Bakı 14°C
ABŞ-dan Gürcüstana hərbi dəstək
Birləşmiş Ştatlar Gürcüstan ilə hərbi əməkdaşlıq proqramı çərçivəsində
bu ölkəyə hərbi yardımları genişləndirmək qərarına gəlib. Rəsmi Vaşinqtonun
hərbi strukturuna daxil olan Təhlükəsizlik sahəsi üzrə əməkdaşlıq Agentliyi
Gürcüstana 410 ədəd özühədəf alan raket qurğusu və 75 ədəd komanda-buraxılış
sistemləri verəcək. "Qruziya-Online” portalı xəbər verir ki, rəsmi Tbilisi
sovetdən qalma silahların mərhələli şəkildə NATO standartlarına uyğun olanlarla
əvəzlənməsi prosesini həyata keçirir. Proses çərçivəsində "M240” pulemyotları
və "M4” avtomat tüfəngləri də əldə olunacaq. Silahlar ABŞ-ın illik yardım
çərçivəsində Gürcüstana ayırdığı vəsaitlər hesabına alınacaq. "Civil.ge” nəşri
yazır ki, ən əsası, gürcü ordusu Birləşmiş Ştatların tank əleyhinə "Javelin”
raket kompleksi ilə təchiz olunacaq. Bu sistem ən qüdrətli daşınan tank
əleyhinə müdafiə sistemi hesab edilir, hazırda ABŞ hərbi və dəniz hərbi
birləşmələrində geniş şəkildə istifadə olunur. Agentliyin məlumatına görə, bu
sistemlər Gürcüstanın təhlükəsizliyi üçün mühüm rol oynayacaq. İnformasiyada
xüsusi vurğulanır ki, bu sistem Gürcüstanın milli müdafiəsi ilə bağlı
təhlükəsizlik imkanlarını gücləndirmiş olacaq. Eləcə də, bu sistemin regionda
əsas hərbi balansı dəyişməyəcəyi, hər hansı bir mənfi təsiri olmayacağı qeyd
edilib. Agentlik onu da bəyan edib ki, satış barədə ABŞ Konqresi
məlumatlandırılıb. Bu sövdələşmədən bir həftə öncə Gürcüstanın müdafiə naziri
Levan İzaoriya Birləşmiş Ştatlarda səfərdə olub və amerikalı həmkarı Ceyms
Mattislə görüşüb. Görüş zamanı Gürcüstanın yeni müdafiə qabiliyyəti proqramı
müzakirə olunub. Gürcüstan tərəfi də bəyan edib ki, yeni sistem ölkənin müdafiə
qabiliyyətini gücləndirəcək, silahlar isə yalnız və yalnız müdafiə üçün
istifadə olunacaq.
Xarici işlər nazirinin müavini David Zalkaliani bəyan edib ki, "bu
qərar iki suveren dövlətin mənafeyini, iki ölkə arasında son illər daha da
güclənən strateji tərəfdaşlığı göstərir. Yeni sistem hücum xarakterli olmayıb,
özünün texniki xarakteristikası ilə sırf müdafiə məqsədləri üçün nəzərdə
tutulub”.
Gürcüstan parlamentinin müdafiə komitəsinin sədri İrakli Sisiaşvili
öz şərhində bildirib ki, bu qərar Gürcüstana müdafiə sahəsində etibar və inamın
göstəricisidir. "Bu addım sülh və təhlükəsizliyə dəstək olacaq. Qeyd etmək
istərdim ki, bu effektiv müdafiə vasitələrindən biri olub, bizim regionda sülh
və əmin-amanlığın olmasına xidmət edir”, - deyə komitə sədri vurğulayıb.
Yeni sövdələşmə Rusiya tərəfindən qısqanclıqla qarşılanıb. Məsələn,
erməni saytında dərc edilən məqaləsində rusiyalı ekspert Aleksandr Xramçixin
belə bir sualla çıxış edib - "Gürcüstan bu sistemi hansı məqsədlərlə əldə edir”.
Dərhal da özü sualı cavablandırıb. Onun fikrincə, Gürcüstan bu sistemi
qonşularına qarşı istifadə etməyə çalışıb: "Ermənistanla münaqişəyə girmək
qəribə olardı. Ermənistan özünün hərbi potensialına görə Gürcüstandan güclüdür.
Rusiya da bu ölkə ilə müttəfiqlik münasibətlərində onu yalnız qoymayacağını
açıq bəyan edir”. Əlavə edib ki, Azərbaycana qarşı da Gürcüstan heç bir zaman
çıxış etməz. Ekspert sonda belə bir qənaətə gəlir ki, Tbilisi üçüncü ölkəyə də
bu silahı sata bilməz. Çünki, bu Birləşmiş Ştatlar tərəfindən narazılıqla
qarşılana bilər. "Əgər bu baş versə belə, Vaşinqton bu silahın harada olmasını
izləyəcək”, - deyə ekspert bildirib.
Öz növbəsində "EvrasiaNet” yazır ki, Birləşmiş Ştatlar tək hərbi
sahədə deyil, informasiya sahəsində də Gürcüstana yardım göstərmək
niyyətindədir. Nəşr yazır ki, ABŞ Rusiyanın bu ölkəyə qarşı dezinformasiya
mübarizəsində Tbilisiyə effektiv yardım göstərəcək. Qeyd edilir ki, Kreml Gürcüstan
vətəndaşlarının Qərb istiqamətindən yayındırmaq istiqamətində hər cür vasitədən
istifadə strategiyası hazırlayıb və iki ildir ki, həyata keçirir. Bu da
Vaşinqtonun diqqətindən yayınmayıb. ABŞ bu səbəbdən də postsovet məkanında
antiqərb və antiliberal təbliğata qarşı vəsaitlər ayırmağa başlayıb. Artıq
ABŞ-ın Gürcüstandakı səfirliyi bu məqsədlə 250 min dollarlıq qrant alıb. Bu vəsait
avroatlantik inteqrasiya ideyasının populyarlaşdırılması işlərinə sərf
olunacaq. Narahatçılıq üçün əsas da var. Belə ki, nəşrdə dərc edilən məqalədə o
da qeyd edilir ki, Gürcüstanın Avropa İttifaqı ilə yaxınlaşması fonunda ölkədə
konservativ elementlər əks-hücuma keçiblər. Onlar iddia edirlər ki, Avropa ilə
əlaqələr Gürcüstan iqtisadiyyatına, ənənələrinə ciddi zərbə vurur.
Azər
