Türkiyə və Azərbaycanın dövlət himnləri səslənib, dövlət başçıları fəxri qarovul dəstəsinin qarşısından keçiblər. Türkiyə prezidenti Azərbaycan əsgərlərini salamlayıb.

Sonra Azərbaycanın dövlət və hökumət nümayəndələri Abdulla Gülə, Türkiyə nümayəndə heyətinin üzvləri isə İlham Əliyevə təqdim olunub.
Fəxri qarovul dəstəsi hərbi marşın sədaları altında dövlət başçılarının qarşısından keçib.
Daha sonra prezidentlərin təkbətək görüşü keçirilib. Görüşdə Azərbaycanla Türkiyə arasında dostluq və qardaşlıq münasibətlərinin müxtəlif sahələrdə inkişafından məmnunluq bildirilib, münasibətlərin bundan sonra da genişlənəcəyinə əminlik ifadə olunub.
Yüksək səviyyədə qarşılıqlı səfərlərin əhəmiyyətinə toxunan dövlət başçıları Türkiyə prezidentinin Azərbaycana rəsmi səfərinin ölkələrimiz arasında əlaqələrin genişlənməsinə töhfəsini verəcəyini vurğulayıblar.
Görüşdə ikitərəfli münasibətlər, regional və beynəlxalq məsələlər ətrafında fikir mübadiləsi aparılıb.
Dövlət başçıları arasında təkbətək görüşdən sonra nümayəndə heyətlərinin iştirakı ilə geniş tərkibdə görüş olub. Bunun ardınca Azərbaycan-Türkiyə sənədlərinin imzalanması mərasimi keçirilib.
Azərbaycan prezidenti İlham Əliyev və Türkiyə prezidenti Abdulla Gül “Azərbaycan Respublikası və Türkiyə Respublikası arasında strateji tərəfdaşlıq və qarşılıqlı yardım haqqında Müqavilə” imzalayıblar.