobusda, metroda və ya başqa hardasa görməyin nə fərqi var? İlkin görmə
prosesi necə olur-olsun baş verməlidir. Əsas olan ilkin görüşdən sonra
münasibətin necə qurulmağıdır”.
Nərgiz isə
baş verənlərdən xəbərsiz imiş: "Söhbət 2012-ci ildən gedir və həmin dövrdə 23
yaşımız vardı. Elə bir yaş dövründə idim ki, insanların simasına diqqətlə
baxmırdım, magistr təhsilim haqqında düşünürdüm, özümü inkişaf etdirmək üçün
tədbirlərə qatılırdım. Cabir də məni həmin tədbirlərdən birində görüb, amma
özüm qəti fikir verməmişdim. Sonradan ortaq dostlarımızın təkidi ilə Cabirə
şans vermək qərarına gəldim (gülür)”.
Biz daha dəbdəbəliyik, köklü ailəyik
Nərgizin
Cabirə şans verməsi ilə münasibətlərinin ilkin mərhələsi başlayır.
Həmsöhbətlərimizdən bu mərhələnin necə keçməli olduğunu soruşuruq. Cabir
düşünür ki, münasibətin bu dövründə tərəflər özlərini olduqları kimi
tanıtmalıdırlar: "Hazırda bizim yaşda olan şəxslərin evlənməkdə çətinlik
çəkdiyini görürük. Bu isə bəzən insanların özlərini olduqları kimi təqdim
etməməklərindən irəli gəlir. Həm xanımlar, həm də bəylər evlənənə qədər
özlərini olduqlarından fərqli göstərməyə çalışırlar. Digər tərəfdən, bir-birini
yeni tanıyan ailələrin arasında güc, özünü göstərmə mübarizəsi başlayır.
Xanımın ailəsi oğlanın, oğlanın ailəsi də xanımın ailəsinə özlərini göstərməyə
çalışırlar. Sanki bir-birilərinə biz daha dəbdəbəliyik, köklü ailəyik deməyə
çalışırlar. Bu da çox yanlışdır və belə nəticəyə gəlirik ki, iki insan ailə
qurarkən sadəcə tərəflər yox, onların ailələri də bir-birinə uyğun olmalıdır.
Şükürlər, olsun ki, bizdə ailələr arasında çox yaxşı uyğunluq var.
Elçiliyimizdə mən Türkiyədə idim, amma Nərgizdən vəziyyət haqqında operativ
məlumatlar alırdım. Maraqlıdır ki, Nərgizin atası ilə atam sanki 40 illik dost
kimi həmsöhbət olublar (gülür). Bu da hər iki tərəfin səmimiyyətindən,
bir-birinə olan hörmətindən irəli gəlir”.
Evlilik prosesi çoxlarına əyləncəli gəlir, amma...
Nərgiz də
bu mərhələdə səmimiyyətin böyük rol oynadığını vurğulayır: "Məncə, insan ilk
olaraq özü şəxsi keyfiyyətlərinə bələd olmalı, ilk olaraq nə istədiyini
bilməlidir. Evliliyə oyun kimi baxmamalıdır. Hazırda nəzər salsaq, nə qədər
ailənin boşandığını və ya boşanma ərəfəsində olduğunu görərik. Bunun da əsas
səbəbi özlərini yaxşı tanımamaqları və tanıtmamaqlarıdır. Evlilik prosesi
çoxlarına əyləncəli gəlir, amma hər şey bununla bitmir. Evlənən şəxs bilməlidir
ki, həyat yoldaşı olacaq insanın tək özü ilə yox, onun bütün müsbət, mənfi
keyfiyyətləri ilə evlənir. Bunu qəbul edərək bu addımı atmalıdırlar. Yəni onu
dəyişdirməyə cəhd etməməlisən. Ona görə də düşünürəm ki, tanıma müddəti qısa
olmamalıdır, bacardıqları qədər birlikdə çox vaxt keçirib bir-birilərini
tanımağa çalışmalıdırlar”.
Birini
müsbət və mənfi tərəfləri ilə qəbul etmək məsələsinə Cabir də qatılır: "Dünyada
elə insan yoxdur ki, onun mənfi xüsusiyyəti olmasın. Birini sevirsənsə, mütləq
şəkildə onu olduğu kimi, bütün müsbət və mənfi tərəfləri ilə qəbul edirsən.
Təbii ki, lap göz yumub, susmaq da olmaz. Bəzən xoşa gəlməyən bir xüsusiyyət
görəndə bunu sevdiyin şəxsə uyğun dillə izah etməlisən”.
Həyat yoldaşımda xoşagəlməz xüsusiyyət gördümsə...
