Gürcülərdən ermənilərə zərbə
Artıq 102 ildir ki, dünya boyu səpələnən erməni
icması qondarma soyqırımlarının ildönümünü qeyd edir, müxtəlif aksiyalar
keçirir. Və bu müddət ərzində tənqid və təhqirlərin hədəfi dəyişməz olaraq
qalır - qardaş Türkiyə. Bu illər ərzində onun ünvanına hər cür ittihamlam
səsləndirir, onu saxta soyqırımını törətməkdə günahlandırırlar. Bu ilin
əvvəlindən bəri də Osmanlı Türkiyəsi tərəfindən 1915-ci ildə 1,5 milyon
erməninin guya qətlə yetirilməsi ilə bağlı kütləvi informasiya vasitələrində,
sosial şəbəkələrdə təbliğat aparılır. Özü də şər-böhtan kampaniyası tək Türkiyəyə
qarşı deyil, Azərbaycana qarşı da təşkil olunur, bu iddianın həqiqət olduğunu
dünya ölkələrinə, dünyanın bütün nüfuzlu ictimai-siyasi təşkilatlarına sırımağa
çalışırlar.
Ermənilər qondarma soyqırımlarının 102 illiyi adı
altında xarici ölkələrdəki erməni lobbisindən pul qoparmaqla yanaşı, erməniləri
Türkiyədən qisas almağa, torpaq və təzminat tələb etməyə çağırırlar. Maraqlıdır
ki, ermənilərin "soyqırımı”na məruz qalmaları haqqında dünya dövlətlərinin
arxivlərində heç bir tarixi sənəd yoxdur. Türkiyə dövləti bu illər ərzində
dəfələrlə arxiv sənədlərinin araşdırılması, faktların ortaya çıxarılması barədə
erməni dövlətinə müraciət etsə də, onlar bu məsələ ilə bağlı həqiqətdən yayınmağa
çalışırlar. Özü də dəfələrlə ən yüksək səviyyələrdə ermənilərin "soyqırımı”
iddialarının əsassız olduğu barədə bəyanatlar verilib. Məsələn, erməni
saxtakarlığından söz açan Böyük Britaniyanın baş naziri Uinston Çörçill yazırdı
ki, ermənilərin fırıldaqçılıqdan, saxtakarlıqdan və günahsız adamları qırmaqdan
başqa heç bir silahı yoxdur.
Yeri gəlmişkən, getdikcə daha çox ölkə onların bu
çirkin təbliğat vasitəsinə diqqət ayırmamağa başlayıb. Ən ciddi zərbəni isə bu
dəfə onlara Gürcüstan hakimiyyət orqanları vurub. Bəlli olduğu kimi, hər il
Tbilisi erməniləri hakimiyyət orqanlarının icazəsini almadan "soyqırımı”na həsr
edilən tədbirlər keçirir, Türkiyənin ölkədəki səfirliyi önündə antitürk
bəyanatlar səsləndirirlər. Bu dəfə isə Tbilisi meriyası erməniləri şoka salan
qərar qəbul edib. Gürcüstandakı erməni icmasına Türkiyə səfirliyi qarşısında
aksiya keçirməmək məktubu göndərilib. Gürcü tərəfinin yaydığı rəsmi müraciətdə
aksiyanın avtomobillərin hərəkətinə maneçilik törədə biləcəyi göstərilib. Qeyd
edək ki, Gürcüstanda 2002-ci ilin siyahıyaalınmasına görə, 250 min erməni
yaşayır. Bəzi məlumatlara görə, onların yarısı Tbilisidə məskunlaşıb. Son bir
neçə ildə Tbilisidəki erməni icması "erməni marşı”na qoşulur və aprelin 24-də gecə
ənənəvi aksiyalar keçirir, günorta isə Türkiyənin Tbilisidəki səfirliyi önündə
rəsmi Ankaranın qondarma soyqırımını tanıması tələbi ilə şüarlar səsləndirirdi.
Gürcüstan Konstitusiyasına görə, istənilən dinc aksiyanı (dövlətçiliyə təhlükə
törətməyəcəyi təqdirdə) keçirmək üçün hakimiyyət orqanlarının icazəsi gərək
deyil. Sadəcə, yerli idarəetmə orqanlarını tədbirin vaxtı və yeri barədə şifahi
və yaxud yazılı xəbərdar etmək kifayət edir. Lakin görünür, rəsmi orqanlar
ermənilərin bu kimi şou xarakterli tədbirlərini ölkə üçün təhlükə gördüyündən,
keçirilməsinə icazə verməyib. Tbilisi meriyası erməni icmasına göndərdiyi
yazılı məktubda onlara Türkiyə səfirliyinə yaxın durmamağı tövsiyə edib.
