Türkiyə hökuməti Azərbaycan ictimaiyyətinin tələbinə biganə yanaşmamalıdır
Türkiyə ilə Azərbaycan arasında strateji müttəfiqlik və qardaşlıq
münasibətlərinə xələl vurmaq istəyən qüvvələr yenidən fəallaşıblar. İki qardaş
ölkə arasında strateji önəm kəsb edən münasibətləri gözü götürməyən qüvvələr
havadarlarının sifarişi ilə xəyanətkar və fitnəkar siyasətlərini yenidən aktivləşdiriblər.
Bəlli olduğu kimi, bu yaxınlarda Türkiyə vətəndaşları Azərbaycanın işğal
altında olan ərazilərinə qeyri-qanuni səfər etməklə beynəlxalq hüququn norma və
prinsiplərini kobud şəkildə pozublar, həmçinin də iki ölkə arasındakı mövcud dostluq və qardaşlıq münasibətlərinə zidd fəaliyyət göstəriblər.
Qarabağa səfər edən Türkiyə vətəndaşları Ufuk Uras, Səid Çətinoğlu, Əli
Bayramoğlu və Erol Qatırçıoğlu hal-hazırda Türkiyə qəzet və saytlarına qanunsuz
səfərləri və səfər təəssüratları haqqında geniş müsahibələr verir, televiziya
proqramlarında nümayişkaranə şəkildə Qarabağ ermənilərinin qonaqpərvərliyindən,
mövcud durumlarından danışırlar.
Narahatedici məqam rəsmi Ankaranın baş verənlərə yumşaq münasibəti,
susqunluğudur. Və qardaş ölkədə anlamaq istəmirlər ki, 4 xəyanətkara qarşı
ciddi tədbir görülməməsi Azərbaycan ictimaiyyətində dərin təəssüf və narahatlıq
hissi doğurur.
Xəyanətkarların qanunsuz olaraq Dağlıq Qarabağa gəlməklə
kifayətlənmədilər. Separatçılarla görüşdükdən sonra geri qayıdaraq,
həyasızcasına "Artsax” ifadəsi işlədiblər. Lakin buna qarşı Ankara etirazını bildirmədi,
həmin şəxslərə qarşı cinayət işi də açmadı. Rəsmi Bakının etirazından sonra
sadəcə bəyanat verərək vətəndaşlarını işğal altında olan Azərbaycan
torpaqlarına getməməyi tövsiyə etdi.
Bu xəyanətkar addımdan ruhlanan ermənipərəst qüvvələr növbəti bir
addım atdı. Türkiyə Parlamentinin üzvü, erməni mənşəli millət vəkili Karo
Paylan Ermənistana tez-tez səfərlər edir, prezident Sarkisyanla
Türkiyə-Ermənistan münasibətlərinin normallaşdırılması üçün danışıqlar aparır.
Bu addım da Azərbaycan ictimaiyyətinin diqqətindən yayınmayıb.
Türkiyə hökuməti yenə də Azərbaycandakı səfirlik və XİN səviyyəsində
yumşaq bəyanatlar verməklə problemin həll olunduğunu düşünür. Görünür, Türkiyə
hökuməti qardaş ölkənin maraqlarını tapdalayan şəxslərin cəzalandırılması üçün
Belarus hakimiyyəti qədər də qətiyyət göstərmək iqtidarında deyil.
Azərbaycan-Türkiyə münasibətlərinin arzuolunmaz məcraya yönəlməsinə xidmət edən
bu səfərin xoşagəlməz nəticələrinin qarşısını almaq üçün Türkiyə hökuməti
Azərbaycanın dövlət sərhədini qanunsuz olaraq keçmiş vətəndaşları haqqında
hüquqi prosedur başlatmalı və beləliklə, gələcəkdə Qarabağa səfər etmək istəyən
digər vətəndaşlarını da belə qeyri-qanuni ziyanlı addımlardan çəkindirməlidir.
Yeri gəlmişkən, Türkiyədəki müəyyən qüvvələrin xəyanətkar addımları
bununla bitmir. Oktyabrın 11-də Avropa Şurası Parlament Assambleyasında
Azərbaycanla bağlı aparılan müzakirələrdə Türkiyə Böyük Millət Məclisinin
CHP-dən olan deputatları - Dəniz Baykal,
Gülsün Bilgəhan, İlhan Kəsici, Azərbaycanın öhdəliklərinə dair həmməruzəçilər
Stefan Şennax və Sezar Florin Predanın hazırladıqları "Azərbaycanda demokratik
təsisatların vəziyyəti” adlı tənqidi hesabat üzrə qətnamənin lehinə səs verdilər.