Mənfi və
müsbət tərəflərdən danışmışkən, görəsən, cütlüyümüz evlilikdən sonra
bir-birində bunlardan hansını kəşf edib? Cabir düşünür ki, insan gərək həyat
yoldaşının mənfi xüsusiyyətini ictimailəşdirməsin: "Bayaq da dediyim kimi, əgər
həyat yoldaşımda nə isə bir mənfilik və ya xoşagəlməz bir xüsusiyyət gördümsə,
bunu özünə deməyim daha yaxşıdır, nəinki kiminsə yanında bildirmək. Bu iki
insan arasında olan bir situasiyadır, başqasının bundan xəbər tutmağına nə
ehtiyac var? Ona görə də indi Nərgiz haqqında mənfi söz deməyim düzgün olmaz.
Bəlkə də mənim üçün mənfi olan bir xüsusiyyət başqasına görə müsbətdir”.
Nərgiz də
həyat yoldaşının fikri ilə razılaşdığını və bu situasiyaların özəl qalmalı
olduğunu bildirir: "Bilirsiniz, bu, bir az insanların həyata baxış tərzindən
asılıdır. Yəni kim hansı xüsusiyyəti müsbət və ya mənfi qiymətləndirir.
Əslində, çox zaman ailələrdə yaranan problemlər də bundan qaynaqlanır. Bəzən
cütlüklər həyat yoldaşlarının mənfi xüsusiyyətlərini öz ailələrinin yanında
danışırlar. Beləcə, iki insan arasında qalmalı olan bir məqam ailələrdə
müzakirə olunmağa başlayır. İnsan həyat yoldaşının mənfiliklərini qohumlarının,
dostlarının yanında danışmamalıdır. Bu,
sizin həyat yoldaşınızı başqalarının yanında alçaltmağınız deməkdir. Ona görə,
hər nə olursa, bunu etməməliyik. Əksinə, sizin yanınızda onun haqqında mənfi
fikir səsləndirilsə, onu müdafiə etməli, sahib çıxmalısınız. Cütlüklər
bir-birinə hörmət etməyəndə, bu, zamanla övladların da valideynə olan
münasibətinə təsir edir”.
Atam həmişə bildirir ki...
Cütlüklər
arasında əsas olan məsələlərdən biri də tərəflərin valideyn olaraq öz
vəzifələrini layiqincə yerinə yetirməsidir. Maraqlıdır, həmsöhbətlərim
biri-birini valideyn kimi necə qiymətləndirirlər? Cabir Nərgizin çox səbirli və
təmkinli olduğunu və bunun da uşaqlarla münasibətinə müsbət təsir etdiyini
deyir: "Atam həmişə bildirir ki, Nərgizin psixoloq olması hər situasiyada hiss
olunur. Həqiqətən də elədir, xüsusilə də uşaqların tərbiyəsində bu, aydın
görünür. Ən çox bəyəndiyim tərəfi uşaqlara nəyisə səbirlə izah etməsidir.
Düzdür, iki uşaq birdən Nərgizin üzərinə gedəndə, bir az səbirsizlik məqamları
da olur (gülür). Amma əksərən çox səbirli və təmkinlidir”.
Cabirin
iki oğul atası olaraq valideynlik borcunun öhdəsindən çox gözəl gəldiyini deyən
Nərgiz, bunu həm həyat yoldaşı, həm də psixoloq kimi qiymətləndirir: "Yəni hər
kəsə məlum məsələdir ki, oğlan uşaqlarının yetişməsində atanın rolu
danılmazdır. Cabir övladlarının qarşısında güclü ata obrazı yaradıb. O, evə nə
qədər yorğun gəlirsə gəlsin mütləq uşaqlarla vaxt keçirir və bunu məcburiyyətlə
yox, sevgi ilə edir”.
Ailə qurmaq istəyənlərə məsləhət
Cabir
deyir ki, bir-biriləri ilə zarafat etsinlər: "Bacardıqları qədər çox zarafat
etməyə çalışsınlar. Təbii ki, burada səviyyəli zarafatdan söhbət gedir (gülür).
Axşam söhbət etməyə mövzuları olsun. Bir-birilərini anlasınlar, empatiya qura
bilsinlər. Çox təəssüf ki, bəzi bəylərdə xanımlara ev əşyası, bəzi xanımlarda isə
bəylərə maddi təminat, yəni "bankomat” kimi bir yanaşma olur. Bu cür fikirlə
evlənirlərsə, evlənməsinlər”.
Nərgiz isə
insanları mükəmməl yox, olduqları kimi davranmağa səsləyir: "Bir insanı olduğu
kimi, müsbət və mənfi tərəfləri ilə qəbul etsinlər, sadə və səmimi olsunlar.
Mükəmməl olmağa çalışmasınlar, necə varlarsa, özlərini elə təqdim etsinlər.
Ailəli deyil, sözün həqiqi mənasında ailə olsunlar”.
Günel
Azadə