İlham Məmmədov/AZADİNFORM. Uzun müddətli fasilədən sonra ötən il ərzində Goranboy rayonunun Səfikürd, Alpoud, Ağamalıoğlu və Qarasucu yaşayış məntəqələrinin qaz təsərrüfatları yenidən bərpa olunub. Bu barədə məlumatı AZADİNFORM-a Dövlət Neft Şirkətindən veriblər. Bu isə rayon üzrə 1175 abonentin təbii qazla təminatı deməkdir. Hazırda Cinli-boluslu kəndinin qaz təsərrüfatının bərpası həyata keçirilir. Şəhərin Dədə Qorqud, Q.Nağıyev, S.Vurğun, İ.Qayıbov və Vidadi küçələrində istismara yararsız 310 metrlik müxtəlif diametrli daşıyıcı, paylayıcı qaz kəmərləri yenisi ilə əvəz olunaraq istismara verilib.

Qızılhacılı qəsəbəsini və digər yaşayış məntəqələrini təbii qazla təmin edən daşıyıcı qaz kəmərinin istismara yararsız 550 metrlik yeraltı hissəsi polietilen boru ilə əvəz olunub. Qızılhacılı qəsəbəsi İ.Qayıbov küçəsindəki 1300 metrlik paylayıcı və daşıyıcı qaz kəmərləri də yenisi ilə əvəz olunur və çəkilişi yaxın günlərdə başa çatdırılacaq. Goranboyun kənd yaşayış məntəqələrinin qaz təchizatını yaxşılaşdırmaq və qaz sızmalarının qarşısını almaq üçün də təxirəsalınmaz tədbirlər görülür. Belə ki, Xoylu, Qaradağlı kəndlərini və Qazanbulaq qəsəbəsini təbii qazla təmin edən daşıyıcı kəmərlərdə təmir bərpa işləri aparılıb. Bundan başqa 2010-cu il ərzində Baxcakürd, Dəyirmanlar, Azad, Veyisli və Tatarlı kənd yaşayış məntəqələrinin təbii qazla təminatı nəzərdə tutulub.

Yerləşdirilib: 10.03.10   Baxılıb: 184