Azərbaycana qarşı qərəzli münasibətin, eyni zamanda erməni lobbisinin
və antitürk, antiislam dairələrin sistematik fəaliyyətinin əyani təzahürü olan
məlum qətnamənin türkiyəli millət vəkilləri tərəfindən dəstəklənməsi heç bir
izahı olmayan bir hadisə kimi Azərbaycan xalqının yaddaşına yazılıb. Azərbaycan
Prezidenti hər zaman ölkəmizlə yanaşı Türkiyənin də maraqlarını qoruyub, dost
və qardaş ölkənin əleyhinə səsləndirilən iddialara tutarlı cavablar verib.
Azərbaycanın rəsmi şəxsləri, siyasətçiləri, tanınmış ictimai və siyasi
xadimləri, vətəndaş cəmiyyəti institutlarının nümayəndələri heç vaxt
Azərbaycanın və Türkiyənin maraqları arasında fərq qoymayıblar. Türkiyə
hökuməti və xalqı üçün həssaslıq kəsb edən bütün məsələlərdə Azərbaycan öz
dəstəyini əsirgəməyib.
Fətullah Gülənlə mübarizədə Bakı Türkiyə iqtidarının yanında oldu,
gülənçilərin Azərbaycandakı şəbəkəsi çökdürüldü, məktəblər və universitet
qapadıldı, işdən çıxarılanlar oldu. Bunun əvəzində isə Ankara Bakının
narahatlığına seyrçi qalıb, həmin 4 vətəndaşıyla bağlı cinayət işi açmayıb və
millət vəkillərinin Azərbaycan hakimiyyəti əleyhinə səsvermələrinə də aydınlıq
gətirilməyib.
"Miliyyet” qəzetində dərc edilən məqalədə Beynəlxalq Əsassız Erməni
İddialarıyla Mübarizə Dərnəyinin (ASİMDER) sədri Göksel Gülbey Ermənistan tərəfindən
işğal edilən Azərbaycan torpağı Dağlıq Qarabağı ziyarət edən Ufuk Urasın FETO
terror təşkilatı tərəfindən keçmişdə dəstəkləndiyini iddia edib. O, FETO terror
təşkilatının sol düşüncəyə sahib siyasi partiyaları ya pulla, ya da müxtəlif
vədlərlə ələ aldığını bəyan edib. ASİMDER lideri bildirib ki, solçu
qüvvələr hələ 1965-ci il 6 mayda erməni patriarxlığına
yazdıqları məktubda 1915-ci ildə baş verənləri "soyqırımı” kimi qələmə
veriblər. Bunu törədənləri isə lənətlə yad ediblər. "FETO terror təşkilatı
sözdə solçu olan bəzi siyasi və yazıçıları da pul qarşılığında alaraq bu
zehniyyətə xidmət etməyə başladıb. Köhnə HDP-çi, İstanbul millət vəkili Üfüq
Uras onların başında durur. ABŞ-a gedərək FETO terror təşkilatının liderinin
əlini öpdüklərini ifadə edən Vətən Partiyası lideri Doğu Perinçek və
araşdırmaçı yazar Sabahattin Önkibar da həmin xəyanətkarları belə sıralayır -
Ufuk Uras, Ərtoğrul Günay, Ahmet Altan, Baskın Oran, Aydın Engin, Murat Sənəd,
Mete Tuncay, Cengiz Çandar, Əsər Karakaş, Əhməd İnsel, Oral Çalışlar, Binnaz
Torpaq və mediada çalışıb əl öpənlər Mahmud Övür, Nagihan Alçı, Mehmet Altan və
bunlar kimi onlarla şəxs”.
Onun sözlərinə görə, bu şəxslər FETO terror təşkilatının liderinin
əlini öpən və ona xidmət edəcəyinə söz verən şəxslərdir. ASİMDER lideri "sözdə
erməni soyqırımının 101-ci ildönümü anma proqramının təşkil edildiyi İstanbul
Taksim meydanında ön sıralarda əllərində faşist erməni şəbəkə liderlərinin
fotoşəkilini tutaraq timsah göz yaşları tökən bu insanlar, bu gündə Türkiyə və
Azərbaycan əlaqələrini pozmaq üçün çalışır və işğalçı Ermənistana xidmət etmək
üçün Azərbaycan torpağı Dağlıq Qarabağa icazəsiz daxil olurlar. Onlar
Azərbaycan qanunlarını pozaraq, Türkiyə ilə Azərbaycanı qarşı-qarşıya gətirmək
kimi bir xəyanətkar addım həyata keçirirlər. Aldıqları pul və vədlərin
qarşılığını ödəməyə çalışan bu adlar hər kəsə bəllidir. Adları bəlli ikən niyə dövlətimizin
təhlükəsizlik qurumları bu şəxsləri məsuliyyətə almırlar”.
