“15 iyul milli birlik və demokratiya günüdür” - Fotolar
Türkiyə Böyük Millət
Məclisinin mərasim meydanında 15 iyul hərbi çevriliş cəhdinin ildönümü ilə
bağlı aksiya başlayıb. Aksiyada 15 iyul
hərbi çevriliş cəhdinin qarşısının alınması zamanı şəhid olan 250 nəfərin adı
oxunub. Eyni zamanda, hərbi vətənpərvərlik mahnıları, xüsusən də 15 iyul
şəhidlərinin qəhrəmanlığına həsr olunmuş mahnılar səsləndirilib. Aksiyada Milliyətçi
Hərəkat Partiyasının sədri Dövlət Baxsalı, baş nazir Binəli Yıldırım, parlament
sədri İsmayıl Qəhrəman və Türkiyə prezidenti Rəcəb Tayyib Ərdoğan da iştirak
edib. Çıxışlardan öncə Qurani-Kərimdən şəhidlərin ruhuna dualar oxunub.
İzdiham
qarşısında çıxış edən dövlət rəsmiləri 15 iyul hadisələrindən, həmin gecə öz
ölkəsinə xəyanət edənlərin əməllərindən, Vətəninin, demokratiyanın müdafiəsinə
qalxan sadə xalqın qəhrəmanlıq tarixi yazmasından söhbət açıblar.
Türkiyə prezidenti Rəcəb
Tayyib Ərdoğan 15 iyul hərbi çevriliş cəhdini Türkiyənin yaxın tarixində ən
böyük xəyanət kimi dəyərləndirib. O, bu xəyanətin dəf edilməsində iştirak edən
hər bir şəxsə, xalqına təşəkkür edib. Qeyd edib ki, keçən il iyulun 15-də
Türkiyə xalqı dünyaya necə bir millət olduğunu bir daha nümayiş etdirib:
"Bu xalq 1 əsr əvvəl hər kəsi təəccübləndirən bir zəfərə imza atmışdı. 15 iyulda da bu xalq böyük bir zəfər qazandı.
Millətimin əlində silahmı vardı? Millətim o xainlərə qarşı əlindəki bayrağı və
ürəyindəki imanı ilə mübarizə apardı. Dünyada tankı yumruqla dayandıran, hərbi
təyyarəni, vertolyotu dayandırmağa çalışan bir millət də yoxdur. Belə bir
millətin, ölkənin övladı olduğum üçün fəxr edirəm. 15 iyul hərbi çevrilişdən də
öncə xəyanət adlandırmağımızın bir səbəbi var. Bu gün qarşısında durduğumuz
Türkiyə Böyük Millət Məclisi qazi bir parlamentdir. Ancaq istiqlal savaşı
zamanı da bu müqəddəs parlamentə əl uzatmağı düşünməyib. Ancaq 15 iyulda
Türkiyə Millət Məclisi bombalandı".
Ölüm hökmü barədə
parlamentdə qərar qəbul edilərsə, bu qərarı təsdiqləyəcəyini bir daha bəyan
edən R.T. Ərdoğan Fətullahçı Terror Təşkilatı və onun lideri Fətullah Gülənin
əməllərinin ifşa olunduğunu vurğulayıb. 15 iyulda hərbi çevriliş cəhdi zamanı
Cümhuriyyət Xalq Partiyasının sədri Kamal Kılıçdaroğlunun bir bələdiyyə
sədrinin evində olduğunu qeyd edən Türkiyə prezidenti onun 15 iyul hərbi
çevriliş cəhdinin nəzarətdə olan hərbi çevriliş cəhdi kimi qiymətləndirilməsini
yolverilməz sayıb: "250 vətəndaşımız şəhid olub, 2193 vətəndaşımız
yaralanıb. Belə olan halda bu hərbi
çevriliş cəhdinin belə qiymətləndirilməsi qəbul edilə bilərmi?! Millətimiz
meydanlarda xainlərə qarşı mübarizə apararkən millət vəkilləri də parlamentdə
toplaşaraq mövqelərini ortaya qoydular. Millət vəkilləri
parlamentimizə sahib çıxdılar və bunu dünyaya nümayiş etdirdilər. Həmin gün
parlamentə gələn 106 millət vəkilinin hər birini ayrılıqda təbrik edirəm.
Xainlər parlamenti bombalamaqla nə qədər alçaldılarsa, millət vəkilləri o qədər
ucaldılar. Belə millətə belə parlament yaraşır. İnsan olan Vətənini satarmı?! O
xainlər bu Vətənə, millətə necə qıydılar?! FETÖ bu milləti parçalamaq üçün
çalmadığı qapı qalmadı, indi FETÖ Pensilvaniyadan prosesləri idarə etməyə
çalışır. 15 iyulda bu Vətənə xəyanət edənlər indi məhkəmələrdə bunun cavabını
verirlər”.
Türkiyə prezidenti deyib
ki, ölkənin inkişafı ilə bağlı qarşıya qoyulan 2023-cü il hədəflərinə nail olunacaq:
"15 iyul milli birlik və demokratiya günüdür. Bu ruh, cəsarət olduğu halda heç kim bu dövləti yıxa, milləti əsir edə
bilməz. 15 iyul bizə dostumuzu, düşmənimizi də göstərdi. Dərhal dəstəyini
bildirən dostlarımız, günlər sonra üzlərindən riyakarlıq tökülənlər də
mövqeyini bildirdilər. Millətimizi yıxa, ölkəmizə diz çökdürə, yolumuzdan geri
döndərə bilməyəcəklər. Biz dostumuzu da, düşmənimizi də tanıyırıq. Biz bir
olacaq, qardaş olacaq, güclü olacaq və birlikdə Türkiyə olacağıq".
Rufik
İSMAYILOV
Türkiyə,
Ankara