“ATƏT-in Bakı Ofisi də daxil olmaqla seçkilərlə maraqlanan digər beynəlxalq qurumların fəaliyyəti Mərkəzi Seçki Komissiyası tərəfindən həmişə izlənilir. Onların hamısının mütərəqqi, konstruktiv fikirləri təqdir olunur.

Hərdən ola bilər ki, onların müəyyən hərəkətləri, addımları bizi qane etmir”. Bu fikirləri Mərkəzi Seçki Komissiyasının (MSK) sədri Məzahir Pənahov ATƏT-in Bakı Ofisinin parlament seçkiləri ilə bağlı avqustun 26-da açıqladığı tövsiyələrə münasibət bildirərkən deyib.
 “Ancaq buna baxmayaraq, mən həmişə MSK adından bu qurumlara minnətdarlığımı bildirirəm. ATƏT-in Bakı Ofisi Azərbaycanda keçirilən son bir neçə seçkidə kifayət qədər fəallıq göstərib”.
Qeyd edək ki, ATƏT-in Bakı Ofisi avqustun 24-də Bakıda keçirilən dəyirmi masada səslənən təklifləri ümumiləşdirərək qarşıdan gələn parlament seçkilərinin işıqlandırılmasına dair tövsiyələr hazırlayıb. Həmin tövsiyələr avqustun 26-də açıqlanıb.
Xatırladaq ki, ATƏT-in mətbuat azadlığı üzrə xüsusi nümayəndəsi Dunya Miyatoviç sentyabrın əvvəlində Azərbaycana gələcək.
APA-nın məlumatına görə, D. Miyatoviç sentyabrın 6-da ATƏT-in Bakı ofisinin Mətbuat Şurası ilə birgə təşkil edəcəyi “KİV-də özünütənzimləmə yolu ilə söz azadlığının təmin edilməsi” mövzusunda konfransda iştirak edəcək.
Tədbirə hökumət, mətbuat, vətəndaş cəmiyyətinin nümayəndələri və xarici qonaqlar qatılacaq.

Yerləşdirilib: 28.08.10   Baxılıb: 225