Milli Məclisin deputatı Musa Qasımlı da düşünür ki, Azərbaycan-Türkiyə
münasibətlərini arzuolunmaz məcraya yönəldən bu halların xoşagəlməz
nəticələrinin qarşısını almaq üçün Türkiyə hökuməti Azərbaycanın dünya birliyi
tərəfindən tanınmış dövlət sərhədini qanunsuz olaraq keçmiş vətəndaşları
haqqında hüquq çərçivəsində iş başlatmalıdır".
Deputat hesab edir ki, təzahürlərin görünən və pərdəarxasında
gizlənən çoxlu tərəfləri var: " Bu davranışların hamısı birlikdə ilk
növbədə, Azərbaycan-Türkiyə münasibətlərini pozmağa yönəlib. İkincisi, Türkiyə
daxilində Rəcəb Tayyib Ərdoğan hakimiyyətini gözdən düşürməyə çalışan
dairələrin planlarının tərkib hissəsidir. Layihəni planlayıb həyata keçirənlər
yaxşı başa düşürlər ki, türk hökuməti vətəndaşları olan həmin şəxsləri Türkiyə
qanunları ilə tutub Azərbaycana təhvil verə bilməz. Bu da iki ölkə arasında
münasibətləri zədələyəcək və mövcud hakimiyyəti ictimai rəydə gözdən düşürəcək.
Planın müəllifləri bu iş üçün seçdikləri şəxslərin kimliyini, siyasi
mövqelərini də dərindən nəzərə alıblar. Həmin şəxslər türk kimliyi şübhə
doğuran, sonradan islamı qəbul etmiş şəxslərin törəmələri, Türkiyədə mövcud
hakimiyyəti sevməyən və bölücülüyü təşviq edən adamlardır".
M.Qasımlı deyib ki, Azərbaycan Respublikasının Ermənistan tərəfindən
işğal edilmiş ərazilərinə bu şəxslərin qanunsuz səfər etmələri özündə bir çox
məsələləri birləşdirərək xoşagəlməz nəticələr doğurur. Onlar ilk növbədə,
vətəndaşları olduqları Türkiyənin qəbul etdiyi və imzası olan beynəlxalq
hüququn norma və prinsiplərini kobud şəkildə pozublar.
M.Qasımlı deyib ki, Türkiyə öz imzasına hörmət edən bir dövlət
olduğundan dövləti təmsil edən türk hökuməti qanun çərçivəsində davranmağa
məhkumdur: "İkincisi, həmin şəxslər bu davranışları ilə Azərbaycan və
Türkiyə arasındakı mövcud dostluq və qardaşlıq münasibətlərinə zidd fəaliyyət
göstəriblər. Deməli, türk ictimaiyyəti də onlara qarşı sərt mövqeyini ortaya
qoymalıdır.
M.Qasımlı bildirib ki, Azərbaycan ictimaiyyətinin də Türkiyə
hakimiyyətindən müvafiq mövqeni göstərməyi gözləməyə haqqı vardır. Türkiyə
hökumətinin həm Azərbaycanın Ermənistan tərəfindən işğal edilmiş ərazilərinə
qanunsuz səfər etmiş vətəndaşları, həm də müstəqil olmalarına baxmayaraq,
AŞPA-da Azərbaycanın əleyhinə səs vermiş millət vəkilləri barəsində müvafiq
tədbirlər görməyəcəyi təqdirdə iki ölkə arasında münasibətlərin perspektivlərinə
kölgə düşə bilər: "Hesab edirəm ki, Türkiyə hökuməti Azərbaycan
ictimaiyyətinin həmin şəxslərin hüquqi qaydada məsuliyyətə cəlb edilməsi
tələbinə biganə yanaşmamalı, iki qardaş ölkə arasında olan münasibətlərin
ruhuna uyğun hərəkət etməlidir".
Azər NURİYEV