Bu fikirləri Azərbaycanın xarici işlər naziri Elmar Məmmədyarov jurnalistlər üçün keçirdiyi brifinqdə söyləyib. Nazir bildirib ki, Almatıda keçirilən “3+2” formatında görüşdən sonra birgə bəyanatla çıxış etmək erməni tərəfinin bir sıra məsələlərlə razılaşmaması ilə əlaqədar baş tutmayıb: “Lakin ATƏT-in Minsk Qrupuna həmsədrlik edən ölkələrin xarici siyasət idarələrinin rəhbərləri Sergey Lavrov, Bernar Kuşner və Ceyms Steynberqin birgə bəyanatı göstərir ki, həmsədrlər prosesin dayandırılmasını istəmirlər. Səbir etmək lazımdır və erməni tərəfi anlamalıdır ki, onların Dağlıq Qarabağ müstəqil görmək niyyəti mümkün deyil”.
XİN başçısı bildirib ki, Ermənistan işğal etdiyi ərazilərdən öz qoşunlarını çıxaran gün Azərbaycan dərhal sərhədləri açmağa və iqtisadi layihələr həyata keçirməyə hazırdır: “Almatı görüşündən sonra belə başa düşürəm ki, erməni tərəfi ən azı Xarici İşlər Nazirliyi səviyyəsində buna hazır deyil”.
Nazir onu da bildrib ki, Dağlıq Qarabağa müstəqilliyin verilməsi gələcək danışıqların mövzusu ola bilməz. "Ermənilərin müstəqil Ermənistan dövləti var. Dağlıq Qarabağ ermənilərinin öz müqəddəratını təyin etməsi yalnız Azərbaycanın tərkibində muxtariyyət çərçivəsində ola bilər", - o qeyd edib.