20 yanvar-tariximizin şanlı səhifəsi - Fotolar
AMEA Naxçıvan Bölməsində Azərbaycan
xalqının tarixinə Qanlı Yanvar faciəsi kimi yazılan 20 Yanvar faciəsinin 27-ci
ildönü ilə əlaqədar keçirilən elmi konfransda ilk öncə şəhidlərimizin əziz
xatirəsi bir dəqiqəlik sükutla yad edildi.
"20 Yanvar-tariximizin
qanlı və şanlı səhifəsi” mövzusuna həsr olunan tədbiri Bölmənin sədri, akademik
İsmayıl Hacıyev açaraq Azərbaycan xalqının vətənə, torpağa sədaqətini, azadlıq,
müstəqillik uğrunda mübarizədə sarsılmazlığını bütün dünyaya göstərən 20 Yanvar
faciəsinin səbəblərindən, sovet imperiyasına rəhbərlik edən ermənipərəst
quldurların Azərbaycan xalqına qarşı məkirli siyasətlərindən və onların 1990-cı
ildə törətdikləri qanlı cinayətlərdən ətraflı danışdı. Akademik çıxışında 20
Yanvar tarixini təkcə Azərbaycan xalqının faciə günü kimi yox, həm də
xalqımızın qəhrəmanlıq zirvəsi kimi dəyərləndirdi.
Daha sonra AMEA Naxçıvan
Bölməsinin Tarix, Etnoqrafiya və Arxeologiya İnstitutunun böyük elmi işçi, tarix
üzrə fəlsəfə doktoru Yaşar Rəhimovun "Faciəyə aparan yol”, həmin institutun şöbə
müdiri, AMEA-nın müxbir üzvü Vəli Baxşəliyevin "Ümummilli lider Heydər Əliyev və
20 Yanvar faciəsi”, aparıcı elmi işçi, tarix üzrə fəlsəfə doktoru Musa
Quliyevin "Azadlıq fədailəri-şəhidlər”, şöbə müdiri, tarix üzrə fəlsəfə
doktoru, dosent Toğrul Xəlilovun "20 Yanvar faciəsinin nəticələri və ibrət dərsləri”
mövzusunda məruzələri dinlənildi.
Məruzələrdə yanvarın
19-dan 20-nə keçən gecə Azərbaycan xalqının ağır iflic vəziyyətinə salınması,
informasiya blokadasında olması, radio, televiziyanın susdurulması, mətbuatın nəşrinə
qadağa qoyulması bu faciəni törədənlərin məkirli siyasətinin tərkib hissəsi olduğu
bildirildi. Qeyd olundu ki, belə bir ağır vəziyyətdə Moskvada, ölkəmizdən
uzaqda yaşayan ümummilli lider Heydər Əliyev Azərbaycanın Moskvadakı nümayəndəliyinə
gedərək 20 Yanvar faciəsini törədənlərin cinayət məsuliyyətinə cəlb edilməsini
tələb etdi. Ulu öndər Heydər Əliyevin cəsarətli bəyanatı kütləvi informasiya
vastəsi ilə Azərbaycan xalqının haqq səsi, fəryadı bütün dünyaya çatdırıldı.
Ümummilli liderin ölkə rəhbərliyinə qayıdışından sonra 20 Yanvar hadisələrinin
mahiyyəti açıqlandı və hüquqi-siyasi qiyməti öz əksini tapdı. Bu gün şəhidlərimizin
adları əbədiləşdirilib, onların ailə üzvlərinə dövlət qayğısı göstərilir.
Tədbirdə Azərbaycan
tarixinin həm kədərli, həm qəhrəmanlıq səhifəsi olan 20 Yanvar hadisələrini gələcək
nəsillərə əsaslı şəkildə çatdırılması istiqamətində Bölmə əməkdaşlarının da öhtəsinə
düşən vəzifələrdən danışıldı.
Konfransda 27 il bundan
öncə Bakı şəhərində törədilən qanlı hadisənin bir çox fotoları video slayt vastəsi
ilə nümayış olundu.
Məlumat
üçün onu da qeyd edək ki, AMEA Naxçıvan
Bölməsinin Mərkəzi Elmi Kitabxanasında 20 Yanvar faciəsinin 27-ci ildönü
ilə əlaqədar "20 Yanvar” başlığı
altında sərgi də təşkil edilib. 1990-cı ilin yanvarın 19-dan 20-nə keçən
gecənin materiallarını əks etdirən jurnal, qəzet və kitab materiallarının yer
aldığı sərgi yanvar ayının son
günə kimi nümayiş olunacaq.