Erməni icması və daha çox da Rusiya mətbuatı
meriyanın bu hərəkətini tənqid edib, onu səlahiyyət həddini aşmaqda
günahlandırıb. Erməni tərəfi bəyan edib ki, həmin tarixdə səfirlik qarşısında
hər hansı bir qələbəlik gözlənilmir. "JAM-nyus”a açıqlamasında Gürcüstan erməni
icmasının informasiya mərkəzinin rəhbəri Sandro Oqanova bildirib ki, meriyanın
onlara cavabı gözlənilməz olub. "Biz bəyan edirik ki, Gürcüstan
Konstitusiyasına uyğun addım atırıq. Biz 2005-ci ildən "soyqırımı”yla bağlı
tədbirlər keçiririk və belə bir halla heç bir vaxt rastlaşmamışıq”, - deyə o
bildirib. Onun sözlərinə görə, qadağanın haradan daxil olması, küləyin hansı
istiqamətdən əsməsi barədə onlarda müəyyən ehtimallar yaranıb. Lakin erməni
ekspert məsələni şişirtmək niyyətində olmadığını bildirib. Əlavə edib ki,
erməni icması Ermənistanla Gürcüstan arasında münasibətlərin
gərginləşdirilməsində maraqlı deyil.
Onu da qeyd edək ki, aprelin 14-də Gürcüstanda
fəaliyyət göstərən ictimai təşkilatlar qondarma erməni soyqırımının tanınması
ilə bağlı parlament, prezident və baş nazirə müraciət ediblər. Analoji müraciət
hər il daxil olsa da, gürcü tərəfi onlara məhəl qoymur. Rusiya nəşrləri dərhal
buna müxtəlif prizmadan yanaşıblar. Onların gəldiyi əsas qənaət budur ki,
Gürcüstan son illər Azərbaycan və Türkiyədən həddən artıq asılı vəziyyətə
düşüb. Türkiyə isə qondarma soyqırımının tanınmasını, ümumiyyətlə yaxına
buraxmır. Rəsmi Ankara bəyan edib ki, baş verən hadisənin araşdırılması
siyasətçilərin deyil, tarixçilərin işidir. Hətta arxivlərini erməni, o cümlədən
beynəlxalq ictimaiyyətin müzakirəsinə çıxarmağı təklif etsə də, qarşı tərəf
buna əhəmiyyət belə verməyib. İndi də gürcü tərəfinin bu münasibətindən sonra
ermənilər gürcüləri Azərbaycan və Türkiyənin mövqeyindən çıxış etməkdə
günahlandırmağa başlayıblar. Qeyd edilir ki, Tbilisi Bakı və Ankara ilə
münasibətləri gərginləşdirməmək üçün onlara qarşı belə bir addım atır. Hətta
qeyd edilir ki, Türkiyədən gələn bir işarə ilə Gürcüstan parlamenti avqustun
12-nin dövlət bayramı kimi elan olunması barədə qanun layihəsini təxirə salıb.
İddia olunur ki, 1121-ci il avqustun 12-də erməni və gürcü dəstələri
türk-səlcuq qoşunlarını məğlub edib. Bu döyüş isə tarixə "Didqor döyüşü” kimi
düşüb. İndi isə gürcülər nəinki bunu yada salır, hətta qeyd etmək belə istəmirlər.
Gürcü kütləvi informasiya vasitələrinin yaydığı məlumata görə, Türkiyənin
narazılığından sonra Gürcüstan parlamenti qanun layihəsinin müzakirəsini
qeyri-müəyyən müddətə kimi təxirə salıb.
Beləliklə, yuxarıda da qeyd etdiyimiz kimi, yüz,
hətta min il bundan əvvəl baş verən hadisələrdə ilişib qalan ermənilər anlamaq
istəmirlər ki, artıq onların bu cəfəngiyyatına məhəl qoymurlar. Dövlətlər artıq
proseslərə bu günün reallığından çıxış edərək qiymət verirlər. Necə ki, bunu
Gürcüstan edir.
Azər