Ukrayna üçün “Marşall Planı”
Bu gün ABŞ, Kanada, Yaponiya və Avropa İttifaqı ölkələri səfirlərinin
iştirakı ilə Ukrayna üçün "Marşall Planı” açıqlanmalıdır. Bu barədə Ukraynanın
avrointeqrasiya və Avropa məsələləri üzrə naziri İvanna Klimpuş-Çinşadze
məlumat verib. Onun sözlərinə görə, plana uyğun olaraq ölkəyə 5 mlrd. avroluq
investisiya yardımı göstərilməlidir. Nazir əlavə edib ki, Litvanın yaxından
dəstəyi ilə hazırlanan planın reallığa çevrilməsi üçün bütün işlər görülüb.
Əgər Litvanın bu təşəbbüsü reallaşarsa və gərəkli investisiyalar qoyularsa,
onda Ukraynada ümum daxili məhsul 6-8 faiz arta bilər. Məlumat üçün bildirək
ki, Litva Seyminin spikeri Viktoras Prançketis bəyan edib ki, Qərb Ukraynanın
iqtisadi uğurunda maraqlıdır və bu səbəbdən də "Marşall Planı”nı dəstəkləyəcək.
Lakin məsələ ondadır ki, Qərbin bir sıra ölkələrində və siyasi dairələrində
Ukrayna ilə bağlı mövqe birmənalı deyil. Belə ki, ölkə daxilində siyasi
mübarizə kəskin həddə çatıb – şəhər meydanlarında çadırlar qurulub, hakimiyyətə
qarşı korrupsiya ittihamları pik həddə çatıb. Korrupsiya ilə mübarizənin lazımı
səviyyədə olmadığı vurğulanır.
Qərb, xüsusən də ABŞ yaranmış durumu yerində qiymətləndirmək üçün
Ukraynaya öz emissarını göndərməyə qərar verib. Belə ki, ABŞ-ın aparıcı
diplomatı Vess Mitçell Avropaya 10 günlük səfərinin sonunda Ukraynaya baş
çəkəcək. Məlumatı Dövlət Departamenti yayıb. Bildirilir ki, dövlət katibinin
Avropa və Avrasiya məsələləri üzrə müaviniVess Mitçell Birləşmiş Ştatların
Ukraynanın suverenliyinə və ərazi bütövlüyünə sadiqliyini bildirəcək, Kiyevi
kritik islahatları davam etdirməyə həvəsləndirəcək. Mitçellin biznes və
vətəndaş cəmiyyəti liderləriylə də görüşləri gözlənir.
Ölkə daxilindəki gərginlik isə artıq parlament səviyyəsinə yüksəlib. Milli
Antikorrupsiya Bürosunun (NABU) direktoru Artem Sıtnikun parlamentdə korrupsiya
ilə mübarizə hesabatı şok effekti verib. Burada o, daxili işlər naziri, erməni
mənşəli Arsen Avakovun oğlunun korrupsiya əməlləri barədə hesabat təqdim edib.
Bu da ölkənin ən yüksək eşalonunda təmsil olunan şəxslərin korrupsiyaya
uğradığını göstərmiş olub. Nazir oğlu həbs edilsə də, sonradan azad edilib. Ona
qarşı bir milyon dollara yaxın dövlət vəsaitini mənimsəmə ittihamı irəli
sürülüb. Nazir oğlu elektron bilərzik taxmağa və pasportunu təhvil verməyə
razılaşandan sonra həbsdən buraxılıb. Arsen Avakov oktyabrın 31-də demişdi ki,
oğlunu Milli Antikorrupsiya Bürosunun əməkdaşları saxlayıb, Xarkovdakı evində
isə axtarış aparılıb. NABU daxili işlər nazirinin müavini də daxil olmaqla,
mənimsəmə işiylə bağlı həbslərin olduğunu bildirsə də, adları açıqlamamışdı.
Gənc Avakovun təqsiri sübuta yetirilsə, onu 12 ilədək həbs cəzası gözləyir. Oğul
Avakov məhkəmədə deyib ki, bu iş tamamilə siyasi motivlidir və hüququn aliliyi
ilə heç bir əlaqəsi yoxdur. Məlumat üçün bildirək ki, erməni nazirin
korrupsiyaya uğraması barədə bundan əvvəl Odessa qubernatoru Mixail Saakaşvili
də məlumat vermişdi. Hətta onlar arasında prezidentin iştirakı ilə keçirilən
müşavirədə qarşıdurma da yaşanmışdı.
"Ukraynada iqtisadiyyatın və mövcud hakimiyyətin dağılması prosesi
baş verir”. Bunu Odessa əyalətinin keçmiş qubernatoru Mixail Saakaşvili deyib.
Keçmiş qubernatorun sözlərinə görə, onu ancaq qaçıraraq Gürcüstana aparmaq mümkündür,
çünki Kiyevin onu vətəninə ekstradisiya etmək üçün qanuni əsas yoxdur. "Kiyevdə
istənilən an həbs edilə biləcəyim fikri tamamilə cəfəngiyatdır. Onların bunun
üçün nə gücü, nə də icraçıları var. Bu gün Ukraynada Şevardnadzenin
Gürcüstandakı hakimiyyəti zamanı olduğu kimi iqtisadiyyatın və mövcud
hakimiyyətin dağılma prosesi gedir”, - deyə Saakaşvili vurğulayıb.
Bu kimi hallar da Qərbin Ukraynaya yardımları ayrılmasında problemlər
yarada bilər. Tətbiqi siyasi tədqiqatlar Mərkəzinin rəhbəri Vladimir Fesenko
hesab edir ki, DİN rəhbərinin oğlunun həbsində əsas fiqur elə nazirin özüdür.
Yerli "Vesti” kanalı belə bir xəbər yayıb ki, A.Avakov ölkədən qaçmağa
hazırlaşır. Məlumata görə, o, Ukrayna prezidentinin devriləcəyi halda ölkəni
tərk edəcək. Müxtəlif ölkə pasportlarına, həmçinin həmin ölkələrdə mülkiyyətə
sahib olan erməni nazir Ukraynadan qaçmaq üçün bunlardan istifadə edə bilər.
Onun Panama vətəndaşlığına və Malyorka şəhərində 675 kvadratmetr ərazisi olan
dəbdəbəli villaya sahib olduğu bildirilir. Dəniz sahilində yerləşən villada 5
yataq otağı, eyni sayda vanna otağı və 12 maşınlıq qaraj olduğu qeyd olunur.
Avakovun xaricdəki mülklərinin ümumi dəyəri isə 12 milyon avro qiymətləndirilir.
Azər