Atif Eyvazov/AZADİNFORM. “Sərhəd, gömrük xidmətləri və daxili işlər orqanlarının xətti ilə Xəzər dənizində təhlükəsizliyin təmin edilməsi sahəsində qarşılıqlı fəaliyyət haqqında” Saziş layihəsinin bu gün Bakıda müzakirəsi ilə bağlı keçirilən tədbirdə Xəzərin statusuna dair bəzi məsələlər müzakirə olunacaq“. AZADİNFORM xəbər verir ki, bu fikirləri İran prezidentinin Xəzər məsələləri üzrə xüsusi nümayəndəsi, İran xarici işlər nazirinin müavini Mehdi Səfəri söyləyib.

“Ümid edirəm ki, Xəzərin ekologiyası ilə bağlı imzalanmış Konvensiyaya protokollar əlavə olunacaq, Xəzərin bioresurslarına dair məsələlər münasib şəraitdə həllini tapacaq, nəticələr əldə olunacaq. Bu məsələdə Xəzəryanı ölkələr sıx əməkdaşlıq etməlidirlər ki, əlavə protokollar imzalansın”,-deyən M.Səfəri əlavə edib ki, martın sonunda Tehranda Xəzərdə nərəkimilərin ovuna dair kvotanın müəyyənləşməsinə dair iclasın keçirilməsi nəzərdə tutulub: “Ümid edirik ki, həmin iclasda nərəkimilərin kvotası dəqiqləşdiriləcək”. Qeyd edək ki, bu gün Bakıda Xəzərdə təhlükəsizliyin təmin edilməsi sahəsində qarşılıqlı fəaliyyət haqqında Saziş layihəsinin müzakirəsi ilə bağlı toplantı keçirilir. Martın 12-dək davam edəcək toplantıda “Sərhəd, gömrük xidmətləri və daxili işlər orqanlarının xətti ilə Xəzər dənizində təhlükəsizliyin təmin edilməsi sahəsində qarşılıqlı fəaliyyət haqqında” Saziş layihəsi müzakirə edilir. Müzakirələrdə Xəzəryanı dövlətlərin xarici işlər nazirlərinin müavinləri və həmin dövlətlərin müvafiq qurumlarının səlahiyyətli nümayəndələri iştirak edir. Tədbir Azərbaycan xarici işlər naziri Elmar Məmmədyarovun açılış nitqi ilə başlayıb.

Yerləşdirilib: 11.03.10   Baxılıb: 72